Росавиация саайтыгар тахсыбыт испииһэккэ Дьокуускай субсидияҕа хабыллыбатах төрүөтэ – бүддьүөт эбэһээтилистибэтигэр лимииттэрэ, атыннык эттэххэ, үптэрэ-харчылара тиийбэтэх. Дьиҥэр, Дьокуускайыҥ диэн Арассыыйа Федерациятын саамай улахан иэннээх субъегын киин куората буоллаҕа эбээт. Манна 323 тыһыынчаттан тахса киһи олорор. Аны туран, улуустар үксүлэрэ соҕуруу Дьокуускай аэропордуттан көтөллөр.
Онон билигин да субсидиялаах билиэт иһин туруулаһабыт. Ол курдук, бу саас Ил Түмэн “Биир ньыгыл Арассыыйа” фракцията, Антонина Григорьева салалтатынан, бу дьыл кулун тутар 11 күнүгэр баартыйа Генеральнай сэбиэтин сэкирэтээригэр, Федеральнай Мунньах Федерацияҕа Сэбиэтин Бэрэссэдээтэлэ Андрей Турчак аатыгар, авиа-билиэт субсидиятыгар эбии харчы көрөллөрүгэр көрдөһөн, сурук суруйбуттара.
Сурукка сүрүн тирэх оҥостубут докумуоннара – РФ Бырабыыталыстыбата 2018 сыл кулун тутар 2 күнүгэр 215-с №-дээх «Об утверждении Правил предоставления субсидий из федерального бюджета организациям воздушного транспорта в целях обеспечения доступности воздушных перевозок населению и о признании утратившими силу некоторых актов Правительства Российской Федерации» уурааҕар киирбит уларыйыылар. Ити уларыйыылар, сүрүннээн, Уһук Илик түөлбэтигэр салгын тырааныспарынан көтүү нэһилиэнньэҕэ табыгастаах буоларыгар туһаайыллыбыттара. 2021 сыл тохсунньу 16 күнүгэр буолбут Госсовет уонна Стратегическай сайдыыга уонна национальнай бырайыактарга сэбиэт мунньаҕар РФ Бэрэсидьиэнэ толоро охсоллоругар сорудахтаабыта.
Госдума тырааныспарга уонна тутууга кэмитиэтэ кэмитиэтэ биһиги дьокутааттарбыт ыыппыт суруктарын муус устар 5 күнүгэр РФ Тырааныспарга министиэристибэтигэр ыыппыта. Онуоха федеральнай министиэристибэ “Дьокуускай–Москва-Дьокуускай” уонна “Дьокуускай–Санкт-Петербург–Дьокуускай” хайысхалары субсидиялыырга эбии ассигнование көрүллэрэ оруннааҕын бэлиэтээбитэ.Ол кэнниттэн субсидиялааһын салгыы тэрийэр туһунан мунньах РФ Бырабыыталыстыбатын I солбуйааччыта Андрей Белоусовка буолбута. Онно бу сурук бэбиэскэҕэ туран, 2,5 млрд солк. үп эбии көрүллэрин, “Дьокуускай – Москва – Дьокуускай” уонна “Дьокуускай – Санкт-Петербург – Дьокуускай” хайысхалар субсидияланалларын ситиһэргэ соруммуттара. Мунньах боротокуолугар олоҕуран, ити этиини РФ Бырабыыталыстыбатын көрүүтүгэр киллэрбиттэрэ.
Онон РФ Тырааныспарга министиэристибэтин кытта дойду Бырабыыталыстыбатын резервнэй пуондатыттан авиа-билиэттэри субсидиялыырга үп көрдүүбүт.. СӨ Экэниэмикэҕэ миниистирэ Майя Данилова: “Бары хайысханы хааччыйарга 5 млрд солк. тахса үп (ол иһигэр «Дьокуускай–Москва», «Дьокуускай–Санкт-Петербург» хайысхаларга 1 млрд солк.) ирдэнэр”, -- диир.
Сыһыаран эттэххэ, Саха сиригэр федеральнай бүддьүөттэн эрэгийиэннэр икки ардыларынааҕы уонна өрөспүүбүлүкэ бүддьүөтүттэн олохтоох социальнай суолталаах хайысхалары субсидиялааһын 4 бырагыраамата үлэлиир. Ити сыалга 2021 сылга 195 тыһ. тахса пассажиры анал тарыыбынан таһарга 1 774 мөл. солкуобай көрүллүбүтэ.
-
0
-
0
-
0
-
0
-
0
-
0
