1998-2007 сс. куорат баһылыгынан талыллан үлэлээбит Илья Михальчук Москуба куораттан анаан-минээн көтөн кэлэн, саҥа баһылыгы эҕэрдэлээтэ.
Санатан эттэххэ, Дмитрий Садовников куорат дьаһалтатыгар аан бастаан киирэн, Михальчук хамаандатыгар ыччат бэлиитикэтин, физичэскэй култуураҕа, успуорка уонна туризмҥа начаалынньыганан үлэтин саҕалаабыта. Онтон Сайсары уокуругун управатын салайааччытынан, Айсен Николаев куораты салайар кэмигэр Дьокуускай баһылыгын бастакы солбуйааччытынан үлэлээбитэ.
Айсен Николаев Ил Дархан буолбутун кэнниттэн СӨ Олох-дьаһах, хомунаалынай хаһаайыстыба уонна энергетика миниистиринэн, СӨ Бырабыыталыстыбатын бэрэссэдээтэлин бастакы солбуйааччытынан үлэлээн кэллэ. Онон Ил Дархан этэринэн, куорат уонна өрөспүүбүлүкэ салалтатын таһымыгар иккиэн бииргэ үлэлээн, уустук кэми уоту-ууну ааһан, соратниктыы буоллаллар.
Дьокуускай куорат Дууматын бэрэссэдээтэлэ Альберт Семенов үөрүүлээх күнүнэн эҕэрдэлээн туран, Дмитрий Дмитриевич муниципальнай уонна судаарыстыбаннай сулууспаҕа өр кэмнээх үлэтин уопута, куорат сайдар суолун табатык өйдүүрэ, эппиэтинэстээх быһаарыныыны ылынара тапталлаах куораппыт үүнэ-сайда турарыгар, дьон олоҕун таһыма тупсарыгар тирэх буолуо диэн эрэлин биллэрдэ. Кини куорат баһылыгар Ил Дархан киллэрбит кандидатуратын көрөн баран Дьокуускай куорат Дуумата Дмитрий Садовниковы талбытын туһунан иһитиннэрдэ уонна куорат уокуругун баһылыга буоларын туоһулуур дастабырыанньаны туттарда.
Куорат хаһаайына буоларын кэрэһэлиир күлүүһү РФ Култууратын үтүөлээх үлэһитэ, СӨ Үтүөлээх артыыһа Афанасий Федоров утары уунна. Түөскэ кэтэр илин кэбиһэр курдук үрүҥ көмүс бэлиэни СӨ Үөрэҕин үтүөлээх үлэһитэ Альбина Лыхина кэтэртэ.
Ил Дархан Айсен Николаев үөрүүлээх түгэнинэн эҕэрдэлээн туран, сыралаах, ыарахан уонна суолталаах дуоһунаска Дьокуускай куорат дьонун-сэргэтин туһугар улахан ситиһиилэри, дьоһун кыайыылары баҕарда. Дмитрий Садовников Управаҕа үлэлээн, муниципальнай уонна судаарыстыбаннай сулууспа бары кэрчигин ааспытын, кини дойдутугар, куоракка бэриниилээх буолуута, салайар үлэҕэ талаана долгуйар дьоллоох Дьокуускай 400 сыллаах дьоһун үбүлүөйүн көрсө куораты сайыннарар былааны олоххо киллэрэргэ көмөлөһүө диэн бүк эрэлин биллэрдэ.
«Биир да мүнүүтэ умнубакка куорат олохтоохторун Аҕа баһылык быһыытынан, амарахтык тутан, сылаастык сыһыаннаһан, көрө-истэ сылдьыахтааххын. Билигин судургута суох бириэмэҕэ олоробут, дойдубут сүбэрэнитиэтин туһугар киирсэр, биһиги уолаттарбыт Аҕа дойдубутун көмүскүү инники кирбиигэ сылдьаллар. Маннык кэмҥэ дьоҥҥо истиҥ сыһыан наада, бүддьүөт үлэһиттэригэр, урбаанньыттарга, бочуоттаах сынньалаҥҥа тахсыбыт аҕа саастаах дьоҥҥо.
Боростуой дьон кыһалҕатыгар болҕомтолоох буолан, ону хараҕыҥ далыгар тута сылдьыаҥ диэн эрэнэбин. Куорат дьаһалтатыгар уонна Бырабыыталыстыбаҕа бииргэ үлэлии сылдьан дьон туһугар ис сүрэхтэн кыһалларгын көрө-истэ сылдьабын. Ил Дархан быһыытынан бэйэм соратникпын уонна тапталлаах куораппын куруук өйүөм», — диэн эттэ Айсен Николаев.
Ол туһунан сиһилии "Ил Түмэн" хаһыат бу нэдиэлэтээҕи нүөмэригэр ааҕыҥ.
Ааптар хаартыскаҕа түһэриитэ.
-
2
-
0
-
0
-
0
-
0
-
0
