Хас биирдии киһи туохха дьоҕурдааҕынан, тугу сөбүлүүрүнэн, дууһата ханна тардыһарынан идэтин талар. Аныгы олоххо талан ылбыт идэҕинэн төһө хамнаһы төлүүллэрин эрдэттэн интэриэһиргиир ордук, кэлин кыра хамнастаахпын, идэбин сыыһа талбыппын диэн кэмсинэ олорбот курдук.
Холобур, ХИФУ Автодорожнай бакылтыатыгар массыына суолун тутарга инженер-тутааччы үөрэҕэр түөрт сыл бакалавриакка үөрэнэн баран 100 тыһ. солк. хамнастаах үлэни булуохха сөп. Бу үөрэххэ киирэргэ БКЭ баала мантан итэҕэһэ суох буолуохтаах: математика 40 баал, физика 41 баал / информатика 46 баал, химия 40 баал, нуучча тыла 40 баал. Оттон бу хайысханан орто үөрэххэ киирэргэ ирдэбил кыра: мэхээньикэҕэ тургутук 40 баал, автодорожнай дьыалаҕа собеседование 40 баал, нуучча тылыгар тургутук 40 баал.
СӨ Массыына суолугар управление сүрүн инженера Юрий Рахматуллин бу үөрэҕи бүтэрэн баран тута идэбинэн үлэ булан үлэлии сылдьабын, Автодорожнай бакылтыакка наадалаах билиини барытын биэрбиттэрэ, Саха Сиригэр суол-иис тутуута тыын суолталаах диэн этэр. Суол-иис тутуутугар, чөлүгэр түһэриитигэр биэс сыл үөрэнэн үрдүк үөрэҕи бүтэрдэххэ, хамнас 120 000 солк.
Сир баайын көрдүүр геолог хамнаһа 120 000 – 300 000 солк., прикладной геология салаатыгар киирэргэ БКЭ түмүгүнэн математика – 40 баал, физика – 41 баал / информатика – 46 баал / география – 40 баал / химия - 40 баал, нуучча тыла – 40 баал буолуохтаах. Орто үөрэххэ киирэргэ уопсай геологияҕа тургутук – 40 баал, идэҕинэн информатика – 46 баал, нуучча тылын тургутуга – 40 баал.
ГТО туттарбыт оҕолорго 2-4 баал, оскуоланы туйгуннук бүтэрбит медалистарга 7 баал, волонтердар хамсааһыннарын кыттыылаахтарыгар 2-4 баал эбиллэр, успуорка ситиһии иһин 1-8 баал, байыаннай сулууспаны ааспыттарга 7 баал ааҕыллар, ити курдук уопсайа көхтөөх оҕолор 10 баалы эбии аахтарыахтарын сөп. Үөрэххэ киирэргэ ити быһаарыылаах буолар кыахтаах.
Ааптар хаартыскаҕа түһэриитэ.
-
0
-
0
-
0
-
0
-
0
-
0
