Экология, айылҕаны туһаныы уонна ойуур хаһаайыстыбатын министиэристибэтин Уопсастыбаннай сэбиэтэ олус таһаарыылаахтык үлэлиир. Бэрэссэдээтэлинэн Михаил Черосов, кинини солбуйааччынан Игорь Бястинов талылынныллар. Өрөспүүбүлүкэтээҕи сэбиэт барыта 13 чилиэннээх.
Манна даҕатан эттэххэ, Саха Сирин нэһилиэнньэтин экология боппуруостара олус долгуталлар. Өрүстэр киртийиилэрэ, маһы кэрдии, ойуур баһаара, бөҕү тиэйии уо.д.а. долгутар тиэмэлэринэн буолар. Ону быһаарыыны аҥаардастыы былааска эрэ сэлээннээбэккэ, уопсастыбаннай экологтар көхтөөхтүк үлэлииллэр. Кинилэр иниспиэктэрдэри кытары эриэйдэҕэ сылдьаллар, тыаны араҥаччылыыллар, сайыҥҥы өҥүрүк куйааска даҕаны, кыһыҥҥы бытарҕан тымныыга да төрөөбүт айылҕабыт көмүскэлигэр тураллар.
Айылҕа харыстабылын уопсастыбаннай иниспиэктэрдэрэ өрөспүүбүлүкэ хас улууһун аайы бааллар. Ыччат экологическай хамсааһыннарга сылтан сыл көхтөөхтүк кыттар. Ити барыта айылҕа харыстабылын боппуруостарыгар сыһыаны уларытыыга сүрүн хамсааһынынан биһиги бэйэбит, дьоммут-сэргэбит санаата буоларын өссө төгүл көрдөрөр.
Уопсастыбанньыктар былааска сытыы боппуруостары туруораллар. Холобур, 2024 сылга улахан айдааннаах түбэлтэлэри – Соҕуруу Талакааннааҕы НГКМ 11 №-дээх скважинатыгар, Өлүөхүмэ улууһун Тээнэ сэлиэнньэтигэр, Эдьигээн улууһугар өрүскэ тимирбит суудуна уонна Алдан улууһун өрүстэрин, үрэхтэрин киртитии, Дьокуускай куоракка экологическай балаһыанньа, булт хаһаайыстыбатын сайдыытын туһунан боппуруостары көрбүттэрэ. Маны таһынан, «Экологическое благополучие» национальнай бырайыакка бэйэлэрин этиилэрин киллэрэллэр.
Хаартыска: Экология, айылҕаны туһаныы уонна ойуур хаһаайыстыбатын пресс-сулууспата
-
0
-
0
-
0
-
0
-
0
-
0
