Эҕэрдэ тылларын урбаан, атыы-эргиэн уонна туризм миниистирэ Тимур Ханды, инновация, сыыппара сайдыытын уонна инфокоммуникационнай технология миниистирин солбуйааччы Александр Федотов тириэртилэр.
Тимур Ханды Дьокуускай куорат дизайн-куодугар толору эппиэттиир тутуу үлэҕэ киирбитинэн эҕэрдэлээтэ. Маннык киоскалар үгэскэ кубулуйбут сонуну киэҥник тарҕатар сириэстибэлэри өйүүллэрин эттэ. Сыыппара үйэтин кэмигэр туох буола турарын интэриниэт ситиминэн, араас саайтарынан, мессенжердарынан билиэххэ сөп, ол эрээри хаһыатынан, сурунаалынан тарҕанар сонуннар, ырытыылар дириҥ хорутуулаах буолалларын санатта. Маны тэҥэ орто, аҕам саастаахтар үгэс быһыытынан бэчээттэнэр хаһыаты, сурунаалы туохха даҕаны атастаспаттар, күүтүүлээх доҕор оҥостоллор диэн эттэ. “Азия оҕолоро” ооньуулар иннинэ куораты киэркэтэр киоскалар ахсааннара өссө даҕаны элбииригэр баҕа санаатын тириэртэ.
Александр Федотов эҕэрдэ тылларга кыттыһан туран, инновация минииистирин Василий Ефимов аатыттан “Горпечать” дириэктэригэр Саргылана Ефимоваҕа аадырыстаммыт эҕэрдэ суругу аахта. Кини эппитинэн, Дьокуускай куоракка бэчээттэнэр хаһыаттар, сурунааллар уопсай тиражтарыттан 50 бырыһыаннара киоскалар нөҥүө тарҕаналлар. Киоскалартан хаһыаты, сурунаалы тэҥэ араас туһалаах канцелярия малын-салын, оҕону сайыннарар оонньуурдары о.д.а. атыылаһыахха, сурутуу оҥорторуохха сөп.
Үөрүүлээх быһыыга-майгыга аһыыллыы кыһыл лиэнтэтин быһыы кэнниттэн, киоска иһигэр ыалдьыттары ыҥырдылар, арыылаах алаадьынан, саламаатынан күндүлээтилэр.
“Ил Түмэн” бэчээт дьиэтин генеральнай дириэктэрэ Мария Христофорова “Горпечать” дириэктэригэр Саргылана Жирковаҕа, үлэһиттэргэ эҕэрдэ тылын эттэ. Саҥа дизайн куодунан тутуллубут пресса киоската олохтоохторго ураты суолталааҕын ыйда.
“Горпечать” быйыл 10 сыллаах үбүлүөйдээх сыла. Бу кэм тухары араас ыарахаттар, үөрүүлээх түгэннэр элбэх этилэр. Саргылана Николаевна курдук хорсун санаалаах, үлэһиттэригэр үчүгэй сыһыаннаах, үлэтигэр ураты бэриниилээх киһи салайан кэллэ. Түгэнинэн туһанан, “Горпечать” үлэһиттэригэр махтанабын”, - диэн этэн туран Саргылана Жирковаҕа сибэкки дьөрбөтүн туттарда.
“Айар” кинигэ кыһатын кэммиэрчэскэй дириэктэрэ Сардаана Габышева “Горпечать” тэриллибит үбүлүөйдээх сылыгар саҥа, аныгы киоска арыллыбытынан эҕэрдэлээтэ.
“Биһиги “Горпечать” тэрилтэни кытары 10-ча сыл бииргэ үлэлэһэн кэллибит. Салгыы үлэлииргэ соторутааҕыта сөбүлэҥ түһэрсибиппит. Хампаанньа аатыттан наһаа үчүгэй көстүүлээх киоска арыллыбытынан үөрэн туран итиитик-истиҥник эҕэрдэлиибин. Саҥа оҥоһуулаах, куорат көстүүтүн киэргэтэр киоскалар, махталлаах ааҕааччылар, атыылаһааччылар ахсааннара элбии турдуннар”, - диэн эҕэрдэлээтэ.
-
3
-
0
-
0
-
0
-
0
-
0
