Общество

Сэтинньи 23 күнэ

Албын докумуону оҥорууга – 60 мөл. солк. ыстараап

Албын докумуоннары оҥорууга эппиэтинэс үрдээтэ. Ол курдук, миграцияҕа албын докумуоннары оҥорууга уонна ону атыылааһыҥҥа ыстараап 60 мөл. солк. диэри улаатта. Сымыйа докумуоннары, штамнары, бэчээттэри уонна былааҥкалары оҥорууга, туһаныыга, атын дьоҥҥо биэриигэ уонна атыылааһыҥҥа ыстараап 200 тыһ. солкуобайга диэри улаатта. Маннык быраабы кэһиини таһаарбыт мал-сал конфискацияланар.

Судаарыстыбаннай Дуума бэрэссэдээтэлэ Вячеслав Володин: “Тас дойду кырасданьыына Арассыыйаҕа киирбитин туһунан уведомлениены албын былааҥкаларарга оҥорорун тохтоторго көмө буолуо. Бу маннык дьайыы сокуоннайа суох миграцияны тэрийэр, дойду үрдүнэн саамай элбэх кэһиилээх”, – диэн этэн турар.

Тас дойдулар оҕо иитэ ылаллара хааччахтанна

Дьахтары уонна эр киһини уларытар эпэрээсийэ оҥорор тас дойдулар кыраасданнара Арассыыйаттан оҕо ииттэ ылаллара уонна эпиэкэлииллэрэ тохтуоҕа.  Маннык миэрэ кырачааннарга айылҕа биэрбитин уларытыыга куттал суоһатарыттан харыстыахтаах.

– Арҕаа дойдулар оҕоҕо сыһыаҥҥа бэлиитикэлэрэ охсуулаах. Европа уон дойдутугар – Австрияҕа, Эстонияҕа, Германияҕа, Исландияҕа, Италияҕа, Люксембурга, Мальтаҕа, Норвегияҕа, Словенияҕа, Швейцарияҕа — уолу кыыс, кыыһы уол оҥорорго сааһынан хааччахтааһын, туох даҕаны бобуу суох. Онтон аҕыс дойдуга сааһыгар хааччахтар олохтоммуттар. Ол курдук, Испанияҕа 12 саастарыттан, Бельгияҕа 16 саастарыттан, – диэн Вячеслав Володин бэлиэтээтэ.

Ахсынньы 1 күнэ

Ким төһөнү балыктыыра быһаарыллыа

Норуоттар икки ардыларынааҕы кубуота иһинэн балыктааһын нуормата бигэргэннэ. РФ Бырабыыталыстыбата норуоттар икки ардыларынааҕы дуогабардарга олохтоммут уу харамайдарын көрүҥнэригэр  уонна бултуурга анаммыт иэннэргэ уларытыы киллэрэр бырааптанна. Маннык миэрэ судаарыстыбалар икки ардыларынааҕы уорганнар быһаарыллара суох буоллаҕына ылыллыа. Саансыйалар усулуобуйаларыгар норуоттар икки ардыларынааҕы дуогабардар өр кэм баттаныллыбакка, быһаарыллыбакка турбуттарыттан үлэ ордук көдьүүстээх буолуоҕа.

Сибээс оператордарыгар эбии ирдэбиллэр

Интэриниэккэ киирэргэ кыаҕы биэрэр сибээс оператордарын лиссиэнсийэлэригэр ирдэбил уларыйда. Ол курдук, куттал суоһуурун бопсорго тиэхиньиичэскэй сириэстибэлэр трафигы ыытар схемалардаах буолаллара ирдэннэ. Ону тутуспатахтарына, оператордартан лиссиэнсийэ былдьаныан сөп.

Омуктар биометрияны туттарыахтара

Тас дойдулартан Арассыыйаҕа киирээччилэр биометрия туттарарыахтара. Билиҥҥитэ эспэрэмиэн Домодедово, Шереметьево, Внуково уонна Жуковскай авиапуортарыгар, маны тэҥэ Оренбург уобалаһын Маштаково массыыналары аһардар пуунугар олоххо киирдэ.

Эспэримиэн маҥнайгы түһүмэҕэ 2025 сыл бэс ыйын 30 күнүгэр диэри ыытыллыа, ол кэннэ иккис түһүмэх саҕаланыа. Ол чэрчитинэн, атын дойдулартан киирээччилэргэ кыраныыссаны аһардар пууннарга “сыыппара профиллара” диэннэр арыллыахтара. Тас дойду кыраасданнара процедураны бэйэлэрэ анал сыһыарыыга оҥоруохтарын сөп. Онно Арассыыйаҕа күүлэйдии киирэн эрэллэрин туһунан иһитиннэриэхтэрэ.

АБДь кыттыылаахтарыгар чэпчэтиилэр

Ахсынньы 1 күнүттэн байыаннай сулууспалаахтар ахсааннара 180 тыһыынча киһинэн улаатыа, уонна 1,5 мөл. киһиэхэ тэҥнэһиэ. Инньэ гынан, Арассыыйа аармыйатын састаабын ахсаана 2,4 мөлүйүөнү куоһарыа. Маны сэргэ, өйөбүл дьаһаллара кэҥииллэр. Ол курдук, иэскэ баайыллыбыт анал байыаннай дьайыы кыттыылаахтара исполнительнай хомууру төлүүртэн босхолонуохтара. Бу ирдэнэр суума, эбэтэр хамсаабат баай-дуол 7 %-ыгар тэҥнэһэр. Иэһи төлөөһүн туһунан инники тахсыбыт уураахтар көтүрүллүөхтэрэ.

