Билигин сааскы-сайыҥҥы халааҥҥа бэлэмнэнии үлэтэ тиһиктээхтик ыытыллар. Сылын ахсын федеральнай бүддьүөт суотугар Алдан, Амма, Токко, Ньүүйэ өрүстэргэ мууһу кэбирэтэр үлэлэр ыытыллаллар. Бу учаастак 213 гектар иэннээх, 33 учаастак тоҕус оройуон сирин-уотун хабар.
2024 сылга Горнай улууһун Өрт нэһилиэгэр Хаар Балаҕан үрэх сүнньүн дириҥэтэр уонна түгэҕин ыраастыыр үлэ ыытылынна. Абый улууһун Кэбэргэнэтинэн устар Индигир өрүс боротуохатыгар эмиэ маннык үлэ барыахтаах эбит даҕаны, сайаапка киирбэккэ, 2026 сылга көһөрбүттэр.
Быйыл Горнай улууһун Бэс Күөлүгэр Дьүктүйүөнэ үрэх сүнньүгэр дириҥэтэр уонна ыраастыыр үлэни ыытыы бырайыагын-симиэтэтин оҥоруу саҕаланна. Алдан, Амма, Ньүүйэ өрүстэргэ гидрологическай уонна морфологическай уратылара уларыйан, эмиэ ыытыллар үлэ бырайыагар-симиэтэтигэр кэккэ көннөрүүлэр киирдилэр.
Сыл ахсын айылҕа харыстабылын федеральнай уорганнарын кытары үлэ ыытыллар, халаан уутугар ылларыан сөптөөх бырамыысыланнай эбийиэктэри кэтииллэр. Быйыл маннык эбийиэк ахсаана 99 буолла. Чинчийии үлэтин судаарыстыбаннай экология кэтэбилин иниспиэктэрдэрэ оҥороллор. Бүгүҥҥү күҥҥэ 99 эбийиэги бэрэбиэркэлээбиттэр.
Маны сэргэ муниципальнай бас билиигэ турар гидрологическай тутуулары бэрэбиэркэлииллэр. Быйыл 83 эбийиэги барытын чинчийдибит.
Халааны бохсорго кытылы бөҕөргөтүү улахан оруоллаах. Ааспыт сыл Үөһээ Бүлүү сэлиэнньэтин аннынан Бүлүү өрүскэ 2,856 км. усталаах кытылы чиҥэтии үлэтэ түмүктэннэ. Бу үлэлэр 2022 сылтан саҕаламмыттара. Ыытыллыбыт үлэ уопсай суумата 903 мөл. солк. харчы, ол иһигэр 733 мөл солк. харчы федеральнай бүддьүөттэн үбүлэммитэ.
Быйыл Дьааҥы куоракка «Халаан уутуттан инженернэй харысхал» диэн эбийиэк тутуута саҕаланыаҕа. Ыытыллар үлэ болдьоҕо 2025–2028 сыллар. Манна барыта 1,3 млрд. солкуобай көрүллүө, ол иһигэр 1,2 млрд солк. федеральнай бүддьүөттэн. Эбийиэк устата – 9,091 км.
Былырыын халаантан ордук улаханнык Нам улууһа эмсэҕэлээбитэ. Итинник түбэлтэ хатыламматын туһугар, АЗС даамбата – Граф кытыла – Кыһыл дэриэбинэ сэлиэнньэтэ саҥардыллан оҥоһуллуоҕа. Маныаха федеральнай бүддьүөттэн харчы тардарга бырайыак-симиэтэ үлэтэ ыытыллар.
Айылҕа уонна техногеннай хараахтырдаах ыксаллаах быһыы-майгы кэмигэр баайдарын-дуолларын сүтэрбиттэргэ биир кэмнээх материальнай көмө оҥоһуллар. Ол көмө эмсэҕэлээһин кээмэйиттэн тутулуктаах. Быйыл эмсэҕэлээччилэргэ өйөбүл Үлэ уонна социальнай көмүскэл министиэристибэтин чэрчитинэн көрүллүөҕэ.
Хаартыска: Экология, айылҕаны туһаныы уонна ойуур хаһаайыстыбатын пресс- сулууспата
-
0
-
0
-
0
-
0
-
0
-
0
