Виктор Николаевич СӨ Ааҕар-суоттуур балаататын отчуотун истэн баран элбэх ыйытык үөскээбитин бэлиэтээтэ. «Уопсайа 10 млрд. солк. кэриҥэ суумаҕа араас кэһии тахсыбыт, онтон 32 мөл. солк. үбү төнүннэрбиттэр. Хонтуруоллуур үлэттэн туох да түмүк суох, кэлиҥҥи кэмҥэ «дсп” (служебнай эрэ көрүүгэ) диэн хааччаҕы киллэрдилэр.
Ону таһынан, өрөспүүбүлүкэҕэ дьадайыыны аҕыйатарга Бырабыыталыстыба чааһа ыытыллыбыта. Судургутук быһаардахха, манна паардарын эрэ таһаараллар, дьокутааттар ыйытыктары биэрэллэр, онтон туох даҕаны уураах, түмүк тахсыбат. СӨ Бырабыыталыстыбатын бэрэссэдээтэлин солбуйааччы Георгий Степанов дакылаатын истибиппит, дьадайыыны аҕыйатарга 20 млрд. солк. көрүллэр курдук эрээри, норуот олоҕо тупсубат», — диэтэ Виктор Николаевич.
Бэс ыйыгар ыытыллыбыт пленарнай мунньахха тохтоон, икки күн устата 64 боппуруос көрүллүбүтүн, Ил Дархан Айсен Николаев СӨ Бырабыыталыстыбатын 2025 с. үлэтин түмүгүн таһаарар отчуотун истибиттэрин эттэ. Онно Виктор Федоров сүрүн кэрчиктэри бэлиэтээн, бэйэтин санаатын үллэстибититтэн пресс-кэмпириэнсийэҕэ кэпсээтэ.
«Өрөспүүбүлүкэ макро экэниэмикэ өттүнэн бигэ туруктаах, тырааныспар, энэргиэтикэ, социальнай көмүскэл салаатынан улахан бырайыактары олоххо киллэрэллэр эрээри, кыһалҕалаах боппуруостары хайдах быһаарыахха сөбүн туһунан дакылаакка этиллибэтэҕэ.
Бырамыысыланнай оҥорон таһаарыы көрдөрүүтэ 100%, оттон агробырамыысыланнай салаа оҥорон таһаарыыта аллараа түһэн, ынах-сүөһү, сылгы, көтөр ахсаана аҕыйыы турар. Нэһилиэнньэ дьадайыытын дьүүллэһэргэ оробуочай бөлөхтөрү тэрийэн, үгүс-үтүмэн мунньахтары ыыталлар, үлүскэнник үлэлээн күлүбүрүүллэр эрээри, туох да оҥоһуллубат.
Бырабыыталыстыба өттүттэн сирэй эппиэттээх дьону анаан, болдьох биэрэн, ирдээбэттэр. Күн бүгүн ОДьКХ салаатын инфраструктурата эргэрэн-кээһэнэн бүттэ, сылааһынан хааччыйыы ороскуота таһыччы үрдүк, субсидия кээмэйэ эмиэ эбиллэ турар. Ону барытын хааччыйар кыахпыт суох, оччоҕо эһиил хайдах буолабыт? Билиҥҥи үлэ халыыба кыайан үлэлээбэт. Ол иһин мунньахтарга кураанах дойҕоҕунан дьарыктаммакка, кыһалҕаны быһаарар, саҥалыы дьаһанар кэм кэллэ.
Ил Дархан отчуотун истэн баран кэккэ этиилэрбин киллэрбитим, Ил Түмэҥҥэ салгыы хайдах дьаһанар былааннарын билиһиннэрэллэригэр эппитим», — диэтэ Виктор Федоров.
Дьокутаат 38 хочуолунайга 450 киһи үлэлиирин этэн туран, кинилэр онно тугу гыналларый? — диэн ыйытта. Гаас хочуолунайга былыргылыы чоҕу киллэрэн куппаттар, оборудование эрэ үлэтин кэтииллэр, туох эмит буоллаҕына, маастарга эрийэллэр, үлэлэрэ онон бүтэр.
Ааптар хаартыскаҕа түһэриитэ.
-
0
-
0
-
0
-
0
-
0
-
0
