Кини Аллараа уонна Орто Халыма уонна Үөһээ Бүлүү олохтоохторун кытары көрүстэ. Боппуруостар сүрүннээн баһаартан дьиэтэ-уота суох хаалбыт дьоҥҥо көмө, инбэлииттэргэ эбии өйөбүл, Анал байыаннай дьайыы кыттыылаахтара эмтэниини ааһалларыгар төлөбүрдэр туһунан киирдилэр.
Сенатор Ил Түмэн Сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкинныын көрүстэ. Оробуочай кэпсэтиигэ сокуону оҥорон таһаарыы боппуруостарын, парламеннар икки ардыларыгар сыһыаннары дьүүллэстилэр.
Өймөкөөн улууһун баһылыга Александр Оконешников үлэ чэрчитинэн ыытыллыбыт көрсүһүүгэ федеральнай нуорма аакталарыгар эбиилэри киллэрэр туһунан эттэ. Оччотугар муниципальнай тэриллиилэр “Зеленые платежи” счетунан канализация-ыраастыыр тутуулары бырайыактааһыҥҥа уонна тутарга эбии үбүлээһининэн туһаныахтарын сөп буолуо. Ол түмүгэр уу эбийиэктэригэр охсуу аччыаҕа, хаачыстыба тупсуоҕа, олорор пууннар санитарнай туруктарын таһыма үрдүөҕэ диэн бэлиэтээн эттэ.
Сахамин Миланович улуус баһылыгын этиитин өйүүрүн туһунан РФ Бырабыыталыстыбатын бэрэссэдээтэлин солбуйааччы Дмитрий Патрушев аатыгар сурук ыытта.
Маны сэргэ, “Биир Ньыгыл Арассыыйа” эрэгийиэннээҕи салаатын бырайыактыыр үлэтин, сокуон барылларын оҥорууга көҕүлээһиннэрин уонна быыбардар кыттыы туһунан салайааччылыын Надежда Селютинаны кытары сиһилии кэпсэттэ.
Эрэгийиэн нэдиэлэтэ Семен Кырбасовтыын көрсүһүүнэн түмүктэннэ. Семен Кырбасов аата Саха Сиригэр олохтоох салайыныы тэриллиитин кытары ыкса сибээстээх. Кини кулун тутар 8 күнүгэр 85 сааһын бэлиэтээтэ. Сахамин Миланович настаабынньыгын бэлиэ күнүнэн эҕэрдэлээтэ уонна үтүө үгэс быһыытынан билиҥҥи кэмҥэ олохтоох салайыныы уорганнарын боломуочуйаларын тула кэпсэттилэр.
Хаартыска: Сахамин Афанасьев телеграмм ханаалыттан
-
0
-
0
-
0
-
0
-
0
-
0
