Издательский дом Редакция Подписка
Погода в Якутске: . -13 oC

 Приморскай кыраайга түспүт Хиннамнор диэн тайфун тыала-кууһа оннооҕор биһиэхэ билиннэ. Остуолбалар суулланнар, боруобаттар хатыйсаннар, саахал бөҕөтө таҕыста, дьон уота суох олоро сырытта.

 Приморскай кыраайга түспүт Хиннамнор диэн тайфун тыала-кууһа оннооҕор биһиэхэ билиннэ. Остуолбалар суулланнар, боруобаттар хатыйсаннар, саахал бөҕөтө таҕыста, дьон уота суох олоро сырытта.

Ол иһин бу күннэргэ наар уот айдаана буолла, араас социальнай ситимнэргэ энэргиэтиктэри кириитикэлээн суруйуу бөҕө. Дьиҥэр, биригээдэлэр утуйары умнаннар, түүннэри-күнүстэри сыралаһа сылдьаллар. Ол эрээри, кырдьыга да, күн бүгүнүгэр диэри сорох дьиэлэр уота суох олороллор эбит.

Чөлүгэр түһэрии үлэтэ

Балаҕан ыйын 8 күнүгэр сөкүүндэҕэ 20 миэтэрэ түргэннээх тыал түһэн, хоромньу бөҕөтүн таһаарда. Ол түмүгэр Дьокуускай куорат сорох оройуоннарыгар  уонна Ленскэйгэ уот бара сырытта. Нэһилиэнньэ улаханнык уолуйбакка, буолбут балаһыанньаны сөптөөхтүн ылыммытын бэлиэтиэхпит этэ.

СӨ ОДьКХ уонна энэргиэтикэҕэ миниистирин солбуйааччы Дмитрий Шувалов күн ахсын балаһыанньаны, үлэ хайдах баран иһэрин  билиһиннэрэ олорбута хайҕаллаах. Кини бүтэһик информацияларын ырытан көрдөххө, Киин электрическэй ситимнэр энэргиэтиктэрэ Дьокуускай куорат уонна аттынааҕы нэһилиэнньэлээх пууннарга түүннэри-күнүстэри үлэлээбиттэр. Саахал тахсаатын кытта, 13 биригээдэ чөлүгэр түһэриигэ тахсыбыт.

Уустук балаһыанньа үөскээтин кытта, Телеграмм мессенджергэ анал чаты үлэлэппиттэр. Манна уота суох хаалбыттар аадырыстарын, төлөпүөннэрин нүөмэрин суруйан хааллараллар, боппуруостарын биэрэн быһаартараллар. Хас биирдии сайаапка болҕомтоҕо ылыллар, диспетчердэргэ онлайн бэриллэр. Ол абыраллаах чакка https://t.me/yakutskenergo­_chat сыылканан киириэххэ сөп.

Тыал түспүт түүнүгэр РЭС Киин суһал диспетчерскэй сулууспатыгар 234 сайаапка аҥаардас Дьокуускай куорат олохтоохторуттан киирбит! Диспетчердэр 6-10 уонна 110Кв кыамталаах уот ситимнэригэр  16 технологическай кэһиилэр тахсыбыттарын бигэргэппиттэрэ. Бастатан туран, олохтоохторго кутталы суоһуур алдьаныылары туораппыттара. Маны тэҥэ социальнай эбийиэктэргэ уоту түргэнник холбообуттара.

Сэргэлээх, Хатыҥ Үрэх шосселарыгар, авиапорка, Маҕанныыр аартыкка энэргиэтиктэр барахсаттар түүннэри үлэлээбиттэрэ. Оттон Ленскэйгэ саахалтан уот барыыта балаҕан ыйын 9 күнүгэр буолбута. Куорат аҥаара бу күн уота суох хаалбыта. Электриктэр саахалы туоратыыга тутатына киирсибиттэрэ.

Чөлүгэр түһэрии үлэлэрэ тэтимнээхтик бара тураллар. Дьокуускай маҥнайгы уонна иккис ГРЭС-тэригэр, хата, технологическай кэһииллиилэр суохтар.

Балаҕан ыйын 12 күнүгэр 392 сайаапка киирбититтэн 345 туоратылынна, 48-гар улахан дьиэк баара билиннэ, онно үлэ бара турар. Энэргиэтиктэр биригээдэлэрэ элбээтэ, 52  киһи түбүгүрэр.

Чөлүгэр түһэрии үлэлэрэ Өрөспүүбүлүкэтээҕи балыыһа оройуонугар, Яков Потапов уулуссатыгар бараллар. Манна боруобаттар быстыбыттар, умайбыттар. Сэргэлээх шоссетын 4, 6, 7, 8, 9, 10 килэмиэтирдэригэр остуолбалары көннөрүү, алдьаныылары булуу үгэнэ.

 Манна даҕатан эттэххэ, саахалламмыт лииньийэлэр сүрүннээн абонентскайдар, ситимнээх тэрилтэ балаансатыгар турбаттар. Олохтоохтор бу лииньийэлэри бас билээччилэргэ эбэтэр табаарыстыбалар бэрэссэдээтэллэригэр тахсан, өрөмүөнү оҥорорго көҥүл ылыахтаахтарын миниистир солбуйааччыта эттэ. Ол да буоллар, киирбит хас биирдии сайаапка болҕомтоҕо ылылларын, диспетчердэр онлайн эрэсииминэн суукканы толору үлэлииллэрин  бэлиэтээтэ.

