ХИФУ-га космофизикаттан, хараабылы тутууттан ураты манна араас идэҕэ үөрэтэллэр. Учууталлартан саҕалаан, стоматологтары, ньиэп-гаас үлэһиттэрин бэлэмнииллэр. Элбэх устудьуон инженер идэтигэр тиэхиньиичэскэй хайысханан үөрэнэр, электроэнергетика эмиэ ити салааҕа киирсэр. Устудьуоннар үөрэхтэрин таһынан, интэриэстэринэн көрөн эбии дьарыктаналлар, араас тэрээһиннэргэ, күрэхтэһиилэргэ кытталлар.
Үнүбүрсүөккэ 17 үөрэх кыһата, 3 филиал, 12 үнүстүүт, 5 балыктыат, 13 устудьуоннар уопсайдара, 1 Мэдиссиинэ килииникэтэ, юридическай, инфраструктурнай технология кэллиэһэ уонна «Сэргэлээх уоттара» култуура киинэ баар. ХИФУ-га дойду 58 эрэгийиэниттэн 19 000 тахса устудьуон, 38 омук сириттэн 800-тэн тахса устудьуон үөрэнэр. Үөрэх кыһатыгар 4120 бүддьүөт миэстэтэ көрүллүбүт. Мииринэйдээҕи уонна Нерюнгритааҕы салаа таһынан Чукоткаҕа, Анадырьга филиал эмиэ баар.
Бүддьүөт миэстэтигэр киирбэтэх оҕолор тус сыаллаах үөрэххэ судаарыстыба порталын нөҥүө сайабылыанньаларын ыыталлар. Үөрэх кыһатын саайтыгар абитуриеннар БКЭ калькуляторыгар баалларын суруйаллар, оччоҕуна ханна киириэхтэрин сөбүн суоттаан таһаарар.
РФ Үөрэххэ уона Үлэҕэ министиэристибэтин «Работа в России» кыттыгас платформатын нөҥүө тус сыаллаах кубуотанан үөрэххэ эмиэ киириэххэ син. Маннык хайысханан үөрэммит дьон үөрэхтэрин бүтэрдэхтэринэ дойду хайа баҕарар куоратыгар үлэһит тиийбэт сиригэр үлэнэн хааччыллаллар. Тус сыаллаах дуогабар быһыытынан устудьуоннар сыһыарыллыбыт тэрилтэлэригэр быраактыкаларын бараллар, үөрэхтэрин бүтэрдэхтэринэ онно үлэлии тиийэллэр. Онон ханна үлэлии барабын диэн үлэ көрдөөн түбүгүрбэттэр.
Орто үөрэх кэнниттэн үрдүк үөрэххэ киирэр дьон эмиэ бааллар. Ону таһынан, хас биирдии үөрэх кыһатыгар төлөбүрдээх үөрэх миэстэтигэр ылаллар.
Ааптар хаартыскаҕа түһэриитэ.
-
0
-
0
-
0
-
0
-
0
-
0