2024 сыл ахсынньы 1 күнүтэн РФ сэбилэниилээх күүстэригэр байыаннай сулууспаҕа хантараак түһэрсибит анал байыаннай дьайыы кыттыылахтарыгар уонна кинилэр кэргэттэригэр 10 мөл. солк. диэри төлөнүллүбэтэх кирэдьииттэр сотуллуохтара.

Ахсынньы 4 күнэ

Оҕолонортон аккаастанарга ыҥырыыттан көмүскэнии

Эрэкэлээмэҕэ, киинэлэргэ, сонуннары киэҥник тарҕатар сириэстибэлэргэ, интэриниэт ситимигэр оҕолонууттан аккаастаныыны пропагандалааһын бобулунна. Маныаха билигин үлэлии турар алта сокуоҥҥа эбиилэр киирдилэр. Ыстараап суумата 5 мөл. солкуобайга диэри буолла.

– Бу биһиги кыраасданнарбытын көмүскүүргэ туһаланар сокуон. Бастатан туран, улаатан эрэр көлүөнэбитин араҥаччылыырга. Киһи быһыытынан киһи тирэҕирэригэр медиа эйгэ суолтата улахан, онно тахсар араас иһитиннэрииттэн көмүскэл баар буолуохтаах, -- диир Вячеслав Володин.

Массыына миэстэтин регистрациялааһын судургутуйда

Массыынаны парковкалааһыҥҥа уопсай бас билиигэ өлүүлээх киһи бэйэтин аатыгар массыына миэстэтин бас билиигэ ыларыгар атын бас билээччилэр сөбүлэҥнэрэ суох оҥорор бырааптанна. Бу процедураны судургутутар уонна бас билиини туттарга, бэйэ билиитинэн дьаһайарга кыах биэрэр.

Ахсынньы 10 күнэ

Эксээмэн ирдэбилэ кытаатта

Миграннартан эксээмэн тутууга уонна үөрэтиигэ тиксиһиннэрээччи  тэрилтэлэр кытталлара бобулунна. Нуучча тылын баһылыыр туһунан сэртипикээттэри анал кэрискэҕэ киирбит  судаарыстыбаннай тэрилтэлэр эрэ биэриэхтэрэ. Маныаха бырабыыталыстыба эксээмэн төлөбүрүн бигэргэтиэ.

– Биһиги сокуоннайа суох миграцияны утары охсуһабыт. Бу эйгэҕэ барыта арылхай буоларыгар быраабылалар олохтонуохтаахтар, бигэргэммит ирдэбиллэр туолуохтаахтар. Ол эксээмэн туттарыытыттан саҕаланыахтаах. Нуучча тылын билэҕин – эксээмэни туттараҕын, билбэккин – үөрэт. Биһиги дойдубутугар сокуоннары билэр, нуучча тылын билэр, үгэстэрбитин сиэрдээхтик тутуһар дьон кэлиэхтээх, – диэн Вячеслав Володин эттэ.

Ахсынньы 20 күнэ

Силиэстийэлиир изоляторга хаайыллыбыттар бырааптара кэҥиэ

Силиэстийэлиир изоляторга хаайыллыбыт буруйданааччы эбэтэр уорбаланааччы, маны тэҥэ туоһу, эбэтэр эмсэҕэлээччи быһыытынан холуобунай дьыалаҕа кыттааччылар кылгас, эбэтэр уһун болдьохтоох көрсүһүүлэригэр быраап олохтонно. Маннык чэпчэтиинэн туһаныы холуобунай дьыаланы тэрийбит сирэй эбэтэр уорган суругунан көҥүлүгэр олоҕуруо.

Бырамыысыланнай дизайн сайдыытыгар быраап олуктара

Сокуонунан “Бырамыысыланнай дизайн сиэктэрин тэрийии” диэн өйдөбүл киириэҕэ. Инжиринговай үлэлэри уонна өҥөлөрү тэрийэр тэрилтэлэр киириэхтэрэ. Бу хайысханан дьарыктанар тэрилтэлэри инникитин көҕүлээһиҥҥэ ананар, тэрилтэлэр анал кэрискэҕэ киириэхтэрэ.

Ахсынньы 30 күнэ

Нотариустарга эбии боломуочуйа

Нотариустар килийиэннэрин уонна кинилэр бэрэстэбиитэллэрин идентификациялыылларыгар эбии докумуоннары ирдиир бырааптаннылар. Бу терроризмы үбүлээһини утары охсуһуу сокуонугар олоҕурар. Маны тэҥэ, сэрэхтээх эпэрээссийэ дии санаатахтарына, нотариустар Росфинмониториҥҥа иһитиннэрии оҥорор эбээһинэстэниэхтэрэ.

Хаартыска: Судааарыстыбннай Дуума саайтыттан