Павел Пинигин кыһыл көмүс мэтээли ылары ситиспитэ, 1972 сыллааҕы Мюнхеннааҕы олимпиада чөмпүйүөнэ Роман Дмитриев уонна Александр Иванов үрүҥ көмүс мэтээли ыланнар саха норуотун аатырдыбыттара. ССРС сүүмэрдэммит хамаандатыгар киирбит 10 тустууктан үһэ саха тустуутун оскуолатын иитиллээччилэрэ буолбуттара туһугар эмиэ ураты ситиһиинэн билиниллэр. Улуу тириэньэр Дмитрий Петрович Коркин үс үөрэнээччитэ олимпиадаҕа итинник өрөгөйдөөх кыайыыны ситиспиттэрэ эдэр ыччакка кынат тэҥэ буолбута.
Өрөгөй миитинэ
От ыйын 31 күнүгэр «Өрөгөй» успуорт уораҕайын иннигэр саха тустууктара Монреаллааҕы Олимпиадаҕа кыайыыларын 50 сылыгар анаммыт үөрүүлээх миитин ыытылынна. 1976 сыллаахха Саха сирэ аан дойдуга аатын дуораппыта — Павел Пинигин сүрүн турнир кыһыл көмүс мэтээлин аҕалбыта, Роман Дмитриев уонна Александр Иванов үрүҥ көмүс наҕараадаларынан бэлиэтэммиттэрэ диэн https://sakha-sire.ru/syryn/иһитиннэрэр.
Быйыл өрөспүүбүлүкэ саха тустууктара Олимпиадаҕа Өрөгөйдөрүн 50 сылын эрэ буолбакка, ССРС успуордун үтүөлээх маастара Александр Иванов 75 сааһын эмиэ бэлиэтиир. Саха сирин Ил Дархана Айсен Николаев дьаһалынан тэрээһиннэр былааннара ылыллыбыта, ол сыл устата олоххо киирэр.
«Быйылгы сылы тустууктарбыт улуу кыайыыларын 50 сылыгар аныахпыт. Роман Дмитриев 1972 сыллаахха олимпийскай кыһыл көмүһү ылбыта, ол кэмтэн саха көҥүл тустуутун ситиһиилэрэ саҕаламмыттара. Биллиилээх тириэньэр Дмитрий Коркины бу сылга биһиги, чуолаан, ахтабыт-саныыбыт, кини маннык ситиһиилэргэ тиийэргэ көмөлөспүтэ. Сыл устата Монреаллааҕы кыайыы 50 сыллаах үбүлүөйүн бэлиэтиэхпит. Оттон сүрүн тэрээһин Дмитрий Коркин кэриэһигэр норуоттар икки ардыларынааҕы турнир кэмигэр буолуоҕа», — диэн СӨ Физкултуураҕа уонна успуорка миниистирин бастакы солбуйааччыта Гаврил Мохначевскай бэлиэтээтэ.
Кини бу күннэргэ Москубаҕа көҥүл тустууга Арассыыйа чөмпүйэнээтэ ыытылла турарыгар болҕомтону тарта. Саха сирин сүүмэрдэммит хамаандатын тустууктара бэйэлэрин дьоһуннук көрдөрүөхтэрэ диэн эрэлин биллэрдэ. Кинилэри күрэхтэһии буолар сиригэр олимпийскай чөмпүйүөн Павел Пинигин өйүүр.
«Мин оччолорго, 1976 сыллаахха, маннык ситиһиилэммиппинэн киэн туттабын. Доҕотторбор Роман Дмитриевка, Павел Пинигиҥҥэ, убаастыыр тириэньэрбитигэр Дмитрий Коркиҥҥа махтанабын. Саха сиригэр олимпийскай мэтээл кэлэр күнэ өссө да үүнүө диэн эрэнэбин. Сахалар — олус талааннаах норуот. Мэдиссиинэ, успуорт, култуура, бырамыысыланнас эйгэтигэр улахан ситиһиилээх дьон бааллар. Биһиги мэтээллэниэхпит, көҥүл тустууга эрэ буолбакка, успуорт атын көрүҥнэригэр эмиэ кыайыахпыт», — диэн Олимпиада оонньууларын үрүҥ көмүс призера Александр Иванов эттэ.
Миитиҥҥэ кыттыбыт дьон САССР, ССРС уонна РСФСР Үтүөлээх тириэньэрэ Дмитрий Коркин, Мюнхеннааҕы Олимпиада оонньууларын кыайыылааҕа Роман Дмитриев кэриэстэригэр пааматынньыкка сибэкки дьөрбөтүн уурдулар.
Хаартыскалар: Улусмедиа, Дьулустаан Сергеев/ ЯСИА https://sakha-sire.ru/syryn/
-
0
-
0
-
0
-
0
-
0
-
0
