Общество

— биллэрин курдук, саа хаhаайына бэйэтин бас билэр уотунан эстэр сэбиргэлин (докумуоннаах саатын) олорор аадырыhыгар бары ирдэбиллэри тутуhан, туора дьон көрбөт сиригэр — тимир сиэйпэ иһигэр угуохтаах (харайыахтаах), ону тэҥэ саа уонна саа ботуруоннара тус-туспа харайыллыахтаахтар;

— булчут бултуур сиригэр ханнык баҕарар көрүҥнээх тырааныспарынан барарга сааны анал чехолга илдьэ сылдьыллыахтаах. Ону тэҥэ саа иитиитэ суох буолуохтаах, ботуруоннара сааттан туспа сылдьыахтаахтар. Өскөтүн, саа анал чехола суох, эбэтэр чехол иһигэр иитиилээх сылдьар түгэнигэр, туhааннаах киhи административнай эппиэтинэскэ тардыллар (ст. 20.12 КоАП РФ);

— өскөтүн, саа докумуонун (РОХа – разрешение на хранение и ношение оружия) көҥүлэ бүппүт түгэнигэр, булчут саатын бултуу илдьэ барара даҕаны, дьиэтигэр туруорара да көҥүллэммэт. Бэрэбиэркэ кэмигэр туhааннаах киhи административнай эппиэтинэскэ тардыллар уонна саата былдьанар (ст. 20.11, 20.8 КоАП РФ). Оннук түбэлтэ тахсыбатын туһугар, сааҕыт көҥүлэ бүтүөн иннинэ, хаhан баҕарар болдьоҕун уhатыыга сайабылыанньа (докумуон) биэрэргит булгуччулаах. Ол эрээри илдьэ сылдьар саатын көҥүлүн болдьоҕо бүтүө биир ый иннинэ, Росгвардия салалтатын иhинэн Таатта оройуонун лицензиялыыр-көҥүллүүр улэ отделениетыгар кэлэн уhатара булгуччулаах (холобура: — саа докумуона 10.06.2025с. бутэр буоллаҕына, саа докумуонун 10.05.2025 с. диэри туттарыахтааххыт, ол эбэтэр биир ыйын хойутаппакка, хаhан баҕарар туттарыахха сөп). Аадырыспыт: Ытык-Күөл сэл. Мординов аатынан уул. 23 “а” №-дээх дьиэтэ.

— булчут бултуур сиригэр тиийэн туох баар бары ирдэниллэр сааны илдьэ, уура, харайа сылдьыы быраабылаларын тутуһуохтаах, ол курдук дурдаҕа (сэhээккэҕэ) киирэн баран биирдэ саатын чехолтан хостуохтаах, бултаан бүттэ да ботуруоннарын саатыттан ылыахтаах, иитиилээх даҕаны, иитиитэ суох даҕаны саатын дьон диэки туһаайыа суохтаах. Массыынаттан эбэтэр тыыттан (лодкаттан) саатын ыларыгар утары өттүттэн ылбакка туораттан ылыахтаах, дурдаттан саатын ыларыгар төһө да сааттан ботуруонун ылбытын иһин эмиэ утары ылыа суохтаах. Хомойуох иhин Өрөспүүбүлүкэбит урдунэн сылтан сыл бу үөhээ ыйыллыбыт быраабылалары тутуспакка, сааттан дьон дэҥнэнэр быhылааннара тахса тураллар;

— булчут бултуур сиригэр тиийэн баран, дьиэтигэр кэлэригэр-барарыгар бэйэтин бас билэр (гладкоствольнай, нарезной) сааларын туора дьон билиитигэр, туора дьоҥҥо уларсара, биэрэрэ көҥүллэммэт, эбэтэр онно-манна кистээн хаалларбакка, бэйэтин кытта илдьэ сылдьыахтаах. Бэрэбиэркэ кэмигэр саалар полиция эбэтэр охотнадзор сотрудниктарынан ылыллаллар. Бу түгэҥҥэ саа хаһаайыныгар уонна илдьэ сылдьыбыт киhиэхэ административнай боротокуол туолар (ст. 20.8 ч. 4, 20.10 КоАП РФ) эбэтэр холуобунай эппиэтинэскэ тардыллыаххытын сөп (ст. 222 УК РФ);

