Тэрээһиҥҥэ Ил Дархан Айсен Николаев, СӨ Бырабыыталыстыбатын Бэрэссэдээтэлин солбуйааччы Анатолий Семенов уонна креативнай индустрия эйгэтигэр биллэр дьон, итиэннэ эспиэртэр кыттыыны ыллылар.
Пленарнай сессия кыттыылаахтара олохтоох култуура куодугар олоҕуран аан дойдутааҕы брендэлэри оҥоруу, онуоха туох дьаһаллар уонна инфраструктура наадатын дьүүллэстилэр.
Ил Дархан Айсен Николаев Саха Өрөспүүбүлүкэтин күнүгэр, о.э. 2024 с. муус устар 27 күнүгэр таһаарбыт «Саха Өрөспүүбүлүкэтин креативнай экэниэмикэтин сайдыытын туһунан» ыйааҕын кэпсээтэ уонна: «Билигин эрэгийиэн креативнай индустриятыгар 48 000 киһи үлэлиир. 2030 сылга ити сыыппараны 70 тыһыынчаҕа диэри улаатыннарар былааннаахпыт. Аан дойду ырыынагар наадалаах бородуукталары оҥорон, бу сыалы ситиһэрбитигэр эрэллээхпин», - диэн эттэ.
«Биһиги олус талааннаах дьоннордоохпут. Ону ыччаттарбыт креативнай индустрия эйгэтигэр сөҕүмэр оҥоһуктары оҥороллоро туоһулуур. Дьоннорбут бэйэлэрин талааннарын көрдөрөллөрүгэр кыах биэриэх тустаахпыт. Бу норуоппут талаана олоҥхобутугар, үгэстэрбитигэр олоҕурар. Онон биһиги арҕаа дойдулары үтүктүбэккэбит, бэйэбит устуоруйабытын, олохпутун аныгылыы киэпкэ киллэрэн кэпсиэхтээхпит. Мин саныахпар, аан дойдуга биһиги омук быһыытынан уратыбыт олус интэриэһинэй. Ол иһин саха киинэтэ аан дойдуга тиийэ билиннэ. Маныаха бу эйгэҕэ үлэ миэстэтин таһаараммыт барыстаах урбааны оҥорор соруктаахпыт, - диэтэ СӨ Бырабыыталыстыбатын Бэрэссэдээтэлин солбуйааччы Анатолий Семенов уонна түмүгэр, - Мин оҕолорго графика дизайынын оскуолатын аһар баҕа санаалаахпын. Бу оскуолаҕа оҕолор 3-6 саастарыттан быластылыыны, туойу мэһийэннэр, онтон арыый да улааттахтарына муоһу кыһаннар, илиилэринэн тутан-хабан эттик сабардамын (объем) билэллэригэр үөрэтиэ этибит. Ону билэ иликтэринэ, о.э. тарбахтарын былчыҥа сайда илигинэ, оҕолору планшекка чугаһытымыахха наада. Тоҕо диэтэр, илиитин иминэн сабардамы билбит эрэ киһи 3-Д графиканы өйдүүр уонна сатыыр кыахтанар. Өскөтүн графика дизайынын оскуолатын астахпытына, Сахабыт Сиригэр бастыҥ креативнай экэниэмикэ баар буолуоҕа. Дьэ, бу манна көстөн кэлэр норуот илиинэн уус-уран оҥоһуга уонна креативнай индустрия сибээстэрэ. Бу туһугар норуот төрүт дьарыгын харыстыах уонна маастардар оскуолаларын арыйыах тустаахпыт», - диэн санаатын үллэһиннэ.
Бу күн кластер саалатыгар дьон тоҕуоруһа муһунна. Маныаха кэлбит дьонтон улахан аҥаара ыччат буолара, билиҥҥи кэмҥэ креативнай экэниэмикэ сайдыытын боппуруоһа тоҕоостооҕун туоһулуур.
Бу туһунан сиһилии «Ил Түмэн» парламент хаһыатын аныгыскы тахсыытыгар ааҕаарыҥ.
Антонина НЕУСТРОЕВА
Хаартыскалар Ил Дархан ТГ-ханаалыттан
-
0
-
0
-
0
-
0
-
0
-
0
