«Үлэбин Дьокуускай куорат дьаһалтатыгар саҕалаабытым, Илья Михальчук хамаандатыгар бастакы хардыыларбын оҥорбутум, Юрий Заболев куораты салайар кэмигэр үлэлээбитим. Айсен Николаевы кытта үлэлиир кэммэр салайар үлэҕэ уопутурбутум, улахан оскуоланы ааспытым.
Билигин куорат дьаһалтатыгар төннөн кэлэн, тапталлаах куораппыт салгыы сайдарын туһугар билиибин, уопуппун туһаныам. Биһиги сүрүн сыалбыт — куорат инфраструктуратын бигэтик сайыннарыы, дьон олоҕун хаачыстыбатын үрдэтии. Хочуолунайдары кыстыкка бэлэмниэхпит, ититии, уот, уу ситимэ саахала суох үлэтин хааччыйыахпыт, суолу-ииһи тутуохпут, оптуобустары саҥардыахпыт, саҥа пааркалары, искибиэрдэри тутуохпут, хаарбах дьиэлэри көтүрэргэ үлэлэһиэхпит. Ыччат соҕуруу бара сатаабакка төрөөбүт дойдутугар хааларын туһугар кыһаллыахпыт.
Бэрээдэги араҥаччылыыр уорган үлэһиттэрин кытта хас биирдии тиэргэҥҥэ нус-хас куттала суох олоҕу тэрийиэхпит. Маны биир киһи соҕотоҕун кыайбат, ол иһин хамаандабыт куорат туһугар кыһаллар дьон санаатын истэн, уопсастыбаннай түмсүүлэри, баартыйалары, өрөспүүбүлүкэ салалтатын кытта бииргэ үлэлэһиэ.
Национальнай бырайыактарга, өрөспүүбүлүкэ киин куоратын сайыннарарга туһуламмыт Ил Дархан ыйааҕар, Дьокуускай маастар-былааныгар тирэҕирэн, куораппытын сайыннарыахпыт», — диэтэ Дмитрий Садовников.
Саҥа баһылык биэс сыллаах үлэтин Туймаада туналыйар туоната, долгуйар дьоллоох Дьокуускай куорат 400 сыллаах дьоһун үбүлүөйүн үрдүк таһымҥа көрсөргө, устуоруйаҕа киллэрэргэ аныырын туһунан эттэ.
Хаартыска ЯСИА.
-
0
-
0
-
0
-
0
-
0
-
0