— өскөтүн бэрэбиэркэ кэмигэр, булчут уотунан эстэр саатын арыгы испит туруктаах сылдьан түбэһэр түгэнигэр административнай эппиэтинэскэ тардыллар. Бу түгэҥҥэ миэрэтэ ыстараабы кытта саата утилизацияҕа барыан сөп (ст. 20.8 ч. 4.1 КоАП РФ);

— булчут бултаан бүтэн, дьиэтигэр кэлэн саатын ампаарга, күүлэҕэ, ыскаапка уо.д.а. сиргэ уурара булгуччу бобуллар, тутатына сиэйпэтигэр угара булгуччулаах. Өскөтүн, бэрэбиэркэ кэмигэр саа сиэйпэ таһыгар турар түгэнигэр, хаhаайын административнай эппиэтинэскэ тардыллар (ст. 20.8 ч. 4 КоАП РФ). Дьон бултаан кэлэн баран, сааларын харайбакка, онно-манна ууран барбыттарын түмүгэр, сокуоннай саастарын ситэ илик оҕолор хаалларбыт сааны ылан оонньоон, бэйэ-бэйэлэрин эчэтэр түгэннэрэ, хомойуох иhин, тахса турар. Маннык быһылаан буолар түгэнигэр саа хаһаайына холуобунай эппиэтинэскэ тардыллар (ст. 224 ч. 1 УК РФ — небрежное хранение огнестрельного оружия, создавшее условия для его использования другим лицом, если это повлекло смерть человека или иные тяжкие последствия). Уонна инникитин сааланара көҥуллэммэт;

— докумуона суох сааны, ол эбэтэр булан ылбыт, туора дьон биэрбит, эбэтэр бэйэ икки ардыгар докумуона суох атыыламмыт, урукку докумуона суох эhэтиттэн, аҕатыттан хаалбыт сааларын дьиэлэригэр туруораллара да, булка илдьэ бараллара да көҥуллэммэт, ону таhынан ботуруону бэйэ икки ардыгар батарар ол эбэтэр бэлэх биэрии эмиэ көҥүллэммэт (незаконное хранение, передача, сбыт огнестрельного оружия и патронов к нему). Оннук сааны тутатына Росгвардия салалтатын иhинэн Таатта оройуонун лицензиялыыр-көҥүллүүр улэ отделениетыгар эбэтэр Тааттатааҕы Ис дьыала отделыгар кэлэн туттараллара булгуччулаах. Докумуона суох сааны илдьэ сылдьан тубэhэр түгэҥҥитигэр административнай боротокуол толоруллар (ст. 20.10 КоАП РФ), ону таhынан холуобунай эппиэтинэскэ тардыллыаххытын сөп (ст. 222 УК РФ). Маннык эппиэтинэскэ тардыллыбыт киhи кэлин докумуоннаах сааны атыылаhарыгар сокуонунан күчүмэҕэйдэр үөскүөхтэрин сөп;

— докумуона суох сааны баҕа өттүнэн туттардаххытына, харчы төлөнөр. Ол курдук, Саха Өрөспүүбүлүкэтин Бырабыыталыстыбатын 12.02.2004 с. 63 №-дээх уурааҕар олоҕуран:

1) доруоп саа 6000 (алта тыһыынча) солкуобайга тэҥнэһэр;

2) буулдьа саа 8000 (аҕыс тыһыынча) солкуобайга тэҥнэһэр.

Таатта улууhyн лицензиялыыр – көҥүллүүр үлэ отделениета.

Хаартыска: "Таатта" хаһыат саайта.