Евдокия Ивановна Яковлева 1935 сыллаахха, кулун тутар 13 күнүгэр Чыамайыкы нэһилиэгэр күн сирин көрбүтэ. Кыра эрдэҕиттэн үлэҕэ эриллэн улааппыта. Төрөппүттэрэ колхуоска үлэлиир буоланнар, кинилэргэ күүс-көмө буолаллар. Быраатынаан сылгы сиэлиттэн колхуос сүөһүтүгэр диэн быа баайаллара. Онтон сэрии ыар сылларыгар Евдокия Ивановна оҕо саас диэни билбэтэҕэ. 1955 сыллаахха Амма орто оскуолатын бүтэрэн баран, Дьокуускайга педучилищаҕа үөрэнэ киирбитэ уонна ону ситиһиилээътик бүтэрэн бибилэтиэкэр буолбута. Ол идэтинэн Модутка үлэлээбитэ. Онтон Аммаҕа кэлэн бастаан промбкомбинакка, онтон 1964 сылтан ыла бочуоттаах сынньалаҥҥа тахсыар диэри потребкооперацияҕа бухгалтердаабыта. Сынньалаҥҥа да тахсан баран 1992 сылга диэри потребкооперация систиэмэтигэр түбүгүрбүтэ. Таһаарыылаах үлэтинэн Коммунистическай үлэ ударнига буолбута, “Сэбиэскэй потребкооперация туйгуна” бэлиэнэн, “1941-45 сылларга Аҕа дойду сэриитигэр килбиэннээх үлэтин иһин”, онтон атын үбүлүөйдээх мэтээллэринэн наҕараадаламмыта. Элбэх оҕо ийэтэ буолан “Медаль материнства” 1-кы уонна 2-с степеннэринэн бэлиэтэммитэ. Евдокия Ивановна үлэлиир сылларыгар уонна кэлин даҕаны улууһун хаһыатыгар элбэх ыстатыйаны суруйан, көхтөөх уопсастыбаннай кэрэспэдьиэн этэ. Кэргэнинээн Степан Федорович Яковлевтыын 22 сыл устата дьоллоохтук олорон, алта оҕоҕо күн сирин көрдөрбүттэрэ.
Евдокия Ивановнаны 90 үбүлүөйдээх сааһынан Амма улууһун баһылыгын социальнай боппуруостарга солбуйааччы Ньургуйаана Илларионова, Амма нэһилиэгин баһылыгын солбуйааччы Василий Дьяконов, Амматааҕы нэһилиэнньэ көмүскэллээх буолуутун биир кэлим киинин салайааччытын солбуйааччы Сахаяна Неустроева уонна Амма улууһун бэтэрээннэрин Сэбиэтин бэрэссэдээтэлэ Мария Захарова дьиэтигэр сылдьан истиҥник эҕэрдэлээтилэр. Киниэхэ СӨ ытык киһитэ диэн бэлиэни, Арассыыйа бэрэсидьиэнэ Владимир Путин уонна Ил Дархан Айсен Николаев Эҕэрдэ суруктарын туттардылар, сибэкки дьөрбөтүн бэлэхтээтилэр.
Ытыктабыллаах Евдокия Ивановнаны ытык сааһынан истиҥник иһирэхтик эҕэрдэлиибит уонна этэҥҥэ олорон Улуу Кыайыы 80 сыллаах үбүлүөйүн чугас дьоҥҥун кытта үөрэ-көтө көрсөргөр баҕарабыт.
“Амма олоҕо” хаһыат
-
0
-
0
-
0
-
0
-
0
-
0
