Норуот дьокутаата Иван Луцкан Дьокуускай куорат Октябрьскай уокуругун бэтэрээннэри эҕэрдэлиир тэрээһинигэр кыттыыны ылла.
– Уокурукпут олохтоохторун кытары олус истиҥник көрүстүбүт. Кинилэри кытары мин өрүү сибээстэһэбин, кыһалҕалаах боппуруостарын быһааралларыгар кыаҕым баарынан көмөлөһөбүн. Тэрээһин кэмигэр тыыл бэтэрээннэригэр уонна сэрии оҕолоругар Ил Дархан уонна Дьокуускай куорат баһылыгын ааттарыттан Кыайыы үбүлүөйүгэр анаммыт бэлиэлэри туттардыбыт. Быйылгы үбүлүөйдээх сыл биир уратытынан маннык бэлиэлэр хас биирдии сэрии сылларын оҕотугар туттарыллыбыта буолла. Дьокуускай куорат Октябрьскай уокуругар билигин 118 тыыл бэтэрээнэ уонна 800 сэрии сылларын оҕолоро олороллор, -- диэн иһитиннэрдэ тэлэгэрээм-ханаалыгар.
Иван Петрович салгыы Кыайыы күнүн үрдүктүк сыаналыырын, Кыайыыны уһансыбыттарга сүгүрүйэрин биллэрдэ:“Ыам ыйын 9 күнүгэр сүүнэ улахан суолталаах даатаны бэлиэтиибит – Аҕа дойду Улуу сэриитигэр Кыайыыбыт 80 сылын. Бу сэрии хас биирдии дьиэ кэргэни хаарыйбыта. Хас биирдии киһи кылаата – инники күөҥҥэ сылдьар саллаат, госпитальга үлэлиир мэдиссиинэ сиэстэрэтэ, собуот ыстаныагар снарядтары түүннэри чочуйар оробуочай, блокаданы ааспыт оҕо, -- бары Улуу Кыайыы тулхадыйбат сорҕото буолбуттара.
Кыайыы болуоссатыгар монумеҥҥа сибэкки дьөрбөтүн ууруу кэмигэр мин санааҕа ыллардым: ыар сыллар кэрэһиттэрэ – бэтэрээннэрбит сыллата күн сириттэн күрэнэн, ахсааннара аҕыйаан иһэр... Онон биһиги биир сүрүн сорукпут: күүстээх санаа, тулуур, дьулуур хайдах хатарыллыбыттарын туһунан устуоруйаны оҕолорбутугар, сиэннэрбитигэр үөрэтии, кинилэр өйдөрүгэр-санааларыгар Улуу Кыайыы сүдү суолтатын иҥэрии өссө күүһүрүөн наада».
Ыам ыйын 9 күнэ – дойдубут хас биирдии муннугар олорор элбэх норуоттар биир сомоҕо буолуубут, күүспүт бэлиэтэ. Аҕа көлүөнэлэрбит көрдөрбүт холобурдара биһигини дойдубут сайдыытыгар туһуламмыт үтүө дьыалаларга инникитин даҕаны кынаттыы, кыахпытыгар кыаҕы эбэ туруохтун!
-
0
-
0
-
0
-
0
-
0
-
0
