СӨ Ил Дарханын уонна Бырабыыталыстыбатын пресс-сулууспата иһитиннэрэринэн, Арассыыйа бөдөҥ эрэгийиэнэ атыы-эргиэн, экэнэмиичэскэй, инвестиционнай уонна туристическай кыахтарын эрэ буолбакка, култуурунай бырагырааманы эмиэ билиһиннэриэҕэ. Тэрээһиннэр Астана, Петропавловск, Алматы куораттарга ыытыллыахтара.
Биир бастакы тэрээһининэн «Саха сирин виртуозтара» кэнсиэр буолла. Кэнсиэр казах национальнай университетын саалатыгар Астана куоракка ыытылынна диэн “Саха Сирэ” СӨ Ил Дарханын уонна Бырабыыталыстыбатын пресс-сулууспатыгар сигэнэн суруйар.
Уус-уран кэлэктиип салайааччыларынан СӨ үтүөлээх артыыската, РФ ускуустубатын үтүөлээх диэйэтэлэ Лариса Габышева, РФ уонна СӨ ускуустубатын үтүөлээх диэйэтэлэ Станислав Афанасенко, концертмейстер, СӨ үтүөлээх артыыската Надежда Петрова буолаллар.
«Астанаҕа кыттарбыт улахан чиэс. Миигин Казахстааны кытта элбэх сибээстиир. Алматы куорат консерваториятын бүтэрэн баран, 50 сыл анараа өттүгэр Саха Сиригэр көспүтүм. Биһиги манна мэлдьи үөрэ-көтө кэлэбит. Саха сирин күннэрин чэрчитинэн балачча хабааннаах бырагыраамалаахпыт. Сольнай кэнсиэртэри оонньуубут уонна «Ньургун Боотур» опера оркестрын састаабыгар кыттабыт. Бастаан Астанаҕа, онтон Алматыга оонньуохпут. Артыыстар олус сэргэхтэр. Интэриэһинэй кэнсиэри күүтэбит», — диир уус-уран салайааччыта Станислав Афанасьев.
Скрипачтар судаарыстыбаннай ансамбыллара 17 муусукаҕа айымньылары билиһиннэрдилэр. Бырагыраамаҕа «Арлезианка» Доде Бизе драматынан Фарандола муусуката, Чайковскай мелодиялара, ««Свадьба Фигаро» операҕа Моцарт увертюрата, о.д.а. айымньылар киирдилэр. Улахан биһириини Кирилл Герасимов үҥкүүтэ ылла.
«Дьикти түгэн — биһиэхэ аан дойду таһымнаах скрипачтар ансамбыллара кытта кэллилэр. Бу казахстааннарга улахан бырааһынньык. Бу олус үөрүүлээх түгэн», — диэн Казахстаан Өрөспүүбүлүкэтин ускуустубатын үтүөлээх диэйэтэлэ, Казах национальнай университетын бэрэпиэссиэрэ Негметулла Каримов үллэһиннэ. Эмиэ итинник бырагыраама муус устар 21 күнүгэр Алматы куоракка Курмангазы аатынан Казах национальнай инструменнарын кэнсиэртиир саалатыгар ыытыллыаҕа.
«Мин Саха Сиригэр сылдьыбытым. «Скрипка Севера» аан дойдутааҕы куонкурус дьүүлүүр сүбэтин чилиэнинэн ыҥырыллыбытым. Оччолорго Муусукаҕа Үрдүкү оскуолата, муусукааннар, үөрэх тэрийиитэ олус үчүгэй өйдөбүллэри хаалбыттара. Биллэн турар, бүгүн сыанаҕа бу үлэ түмүгүн чахчы көрдүбүт. Бэрэпиэссэрдэр үлэлэрэ сүҥкэн. Тус бэйэм Лариса Габышеваны, Станислав Афанасенконы билэбин. Кинилэр бэртээхэй муусукааннар. Бырагыраама олус кэрэ. Уус-уран толоруу олус эмоциональнай уонна чаҕылхай. Кэнсиэри көрөммүн олус үөрэбин уонна астынным. Салгыы ситиһиилэри, үчүгэй кэнсиэртэри баҕарабын. Бырабыыталыстыбаҕа махтанабыт», — диэн Казах национальнай университетын бэрэпиэссэрэ Раиса Мусаходжаева санаатын эттэ.
«Саха сирин виртуозтара» — тоҕус аан дойдутааҕы куонкурус лауреата. 30 сыл устата судаарыстыбаннай ансамбыл 2500-тэн тахса кэнсиэри 30 дойдуга көрдөрбүтэ.
Маны тэҥэ, Казахстан национальнай түмэлигэр «Саха сирин күндү баайа» быыстапка аһыллыаҕа, онно түөрт салаанан уус идэтигэр, скульптуураҕа, сылгы иитиитигэр аналлаах уһулуччулаах экспонаттар туруохтара. Көрөөччүлэр Саха сирин хаартатыгар тахсыбыт ювелирнай уонна декоративнай-прикладной ускуустуба маастардарын, итиэннэ Саха Сирин баайын-дуолун кэлиэксийэлэриттэн минерологическай экспонаттарын кытта билсиэхтэрэ. Быыстапка муус устар 18 күнүттэн ыам ыйын 1 күнүгэр диэри ыытыллара былааннанар.
Чаҕылхай түгэнинэн «Ньургун Боотур» олоҥхо оператын Андрей Борисов туруоруутугар «Астана Балет» тыйаатырын сыанатыгар аан бастакытын көрдөрүөхтэрэ. «Ньургун Боотур» операны казах национальнай уонна балет тыйаатырдарыгар эмиэ көрдөрүөхтэрэ.
Маны сэргэ, Петропавловск, Алматы куораттарга саха киинэлэрин көрдөрүүлэрэ, Олоҥхо тыйаатырын «Кыыс Дэбилийэ испиктээги К. Куанышбаев аатынан казах муусука- драматическай тыйаатырын уонна М.Ю. Лермонтов аатынан нуучча тыйаатырын сыаналарыгар ыытыллыаҕа.
Астанаҕа саха норуодунай бэйиэтэ Наталья Харлампьева «Якутская стрела» кинигэтин билиһиннэриитэ буолуоҕа. Ону таһынан аан дойдутааҕы «төгүрүк остуолга» национальнай литэрэтиирэни сайыннарыы боппуруостарын дьүүллэһиэхтэрэ.
Санатан эттэххэ, Саха сирин Ил Дархана Айсен Николаев Казахстан Өрөспүүбүлүкэтин Бэрэсидьиэнэ Касым-Жомарт Токаевы кытта оробуочай көрсүһүүтүгэр 2023 сылга Астанаҕа бииргэ үлэлииргэ сөбүлэспиттэрэ уонна чуолаан, Казахстан Өрөспүүбүлүкэтигэр Саха Өрөспүүбүлүкэтин күннэрин тэрийиини.
"Саха Сирэ" саайтан.
Хаартыска: Андрей Сорокин, СИА
-
0
-
0
-
0
-
0
-
0
-
0
