Эҕэрдэ уҕараабат
Пуоруму Саха Өрөспүүбүлүкэтин Фармацевтарын ассоциациятын бэрэсидьиэнэ Степан Кусатов арыйда.
-- Өссө сэбиэскэй былаас саҕаттан эмп-томп эйгэтин үлэһиттэрин идэлээх бырааһынньыктарын олохтуур туһунан элбэх туруорсуу оҥоһуллубута. РФ Бырабыыталыстыбата Фармацевт күнүн ыам ыйын 19 күнүгэр бэлиэтиир туһунан ыйааҕы 2021 сыллаахха таһаарбыта. Билэргит курдук, коронавирус пандемията туран, биһиги бастакы кэмпириэнсийэбитин 2023 с. тэрийбиппит. Быйыл өрөспүүбүлүкэ бары улууһуттан фармацевтар кыттыыны ылалларын ситиһэр сыалтан өрүс суола арылларын кэтэстибит, тэрээһиммит ыытыллар күнүн кыратык сыҕарытан биэрдибит, -- диэтэ.
Ил Түмэн дьокутаата, доруобуйа харыстабылын сис кэмитиэтин чилиэнэ Никита Тимофеев эҕэрдэ тылыгар бу эйгэ киниэхэ ураты чугаһын эттэ. Ол курдук, Дьокуускай куорат муниципальнай эмтиэкэтигэр биэс сыл устата үлэлээбитин, онон кэллиэгэлэрин көрөрүттэн олус астынарын биллэрдэ:
-- Ил Түмэн аатыттан эҕэрдэлии кэлбиппиттэн ордук долгуйабын. Эмп-томп эйгэтин үлэһиттэрэ Саха Сиригэр эрэ буолбакка, бүтүн Арассыыйа үрдүгэр олус элбэхпит. Ол эрээри, үлэбит ситэри сыаналаммат курдук саныыбын, доруобуйа харыстабылын эйгэтигэр толору киирсибэппит сонньутар. Ил Түмэн сис кэмитиэтэ бу салааҕа тустаах үлэни ыытар. Быйыл чэпчэтиилээх эрэсиэбинэн бэриллэр эми хааччыйыыга үбүлээһин ситэтэ суох көрүллүбүтүн быһаарсарга үлэлии сылдьабыт. Ол эрээри, ааспыт 2024 сылы кытары тэҥнээтэххэ, эбии 600 мөл. солкуобай көрүллэрин ситистибит. Эһиил бу хайысханан үлэ салҕаныаҕа. Маны таһынан, Ил Түмэн каадырынан хааччылыы боппуруоһа, ордук Аартыкаҕа, сытыытык турарын итиэннэ эми-тому ыраах, суола-ииһэ суох нэһилиэктэргэ тиэрдии ороскуота улаханыттан сыана үрдүүрүн билэр, онон бу боппуруостарынан үлэ эмиэ салҕанар.
Пуорум кыттыылаахтарын эҕэрдэлииригэр бырабыыталыстыба бэрэссэдээтэлин солбуйааччы Георгий Степанов кинилэр доруобуйа харыстабылын биир тутаах салаатыгар киллэрэр кылааттарын, идэҕэ бэриниилэрин иһин махтанна. Тыйыс айылҕалаах Саха Сирин олохтоохторо чөл туруктаах сылдьалларыгар эминэн-томунан хааччыллыы ураты суолталааҕын ыйда.
Салгыы Доруобуйа харыстабылын министиэристибэтиттэн, «Росздравнадзортан», Дьокуускай куорат баһылыгын социальнай боппуруостарга солбуйааччы Владимир Аржаков, «Дьокуускайдааҕы мэдиссиинэ балаатата» уопсастыбаннай тэрилтэ бэрэссэдээтэлэ, Дьокуускай куорат 2-с №-дээх балыыһатын сүрүн бырааһа Саргылаана Васильева, доруобуйа харыстабылын үлэһиттэрин идэлээх сойуустарын бэрэссэдээтэлэ Людмила Корнилова тыл эттилэр, тустаах наҕараадалары туттардылар.
-
0
-
0
-
0
-
0
-
0
-
0
