Өрөспүүбүлүкэҕэ доруобай уонна көхтөөх уһун үйэлэниини көҕүлүүр «Алмаас саас» бастакы пуорум иһинэн «Стартап 50+» төгүрүк остуолга кардиолог быраас, мэдиссиинэ билимин дуоктара Наталья Махарова 50-чатын ааһан баран «Кардиолайф» клиникатын хайдах арыйбытын, аан бастаан массыына ыыта үөрэммитин, билигин уруулга олордо даҕаны тугу барытын ситиһэрин туһунан кэпсээтэ.
Кини киһи олоххо интэриэһэ, баҕа санаата баарын тухары иннин диэки хардыылыырын, 68 сааһыгар инники олоҕо өссө тупсан иһэригэр итэҕэйэрин биллэрдэ. Өй-санаа, эт-хаан өттүнэн итинник санааҕа кэлэргэ кини сыралаах үлэни ыыппыт, олоҕу астына-дуоһуйа, махтана олорорго өр кэмнээх суолу-ииһи ааспыт.
1990-ус сылларга үлэһит ахсаанын сарбыйыы кэмигэр кэргэнин кытта иккиэн үлэтэ суох хаалан, уоннуу куул хортуоппуйу, моркуобу, сүбүөкүлэни олордо сылдьан, олохторун ырытан көрбүттэр. Онтон үөрэниэххэ наада диэн бэйэтэ аспирантураҕа, кэргэнэ Судаарыстыбаннай сулууспа Арассыыйатааҕы академиятыгар РАГС-ка үөрэнэ киирбиттэр. Ол түмүгэ ыал аҕата сүүрбэччэ сыл Кадастровай балаата дириэктэринэн үлэлээбит.
Наталья Владимировна үөрэҕин бүтэрбитин кэнниттэн Мэдиссиинэ национальнай киинигэр саамай уустук салааҕа, рентгенхирургияҕа ыыппыттар. Онно улахан, бөдөҥ эр дьону кытта кыра уҥуохтаах, нарын кэрэ аҥаар коронаграфияҕа үлэлии сылдьан, киһи доруобуйата тымырдарын туругуттан тутулуктааҕын өйдөөн, салгыы докторантураҕа үөрэнэ барбыт.
Диссертациятын көмүскээн баран балыыһаҕа үлэлии барыан сөп этэ эрээри, бэйэтин клиникатын арыйарга быһаарыммыта даҕаны, хантан харчы булабын диэн толкуйга түспүтэ. Билим үлэһитэ араас гырааннарга кыттан, 30 000 солк. ылан, көмпүүтэр атыыласпыта, онтон Арассыыйа таһымыгар сайаапкатын ыытан баран умнан кэбиспитэ. Арай биир киэһэ төлөпүөн тыаһыы түһэн, гырааҥҥа кыайбытын туһунан иһитиннэрбиттэрэ. Ол харчытынан 3 массыына кэлэр кыахтааҕа, кини мэдиссиинэ оборудованиетын атыыласпыта.
Аан бастаан саҕалыырыгар 10 кв.м. кыараҕас хоско олорон, киэҥ-куоҥ сырдык клиниканы хараҕар көрөн, «Кардиолайф» диэн ааттаабыта. Кини аҥаардастыы сүрэҕи эрэ эмтээбэккэ, дьон күн аайы олохтон астына-дуоһуйа, үөрэ-көтө олороругар, бэйэтин, дьону таптыы үөрэнэригэр көмөлөһөр.
«Доруобуйа быраас хоһуттан буолбакка, бэйэҕэ тапталтан саҕыллар, олоҕуҥ туһугар эппиэтинэстэн, өр кэмҥэ көхтөөхтүк, дьоллоохтук олорор баҕаттан саҕаланар. Олоххо тутуһар дэбииһим үөрэнэргэ, саҥаны саҕалыырга, бэйэни тупсарарга хаһан даҕаны хойут буолбатах», — диэн этэр.
Биир халыыптаах үлэттэн салгыбат туһугар иллэҥ кэмигэр ыллыыр, саха эстрадатын чаҕылхай ырыаһыттарын Эрчими, Өркөнү кытта дуэттыыр, сайын тиэргэнигэр сибэкки арааһын олордор. Киһи доруобуйата хамсаныыттан тутулуктаах диэн тренажернай саалаҕа сылдьар уонна уйулҕаны кытта үлэлииргэ элбэҕи ааҕар.
Ааптар хаартыскаҕа түһэриитэ.
-
0
-
0
-
0
-
0
-
0
-
0