Үлэ күөстүү оргуйар. Балаҕан ыйын 13 күнүнээҕи туругунан үлэ түмүктүүр түһүмэҕэр киирдэ. Дьокуускай куорат олохтоохторуттан киирбит 510 сайаапка сабыллыбыт, 9 кэтэх дьиэҕэ электричество ситимин чөлүгэр түһэрии  хаалбыт. Элбэх кыбартыыралаах дьиэлэргэ уот баар буолла.

Билиҥҥитэ үлэ Маҕаҥҥа хаалбыт 4 кэһиллиигэ, Окружной шоссеҕа уонна өрүс эҥээрдээҕи СПТУ оройуонугар барар. 49 киһилээх 9 биригээдэ, 16 тиэхиньикэ ону туоратыыга үлэлиир.

Бэрэбиэркэлэр саҕаланнылар

“Якутскэнерго” генеральнай дириэктэрэ Алексей Стручков балаҕан ыйын 11 күнүгэр интэриниэт ситиминэн быһа эпииргэ тахсан, үөскээбит балаһыанньаны сырдаппыта.

Кини күүстээх тыал содулуттан Дьокуускайга эрэ буолбакка, чугас оройуоннарга электричество уота эмиэ бара сылдьыбытын, маныаха үлэһиттэр түүннэри-күнүстэри үлэлээбиттэрин кэпсээбитэ.

Дьокуускай куоракка күүстээх тыалтан хоромньу үксүн чааһынай секторга тахсыбыт. Ол курдук, киин куораппытыгар 30 остуолба сууллубут, маны тэҥэ 150-тан тахса ситим быстыбыт, боруобаттара хатыйсан умайбыт.

Ыксаллаах быһыы-майгы үөскүөҕүттэн Киин энэргиэтикэ ситимэ, Майаҕа, Покровскайга, Намҥа, Бэрдьигэстээххэ улуустааҕы  электрическэй ситимнэр үлэһиттэрэ күн бүгүнүгэр диэри үлэлии сылдьаллар.

Дириэктэр “Чөлүгэр түһэрии үлэлэрэ тоҕо уһаатылар?” диэн боппуруоска, бастатан туран, кутталы суоһуур, дьоҥҥо сэрэхтээх буолар саахаллары уочарата суох тутатына туораппыттарын быһаарда. Маны тэҥэ социальнай эбийиэктэргэ электричество уотун тардыы эмиэ маҥнайгы миэстэҕэ турбут.

Сорох дьон: “Тоҕо аҕыйах биригээдэ үлэлээтэ?” -- диэн ыйытар. Маныаха генеральнай дириэктэр Алексей Стручков иһитиннэрэринэн, бу тэриллибит биригээдэлэр түүннэри-күнүстэри үлэлиир эбээһинэстээхтэр. Онон ахсааннара сөп. Солбуйса сылдьаллар. Биир эрэ хайысхаҕа сылдьыбакка, энэргиэтикэ араас салаатын үлэһиттэрэ чөлүгэр түһэриигэ кыттыстылар. Дьокуускай куорат эрэ буолбакка, чугастааҕы улуустар үлэһиттэрэ көмөҕө эмиэ ыҥырыллыбыттар.

Уот ситимин остуолбалара охтууларыгар бэрэбиэркэлэр саҕаламмыттар, түмүктэр сотору кэминэн тахсыахтаахтар.

Кини бэлиэтииринэн, билиҥҥитэ “Якутскэнерго” хампаанньа Дьокуускай куорат уонна куорат таһынааҕы уокуруктарга 26 тыһыынча км усталаах, 220, 110, 35, 6-10 КВт кыамталаах уот ситимин, итини таһынан 0,4 Квт кыамталаах ситимнэри көрөллөр-истэллэр. Өрөмүөн уонна инвестиция  бырагыраамаларынан, үксүн үбүлээһинтэн тутулуктанан,  үрдүк күүрүүлээх лииньийэлэри хабан өрөмүөннүүллэр.

Охтубут 30 остуолбаттан үксэ 0,4 Квт кыамталаах ситимнэр эбит. Оруобуна өрөмүөҥҥэ үп көрүллүбэтэх остуолбалара. Улахан аҥаара куорат таһынааҕы уокуруктар, табаарыстыбалар киэннэрэ. Икки-үс сылтан бэттэх олору “Якутскэнерго” бэйэтин балаансатыгар кыралаан ылар эрээри, туруктара мөлтөх, үлэҕэ киириэхтэриттэн өрөмүөннэнэ, саҥардылла иликтэр. Сорохтор отой даҕаны хаһаайына суохтар. Билиҥҥи туругунан остуолбалар 60% эргэрбиттэр (изностаахтар).

Оттон биир сылга ортотунан 850 км усталаах, араас кыамталаах уот ситимэ өрөмүөннэнэр. Ол эбэтэр реновация маннык хаамыынан бардаҕына, 25 сылынан биирдэ барыта саҥардыллар. Оттон нуорма быһыытынан өрөмүөн 20 сылга биирдэ ыытыллара ирдэнэр. Бу түгэҥҥэ: “Дьолго, биһиэхэ улахан тыал аҕыйахта түһэр”, -- диирбитигэр тиийэбит. Ону да биир тыал хайдахтаах курдук хоромньуну таһаарда...

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
Лента новостей

Суоппар буолар уустугурда

Муус устар 1 күнүттэн байаҥкамаат бэбиэскэтиттэн куотунар дьону тырааныспары ыытар…
28.03.24 17:19
Лента новостей

Интерактивнай быыстапка

«Арассыыйа – Мин устуоруйам» мультимедийнай устуоруйа пааркатыгар кулун тутар 20 күнүттэн…
28.03.24 16:23