«Улууспутугар Улуу Кыайыы 80 сылын көрсөргө бэлэмнэниилэр бара тураллар.
Улуус киинигэр уонна нэһилиэктэргэ киэргэтии үлэтэ, ол эбэтэр пааматынньыктары сөргөхсүтүү, өрөмүөн, баннердары ыйааһын бара турар. Албан аат музейыгар нэһилиэктэрбит биир-биир быыстапкаларын аҕалан туруораллар.
Саамай сүрүммүт байыаннай парад. Хас биирдии колоннаҕа хамандыыры кытта 36 киһи киириэҕэ. Бүгүн бу колонналар бэлэмнэрин билсэр көрүү буолла. Хас биирдии колонна састаабын, таҥаһын-сабын көрдүбүт, хаамыыларыгар бэлэмнээтибит, чочуйдубут.
Ыам ыйын 8-9 күннэригэр ыытыллар дьаһаллар бигэргэнэн тураллар. Кэнсиэрдэр, испэктээкиллэр буолуохтара. Кыайыы Знамятын таһаарыыга үгэс быһыытынан С.А. Новгородов аатынан Чурапчы орто оскуолатын 1000 оҕолоох хора кыттыаҕа. Онтон парадка улуус киинин 4 оскуолатын оҕолоро бары 3 ырыаны ыллыахтара. 80 киһи Кыайыы вальсын үҥкүүлүөхтэрэ. 80 ыччат Чаачыгыйтан Көһөрүллүү пааматынньыгыттан 80 км сүүрэн кэлэн, Кыайыы Знамятын таһаарыы сиэригэр кыттыахтара. Манна барытыгар күүстээх бэлэмнэнии бара турар», — диэн улуус баһылыгын социальнай боппуруостарга солбуйааччы Мария Кронникова билиһиннэрдэ.
Елена Макаринская, Чурапчы.
-
0
-
0
-
0
-
0
-
0
-
0
