Издательский дом Редакция Подписка
Погода в Якутске: . 1 oC

Олохтоох бэтэрээн кэрэ аҥаардарбыт «Талба» үҥкүү бөлөҕө кэтэхтэн ыытыллыбыт өрөспүүбүлүкэтээҕи «Үҥкүү этэр эдэр саас...» норуот үҥкүүтүн куонкуруһугар лауреат үрдүк аатын ылбыттар.

Олохтоох бэтэрээн кэрэ аҥаардарбыт «Талба» үҥкүү бөлөҕө кэтэхтэн ыытыллыбыт өрөспүүбүлүкэтээҕи «Үҥкүү этэр эдэр саас...» норуот үҥкүүтүн куонкуруһугар лауреат үрдүк аатын ылбыттар.

«Талбалар» үөрүүлэрэ итинэн эрэ муҥурдаммат: соһуччу сонунунан бу ситиһиилэрин иһин кинилэри тохсунньуга Москва куоракка ыытыллар норуотар икки ардыларынааҕы фестивальга – Кириэмил  Харыйатыгар  -- ыҥырыы туттулар.  Маннык үөрүүлээх, долгутуулаах сонуну этээри, өрөспүүбүлүкэтээҕи «Үҥкүү этэр эдэр саас...» куонкуруһун тэрийээччи Макаров Егор Семенович Чурапчы улууһун Сылаҥыттан “видеозвоногунан” эрийэ сырытта.

 Саха сириттэн кыттыы буоларын быһыытынан, барар наадатын тоһоҕолоон эттэ. Айанныырга араас сүбэлэри биэрдэ, фестиваль усулуобуйатын кэпсээтэ. Егор Семенович бэйэтэ «Күн Күбэйэ» диэн үҥкүү бөлөхтөөҕүн, араас куонкурустарга кытталларын, кыайыыларын, араас дойдуларынан гастроллуу, күрэхтэһэ айанныылларын туһунан сэһэргээтэ, тас дойдуларга кытта бара сылдьыбыттарын, онно түспүт хаартыскаларын көрдөрдө. Улахан ситиһиилэринэн үҥкүүһүттэри эҕэрдэлээтэ уонна салгыы да ситими быспакка сибээстэһэ олоруохха диэн түмүктэээтэ.

155 1

«Талба» бөлөх туһунан кэпсиир эбит буоллахха, бу бөлөх 2017 сыллаахха, Сомоҕолоһуу күнүн көрсө, нэһилиэк иһинэн ыытыллар үҥкүү күрэҕэр саастарынан кыттыы ирдэбилигэр сөп түбэһэр далбардар мустан, үҥкүү туруорбуттарыттан ыла  тэриллибитэ. Барыларын мунньан  түмэр салайааччы Данилова Пелагея Алексеевна, оттон үҥкүүлэри туруорар, үөрэтэр хореографтара -- Винокурова Ольга Михайловна.  Бөлөххө 8 буолан үҥкүүлүүллэр. Бары араас тэрилтэ үлэһиттэрэ, биэнсийэлээх эбэлэр. Иллэҥ кэмнэригэр иистэнэн, таҥастарын-саптарын бэйэлэрэ тиктэллэр, араас кэнсиэртэргэ, тэрээһиннэргэ кыттан, мааны таҥастаах ураты үҥкүүлэринэн олохтоохтору  сэргэхситэллэр.

Кинилэр тэриллибиттэриттэн түөрт сыл иһигэр ситиһиилэрэ да баһаам, ол курдук:

2018 с. бэтэрээннэр улуустааҕы спартакиадаларыгар үҥкүү күрэҕэр кыайан, Гран При үрдүк аатын ылбыттара. 2020 с. Сомоҕолоһуу күнүгэр аналлаах улуустааҕы кэтэхтэн үҥкүү күрэҕэр кыайбыттара уонна Кубогынан наҕараадаламмыттара.

IMG 20211018 WA0004

Билигин үҥкүүһүт эбэлэрбит ыраах Москва куоракка кэлэр-барар айан ороскуотун, тиийэн олохсуйалларыгар гостиница төлөбүрүн барытын бэйэлэриттэн хайдах уйуналларын толкуйдуу-тобула, куонкуруска Саха сирин аатын чиэстээхтик көмүскүүргэ саҥа үҥкүүнү бэлэмнээн, ох курдук оҥосто, санаалыын-оноолуун сааһылана, түбүгүрэ  сылдьаллар.

Манна диэн эттэххэ, арааһата, бу иннинэ улууска да итинник улахан аакка-суолга тиксэн, Кириэмил Харыйатыгар айаннаабыт суоҕа буолуо. Онон биир дойдулаахтарбытын, күндү ийэлэрбитин, эбэлэрбитин, эдьиийдэрбитин, дьүөгэлэрбитин, кэллиэгэлэрбитин ис дууһабытыттан үөрэн туран, ситиһиилэринэн өссө төгүл эҕэрдэлиибит. Эһиги кэнчээри ыччакка бастыҥ холобур буоларгытынан киэн туттабыт.

Изабелла Ноговицына

Орто Халыма,  Өлөөкө Күөл б.

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением