Сэтинньи 3 күнүгэр Маҕараска "Аартык" дьоҕус паарка аһыллыытын үөрүүлээх тэрээһинэ буолан ааста.
Сэтинньи 3 күнүгэр Маҕараска "Аартык" дьоҕус паарка аһыллыытын үөрүүлээх тэрээһинэ буолан ааста.
Сэлиэнньэ көстүүлээх сиригэр бэрт тупсаҕай, уоттаах-күөстээх, аныгылыы паарка иһигэр номнуо оҕолор үөрбүт-көппүт саҥалара сэлиэнньэ олоҕун сэргэхситэр. Төһө да кыһыммыт бэйэтин оннугар киирэн, тымныы салгынынан хаарыйдар, паарка арыллыытыгар олохтоохтор хото кэлбиттэринэн сылыктаатахха, бу тэрээһини долгуйа кэтэспиттэрэ тута харахха быраҕылларга дылы.
Алгыс Стручков, "Горнай улууһа" МО баһылыгын э.т.:
- Дьон-сэргэ, оҕо-аймах сынньанар сирдэрин тыа сиригэр хото тутуллуутугар өрөспүүбүлүкэбит салалтата болҕомтону күүскэ уурар диэн бэлиэтиэххэ наада. Ол курдук, "Уһук Илиҥҥэ 1000 тиэргэн" бырагыраама нөҥүө, ааспыт сылга, 1,5 млрд солк. үп көрүллэн, өрөспүүбүлүкэбит бары улуустарын хабан туран, киэҥ хабааннаах үлэ ыытылла турар. Чуолаан эттэххэ, улууспут киинигэр "Старый Бердигестях" бырайыак чэрчитинэн Октябрьскай уулусса тупсарыллыбыта уонна Маҕараска бүгүн дьоҕус паарка оҥоһуллан үлэҕэ киирдэ. Салгыы бу бырагыраама өссө киэҥ хабааннаахтык үлэлииригэр эрэнэбит. Бу сылга уларыйыы киирэн, 500-тэн тахса нэһилиэнньэлээх нэһилиэктэр куонкуруска кыттар кыаҕы ыллылар. Улууспут нэһилиэктэрэ бу ыйга ыытыллыахтаах куонкурустарга сайаапкаларын биэрдилэр. Баҕа санаабыт - кэлэр сылга тыа сиригэр саҥа дьоҕус пааркалар, искибиэрдэр дьэндэйиэхтэрэ. Сүрүнэ диэн олохтоохтор бырайыактарга быһаччы кыттыһаллар. Холобур, оҥоһуллуохтаах сынньалаҥ сирдэр миэстэлэрин аныырга, паарка хайдах көрүҥнээх буолуутун дьүүллэһиитэ сөптөөхтүк нэһилиэнньэ санаатын табан, биир санаанан салайтаран, өссө күүскэ үлэлииргэ көҕүлүүр.
Владимир Текеянов, "Одуну нэһилиэгэ" МТ баһылыга:
- "Уһук Илиҥҥэ 1000 тиэргэн" федеральнай бырагыраама куонкуруһугар кыттан, кыайыылаахтар кэккэлэригэр киирэммит, "Аартык" дьоҕус пааркабыт бүгүн үөрүүлээх аһыллыыта буолла. Паарка тутуутугар бырайыак ааптара Айталина Брызгалова ("Nomado" архитектурнай бюро салайааччыта), бэдэрээччит В.А.Оконосов ("Охоноос" ХЭТ) үлэлэстилэр. Бу паарка сэлиэнньэ киинигэр турар. Оҕо-уруу, эдэриттэн эмэнигэр тиийэ сылдьан сынньаналларыгар олус табыгастаах. Бырайыак олоххо киириитигэр нэһилиэнньэбит аатыттан өрөспүүбүлүкэбит салалтатыгар махтанабыт. Инникитин дьон-сэргэ олоҕор, сынньалаҥын сөптөөхтүк атаарарыгар туһуламмыт бырайыактар тыа сиригэр элбиэхтэрэ диэн баҕа санаалаахпыт. Быйыл эбырайыакка кыттарга эмиэ сайаапка биэрдибит.
Анна Ноговицына, нэһилиэк олохтооҕо:
- Бүгүн биһиэхэ олус үөрүүлээх, суолталаах күн буолла. Сэлиэнньэбит килбэйэр киинигэр дьоҕус паарка тутуллан, үлэҕэ киирдэ. Олохтоох дьон, оҕолорбут, сиэннэрбит сынньаналларыгар туох да бэртээхэй, аныгылыы тутуу ыытылынна. Махтал тылларын тутааччыларга, нэһилиэкпит, улууспут, өрөспүүбүлүкэбит салалтатыгар "Аартык" түөлбэ уонна нэһилиэк олохтоохторун аатыттан тиэрдэбин. Инникитин маннык дьон-сэргэ кута-сүрэ тохтуур, сынньанар сирдэри көҕүлээн туттаран улууспутун, өрөспүүбүлүкэбит тас көстүүтүн тупсара сылдьын диэн алгыс тылбын аныыбын.