Издательский дом Редакция Подписка
Погода в Якутске: . -14 oC

Саха Өрөспүүбүлүкэтин үөрэҕириитин эйгэтигэр быйылгы 2022 сыл Ааҕыы сылынан биллэриллибитэ.

Саха Өрөспүүбүлүкэтин үөрэҕириитин эйгэтигэр быйылгы 2022 сыл Ааҕыы сылынан биллэриллибитэ.

Онон бу сыл устата, чопчулаатахха, олунньу 14 күнүттэн ахсынньы 26 күнүгэр диэри Сунтаарбыт улууһун бары нэһилиэктэрин үөрэх тэрилтэлэринэн «Ааҕыы түһүлгэтин чорооно» диэн эстафета ыытылла турар.

чороону кытта1

Бу «Ааҕыы түһүлгэтин чорооно» -- Арыылаах нэһилиэгин Л.А. Попов аатынан агро хайысхалаах оскуолатын көҕүлээһинэ. Улуус бастыҥ бырайыагын быһыытынан биһирэннэ. Чорооно да көннөрү чороон буолбатах: Сунтаар улууһун бастакы норуодунай суруйааччыта, киэн туттар киһибит Леонид Поповка Сиэйэ олохтоохторо 1983 сыллаахха туттарбыт бэлэхтэрэ.

Оскуолабыт учуутала Ираида Михайловна Герасимова ол кэм үөрүүлээх түгэнин туоһута буолан, оҕо сааһын кэрэ өйдөбүлүн -- улуу суруйааччыны кытта алтыһыытын  ахтан-санаан, барыбытын долгутта.

Дьэ, ол бэртээхэй бэлэх билигин ааҕыыны көҕүлээн, биһиэхэ, Күүкэйбит оскуолатыгар, күөрэччи тутуллан, айхаллана ыалдьыттаан ааста.

хоһоон кыралар

 Тэрээһиммит сүрүн сыала -- билии биир ыллыга ааҕыынан салалларын-салҕанарын, ол ситиһиигэ тиэрдэрин кэнчээри ыччакка өйдөтүү. Иккиһинэн, СӨ норуодунай суруйааччыта Л.А. Попов  аатын үйэтитии.

Нэһилиэкпит баһылыга Юрий Семенович Прокопьев истиҥ эҕэрдэтинэн Ааҕыы чороонун күннэрэ Күүкэйгэ саҕаламмыттара.

хоһоон1

Бэлиэ күн илдьитин ыаллыы олорор Кутана нэһилиэгин А.А.Иванов-Күндэ аатынан оскуолата аҕалан туттарда. Кутана оскуолата өрүү үөрүүбүтүн-ситиһиибитин бииргэ үллэстэр, үгүс үөрэнээччибитин үөрэх-үлэ сырдык суолунан көччөх гынан көтүтүһэр кыһабыт буолар.   

 Кэлбит дэлэгээссийэни билиһиннэрэр буоллахха, бибилэтиэкэр, СӨ үөрэҕириитин үтүөлээх үлэһитэ Изабелла Николаевна Третьякова -- салайааччы, саха тылын учуутала Елена Евгеньевна Архангельская, оҕо тэрилтэтин лиидэрэ Валентин Готовцев.

Кутана оскуолата туттарар

Кинилэр Леонид Попов туһунан дириҥ ис хоһоонноохтук кэпсээн туран, чороону оскуолабыт дириэктэрэ Егор Иванович Алексеевка туттардылар. Егор Иванович харда тылыгар сыл дьоһун тэрээһинигэр кыттыһарбытыттан үөрэрин биллэрдэ, бары көхтөөх буоларбытыгар ыҥырда.

Маннык бэлиэ тэрээһиҥҥэ сөп түбэһиннэрэн, филологическай наука дуоктара, профессор Василий Васильевич Илларионов ыыппыт бэлэҕин – Үөһээ Бүлүүгэ ыытыллыбыт Олоҥхо ыһыаҕын сабыс-саҥа кинигэлэрин -- Учууталлар учууталлара Мария Васильевна Николаева үөрүүлээх быһыыга-майгыга туттарда уонна көҥүл ааҕыы күннэригэр олоҥхо түһүлгэтигэр тоҕуоруһарга ыҥырда.

ВВИлларионов бэлэҕин тутта

Ааҕыы эйгэтин күн аайы көҕүлүүр олохтоох бибилэтиэкэ сэбиэдиссэйэ Нюргуяна Прокопьевна Львова эҕэрдэ тылын ааҕааччыларыгар анаата.

 Ааҕыы чороонун көрсүһүү үөрүүлээх чааһа ырыанан, хоһоонунан ситэриллэн, “Ааҕар киһи билиилээх, билиилээх киһи ситиһиилээх, ситиһиилээх киһи кэскиллээх”!  диэн тосхолунан түмүктэннэ.  

Попов ырыата                      

Ааҕыы чорооно ыалдьыттыыр күннэригэр киэҥ ис хоһоонноох үлэлэр тиһигин быспакка ыытылыннылар.

