Улуу Кыайыы 80 сылын бэлиэтиир бырааһынньыктааҕы бырагыраамаҕа “Арассыыйа киэн туттуута” куонкурус гран-при хаһаайына, “Кылыһах куйаардыын ситимэ” I өрөспүүбүлүкэтээҕи куонкурус кыайыылааҕа Терентий Егоров, “02 сулууспа” СӨ ис дьыалаҕа министиэристибэтин вокальнай ансаамбыла (салайааччы СӨ үтүөлээх үлэһитэ, ис сулууспа майора Юта Стрекаловская), “Леди плюс” үҥкүү ансаамбыла (салайааччы СӨ култууратын туйгуна Марина Кузьмина), “Ойуун” эр дьон синтез-тыйаатырдара (Сергей Расторгуев (баян), Константин Васильев, Николай Кузьмин, Александр Оконешников, Дьулустан Софронов), циирка артыыстара, балета, оркестра кыттыыны ыллылар.
Бырайыакка үгэс быһыытынан Марфа Петровна Колесова – Расторгуева аймахтара кытыннылар. Талааннаах удьуор сыдьааннара хоһоон аахтылар, ырыа ыллаатылар, дьон махталын, биһирэбилин ыллылар.
Судаарыстыбаннай Цииркэ искибиэригэр ыытыллар Кыайыы күнүгэр аналлаах бырайыак 20-тэн тахса сыл устата дьиҥнээх норуот үөрүүтэ буолар. Кыттар да, кэлэн көрөр, сэргэхсийэр дьон сыллата элбээн иһэллэр. Албан ааттаах Улуу сэриигэ охсуспут, тыыннарын биэрбит, кыайыы көтөллөөх эргиллибит хорсун буойуттарга сүгүрүйүү биир көрүҥэ өссө да кэҥии турдун.
-
0
-
0
-
0
-
0
-
0
-
0
