Эбэм барахсан Матрена Никитична Жиркова оскуолаҕа киирэр сылбар: “Мин оҕом “Бэлэм буол” хаһыакка суруйуо, суруксут буолуо”, -- диэн, ойуурга отоннуу сылдьан, айылҕа быыһыгар үссэнэ олорон, итинник этэн кэбиспитин илэ-бааччы өйдүүбүн.
“Бэлэм буол”-“Кэскил”, “Будь готов”-“Юность Севера” хаһыаттар — мин чугас доҕотторум этэ. Алын кылааска үөрэнэ сылдьан, кимҥэ да эппэккэ эрэ, суруйууларбын редакцияҕа буолбакка, типографияҕа ыытан куугунаппыттаахпын. Хомойуох иһин, үөрэммит оскуолаларбар эдэр кэрэспэдьиэннэр постара диэн ончу суоҕа. Инньэ гынан, испэр постар үлэлэрин хаһыаттан ааҕан ымсыырарым. Онон мин бастакы сэмэй суруйууларбын ийэм, омук тылын уонна төрүт култуура учуутала Людмила Лукинична, итиэннэ “Дьоҕур” общество көрбүтэ, болҕойбута. Оттон 1995 с. Өлүөнэ очуостарын таптыыр хаһыатым “Кэскил” көҕүлээбит айар куонкурустарыгар кыайан, өрөспүүбүлүкэ оҕолорун уонна таптаан ааҕар хаһыатым үлэһиттэрин кытта аан маҥнай көрбүтүм туохха тэҥнэһиэй?
Кинилэрдиин алтыспытым
Хаһыат үлэһиттэриттэн аан бастаан көрсүбүт, алтыспыт дьонум Николай Васильев, Анатолий Павлов-Дабыл, Евдокия Иринцеева. Хантан билиэм этэй, ол сэмэй көрсүһүүлэр миигин кэлин “Кэскил” кэрэ эйгэтигэр сирдиэхтэрин, кинилэри кытары чугастык алтыһан үлэлиэм диэн? Евдокия Семеновна, Александра Курилкина устудьуон эрдэхпинэ практикаларбын үчүгэйдик да салайбыттара. Оттон Николай Прокопьевичтыын, Анатолий Николаевичтыын букатын да биир кабинекка түбэһэн, уһуннук, эйэлээхтик, айымньылаахтык үлэлээбиппит. “Кэскилгэ” үлэлээн, Сахам сирин араас улуустарыгар дьикти дьылҕалаах дьону көрсүбүтүм, оҕолордуун бодоруспутум, Турцияҕа, Францияҕа “Кэнчээри” оҕо норуодунай, Россиятааҕы ансаамбылын эппиэттээх улахан тэрээһиннэргэ суруналыыс, тылбаасчыт, салайааччы быһыытынан арыаллаан сылдьыым, Кыргыстааҥҥа Чингиз Айтматов үбүлүөйүгэр анаммыт норуоттар икки ардыларынааҕы тэрээһиҥҥэ кыттыым, Москваҕа суруналыыстар Бүтүн Россиятааҕы XII сийиэстэригэр делегатынан талыллан тиийиим — чахчы үтүө, дьоһун түгэннэр.
Күн аайы “Кэскилгэ” сир түннүгэ дьоннуун көрсүбүтүм, алтыспытым, кэпсэппитим, кырдьык, күндү бэлэхтэр. “Задай вопрос первому Президенту”, “Эдэр политолог муннуга” курдук бырайыактарбын, “Зима начинается с Якутии” фестиваль чэрчитинэн Чысхаан уобараһын киэҥник сырдатыыга Өймөкөөн улууһун кытары бииргэ үлэлээбиппин, оҕо киинэтэ, медиа, IT хайысха сайдыытын тула көҕүлээбит кэпсэтиилэрбитин, “төгүрүк остуолларбытын” күндүтүк саныыбын.
Суруллубут—суоруллубат. Бииргэ үлэлээбит дьонум алгыс тылларын суруйан, анаан бэлэхтээбит кинигэлэрэ—күндү, көмүс өйдөбүнньүктэр. “Күндү Жанна! Мин Эйигиттэн элбэҕи эрэнэ күүтэбин. Буоларга-буолбакка ыһыллыма, ай, үлэлээ. Тус олоҕуҥ дьоллоох-соргулаах буолуохтун. Бары үтүө баҕарыыларбын аныыбын. Ыга кууһабын” диэбит күндүтүк саныыр киһим, ытыктабыллаах Нина Иннокентьевна Протопопова. Аҕа дьонум алгыстара миигин мэлдьи арыаллыыр, кынаттыыр.
Жанна Леонтьева,
СӨ Бэчээтин туйгуна, СӨ суруналыыстарын Сойууһун “Кыһыл көмүс бөрүө” бириэмийэлэрин 2018 с. лауреата, суруналыыстар “Уһун Дьурантаайы” айар куонкурустарын “Бастыҥ кэпсээччи” номинациятын 2020 с. кыайыылааҕа, “Саха-Азия оҕолоро” норуоттар икки ардыларынааҕы фонд суруналыыстыкаҕа лауреата.
-
7
-
0
-
0
-
0
-
0
-
0