Ол курдук, Күүкэй оскуолатын бэтэрээн учуутала, норуот үөрэҕириитин туйгуна Михаил Александрович Федоровка аналлаах “Ураты тыыннаах учуутал...” диэн кини оҥоһуу кинигэлэрин быыстапката турда.

 “Худуоһунньуктар -- улуу поэттар” диэн мээнэҕэ эппэттэр. СѲ норуодунай суруйааччыта Л.А. Попов айымньыларын уруһуйунан дьүһүйүү ыытыллыбыта. Манна ийэ оҕотун кытта кыттан, айымньылаах үлэлэрэ тиһиллэн, альбом оҥоһуллан, Арыылаах оскуолатын мусуойугар бэлэхтэннэ. Бу тэрээһини уруһуйга уһуйар эдэр учуутал Олег Григорьевич Васильев көҕүлээбитэ хайҕаллаах.

 Ааҕыы чорооно “Биһик” дьыссаат кырачааннарыгар ыалдьыттаата. Эбэлэр “Таал-Таал эмээхсин” остуоруйаны сиэннэригэр аудио ньыманан ааҕан иһитиннэрдилэр. Иитээччилэр Л.А. Попов “Куобахчаанын” дорҕоонноохтук ааҕан, кинигэ алыбыгар киллэрдилэр.

Ааҕыы эстафетатын биир сүрүн сыалынан биир дойдулаахтарбыт айымньыларын үүнэр ыччакка билиһиннэрии этэ. Күүкэйтэн төрүттээх Андрей Илларионович Егоров-Чокуур төрөөбүтэ 100 сылынан "Айар дьулуур абылаҥа" диэн тэрээһин буолла. Онно “Иэйии абылаҥа” литературнай түмсүү чилиэннэрэ ыалдьыттаатылар.

Айар дьулуур абылаҥа уопсай түһүү

Сунтаар улууһун “Ньургуһун” түмсүүтүн Кутанатааҕы бөлөҕүн суруйааччы Валентина Григорьевна Дьячковская салайан аҕала сырытта.

Оҕо сааһы көччүтэр тускунан, алын сүһүөх үөрэнээччилэригэр “Пройди путь к сокровищу” диэн литературнай-спортивнай оонньуу тэрилиннэ. Аахпыт кинигэлэринэн ыйытыктары, 10 эриирдээх-мускуурдаах моһолу туораан, билии кылаата кинигэ буоларын быһаардылар, оннук тускуллаах түмүккэ кэллилэр.

лит спортив игра

Ханнык баҕарар литература аан бастаан хоһоонунан айыллар. Онон ааҕыы абылаҥар абылатыы литературнай киэһэлэртэн саҕаланар. “Поэзии чарущие строки”, “Поэзия -- музыка слов” курдук иэйиилээх киэһэлэр кэрэ өйдөбүлү хааллардылар.

лит вечер 11 кл

Сунтаар улууһун Л.А. Попов аатынан оройуоннааҕы модельнай бибилэтиэкэтэ бэлэмнээбит видео-матырйаалын туһанаммыт, Л.А. Попов олоҕун, айар үлэтин сырдаттыбыт. 

Норуодунай поэт патриотическай хоһооннорунан “Учуутал уонна үөрэнээччи” диэн доҕоонноохтук ааҕыы сүргэни көтөхтө. Оҕолор Самуил Маршак “12 ый” остуоруйатын инсценировкалаан көрдөрбүттэрэ биһирэбили ылла. Ылбаҕайдык нууччалыы саҥаран, оруолларын таба биэрдилэр, саҥа талааннар арылыннылар.

12 месяцев

Ааҕыы чорооно ыалдьыттыыр күннэригэр кэнники кэмҥэ кинигэни аҕыйахта иилиитигэр ылбыт айымньыны ааҕан сайынна. Билии төрдө суруллубукка кистэнэрэ, ол сэһэнэ-сэппэнэ бастыҥ сүбэһит буолара, кинигэ чугас доҕор тэҥэ сэргэхситэрэ, кэрэ эйгэҕэ сирдиирэ өссө төгүл чиҥэтилиннэ.

Көхтөөх кыттааччылар хайҕал суруктары туттулар. Оттон бу күннэр күүрээннэригэр сөп түбэһиннэрэн, айар куттаах хоһоонньут Луиза Прокопьева-Сыккыс Л.А. Поповка анабылын уонна поэт айымньытын нууччалыы тылбаастаабытын ааҕааччыларга иһитиннэрдэ.

  Тэрээһиннэри “Кустук” пресс-киин иитиллээччилэрэ сурукка тиһэн, анал хаһыат таһаардылар.

Ааҕыы чороонун эстафетата салгыы киэҥ билии сыаннастарын кууһан олорор Толоон нэһилиэгин оскуола-саадыгар туттарылынна.

Толоон эстафетаны тутта

Ксения Саввинова,

 А.К.Акимов аатынан оскуолатын бибилэтиэкэрэ,

Күүкэй, Сунтаар.

  • 2
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением