Кулун тутар 5 күнүгэр дьоллоох Дьокуускай куоракка киһи эрэ хараҕа манньыйар, санаата көтөҕүллэр мааны таҥастаах Далбар Хотуттан, Эр Бэртэрэ үтүө үгэскэ кубулуйбут сэлэлии хаамыылара буолла. Далааһыннаах тэрээһиҥҥэ киэҥ нэлэмэн өрөспүүбүлүкэбит араас муннугуттан 2000-тан тахса киһи кыттынна. Көрүөхтэн эриэккэс маастардар хаамыылара Орджоникидзе болуоссатыгар оһуохайынан түмүктэннэ.
Кулун тутар 4-6 күннэригэр Өксөкүлээх Өлөксөй аатынан Норуоттар доҕордоһууларын дьиэтигэр «Якутия мастеровая» XIV өрөспүүбүлүкэтээҕи айар быыстапка үлэлээтэ. Айар үлэ, норуот маастардарын оҥоһуктарын интэриэһиргээччилэр кэлэн билистилэр, көрдүлэр. Манна даҕатан эттэххэ, быыстапкаҕа 700-тэн тахса уран тарбахтаахтар үлэлэрэ турда. Кыттаачылар истэригэр уран-тарбахтаахтар түмсүүлэрэ, тэрилтэлэрэ, биирдилээн маастардар бааллар. Кинилэр 27 улуустан, Дьокуускай куораттан уонна Хатастан кэлбиттэр.
«Сылын ахсын кыттааччы ахсаан элбиирэ үөрдэр. Биһиги маастардарбыт, уран тарбахтаахтарбыт норуоппут үгэһин, култууратын эрэ харыстааһынынан дьарыктамматтар, кинилэр өссө тубуһуннаран, киэркэтэн иһэллэр. Быыстапкаҕа аҕам саастаахтары сэргэ эдэр көлүөнэ кыттар буолла. Уус-уран оҥоһуктары оҥоруу өрөспүүбүлкэбит салалтатынан, судаарыстыбаннан өйөнөр. Быйыл бэс ыйыгар иккис төгүлүн Норуот уус-уран оҥоһуктарын күнүн бэлиэтиэхпит”, - диэн култуура миниистирэ Афанасий Ноев быыстапка арыллыытыгар эттэ.
“Симэх” национальнай киин дириэктэрэ Яна Игнатьева: “2033 сылга диэри уус-уран оҥоһуктары оҥоруу судаарыстыбаннай өйөбүлүн Концепцията бигэргэммитэ. Маны тэҥэ, ааспыт 2023 сылга 7 маастар Ил Дархан гранын туппута. Бу биһиги маастардарбытыгар сайдалларыгар кыаҕы биэрэр”, - диэн толордо.
Быйылгы бырааһынньык өрөспүүбүлүкэ норуотун маастардарын, норуот айар талааннаахтарын, уус-уран оҥоһугунан дьарыктанар холбоһуктары, уопсастыбаннай түмсүүлэри, тэрилтэлэри, анал үөрэх кыһаларын уонна устудьуоннары түмтэ. Кинилэр инникитин даҕаны маннык тэрээһиннэргэ дьону-сэргэни сэргэхситэ турдуннар, саха омугун үйэлээх сүдү кистэлэҥнэрин, билиилэрин киэҥ араҥаҕа таһаардыннар.
Санатар буоллахха, Саха Сирин норуоттарын төрүт үгэстэрин сөргүтэр, үйэтитэр уонна сайыннарар сыаллаах, 2012 сыллаахха өрөспүүбүлүкэ баһылыгын ыйааҕынан Норуот маастарын күнэ төрүттэммитэ уонна кулун тутар 5 күнүгэр ыытыллар буолбута. Бырааһынньык күн быыстапка-дьаарбаҥкалар, кэнсиэртэр, маастар-кылаастар ыытыллаллар, сэлэлии хаамыы буолар. Быйылгы хаамыыга 2000-тан тахса киһи кытынна.
Тэрээһин кыттыылаахтарын кытары кэпсэтиилэри “Ил Түмэн” хаһыат аныгыскы нүөмэригэр ааҕаарыҥ.
Хаартыска: ааптар түһэриилэрэ.
-
0
-
0
-
0
-
0
-
0
-
0
