-- Фармацевтар өрөспүүбүлүкэтээҕи ассоциациялара 1994 с. төрүттэммитэ. Ити сыл судаарыстыбаннай эмтиэкэлэр муниципальнай бас билиигэ бэриллибиттэрэ. Дойду үрдүнэн, ол иһигэр, Саха Сиригэр, фармацевтика ырыынага балысханнык сайдан барбыта, араас бас билиилээх судаарыстыбаннайа суох эмтиэкэлэр ситимнэрэ үөскээбитэ. Бу курдук уларыйыылаах-тэлэрийиилээх кэмҥэ Ассоциация тэриллэн, биир идэлээхтэри түмпүтэ. Бастакы кэмпириэнсийэҕэ бэрэсидьиэнинэн Василий Тарасович Иванов талыллан, араас дьаһаллары тэрийбитэ, инникигэ өтө көрүүлээх кэпсэтиилэри ыыппыта. Сылын ахсын бары эмтиэкэлэр салайааччыларын түмэр өрөспүүбүлүкэ таһымнаах мунньахтар буолаллара, ол түмүгэр билигин үтүө үгэскэ кубулуйбут «ФармЯкутия» кэмпириэнсийэ төрүттэммитэ. Манна биһиги тыын суолталаах боппуруостарбытын, кыһалҕаларбытын ырытабыт, нуорма-быраап өттүгэр докумуоннары, эминэн хааччыйыы бэрээдэгин дьүүллэһэбит.
Билиҥҥи чахчынан, өрөспүүбүлүкэ үрдүнэн эминэн-томунан дьарыктанарга судаарыстыбаннай лиссиэнсийэлээх 255 тэрилтэ баар. Саха Сирин фармацевтикатын ырыынагын ырытан көрдөххө, 2024 сыл муус устарыгар 234 эмтиэкэ, 251 эмтиэкэ пууннара, 7 эмтиэкэ киоскалара бааллар. Маны тэҥэ, 101 урбаанньыт эми атыылааһынынан дьарыктанар. Киин балыыһаларга 401 пуун, быраас амбулаторияларыгар 193 пуун, биэлсэр-акушер пууннарыгар 195 пуун баар. Учаастактааҕы балыыһаларга суох. Атын тутуллаах хос салааларга 12 пуун, кууһунан атыыга 6 ыскылаат, эминэн эргинэр биир атын тэрилтэ баар. Инньэ гынан, өрөспүүбүлүкэ үрдүнэн барыта 1002 эмтиэкэ баар. Бу 2023 сылы кытары тэҥнээтэххэ, бииринэн элбэх.
Доруобуйа харыстабылын үлэһиттэрэ буоллубут
Бүтэһик чахчынан, Саха Сиригэр фармацевтика салаатыгар 3 тыһ. 726 киһи үлэлиир. Кинилэр нэһилиэнньэ доруобуйатын харыстабылыгар киллэрэр кылааттара тугунан да кыайан кэмнэммэт. Фармацевтика исписэлиистэрэ эмтиэкэлэргэ, балыыһаларга эрэ буолбакка, суут мэдиссиинэтин уорганнарыгар, лабораторияларга, химия, фармацевтика бырамыысыланнаһыгар бааллар. Маны таһынан, чэпчэтиилээх эминэн туһанааччылары босхо эминэн хааччыйыыга үлэлэһэллэр, онон социальнай оруоллара сүҥкэн.
2025 сыл бэс ыйын 1 күнүттэн Арассыыйа эмтиэкэлэрэ доруобуйа харыстабылын ситимигэр киирэллэр, урут атыы-эргиэн эйгэтигэр киирсэллэрэ. Арассыыйатааҕы экэнэмиичэскэй дьайыы уопсай классификаторыгар (ОКВЭД) уларытыыны киллэрэр туһунан бирикээскэ «Росстандарт» салайааччыта Антон Шалаев муус устар 9 күнүгэр илии баттаабыта. Бу дойду фармацевтарын түмсүүтүн хас да сыллааҕы сыраларын түмүгэр ситиһилиннэ. Боппуруос бастаан 2014 с. Бүтүн Арассыыйатааҕы фармация үлэһиттэрин сийиэһигэр көтөҕүллүбүтэ.
Дьокутааттарга этиилэрбит
Инньэ ынан, ОКВЭД-ка куод уларыйан, бэс ыйын 1 күнүттэн эмтээх сириэстибэлэри оҥорон таһаарааччылар уонна чэпчэтиилээх эмтэри оҥорооччулар, тарҕатааччылар мэдиссиинэ тэрилтэлэрин үлэһиттэрин кэккэтигэр киирдилэр. Онон сибээстээн, норуот дьокутааттарыгар маннык этиилэрдээхпит:
Бастатан туран, эмтиэкэ үлэһиттэрэ тустаах чэпчэтиилэринэн мэдиссиинэ үлэһиттэрин кытары тэҥҥэ туһаналлара сокуонунан бигэргэтиллиэн наада.
Иккиһинэн, «Саха Өрөспүүбүлүкэтин фармациятын туйгуна» диэн Ассоциация наҕараадатын судаарыстыбаннай таһымнаах оҥорорго көрдөһөбүт. Эбэтэр, «СӨ фармациятын үтүөлээх үлэһитэ» диэн бочуоттаах ааты олохтуурга этэбит. Биэдэмэстибэ наҕараадаларын судаарыстыбаннай таһымҥа таһаарар туһунан боппуруоһу өрүү туруорсабыт. Бу этэҥҥэ быһаарыллара буоллар, фармацевт идэтин суолтата биллэрдик үрдүө этэ.
Пуорум тула санаа
Пуорумҥа испиикэрдэри кытары үлэ олус үчүгэйдик, таһаарыылаахтык ааста. Эминэн хааччыллыы, дьоҕус уонна орто биисинэс түһээни төлөөһүнүн боппуруостара, инбэлииттэри чөлүгэр түһэриигэ тиэхиньиичэскэй тэрилинэн хааччыйыы электроннай сэртипикээтин үлэтин, эминэн хааччыйыыны сайыннарыы тосхоллорун, саҥа сүүрээннэрин туһунан ырыттыбыт. Элбэх түмүк оҥоһулунна, этии киирдэ.
Матырыйаалбын Ассоциация толорооччу дириэктэрин, 2-с №-дээх Дьокуускай куорат балыыһатын провизорун Альбина Иванова тылларынан түмүктүүбүн:
-- Эмтиэкэлэр үлэлэрэ кэммиэрчэскэйгэ кубулуйан, бэйэ-бэйэбитин кытары күрэстэһээччи буолан хааллыбыт. Ассоциация киэҥ нэлэмэн Сахабыт Сирин провизордарын уонна фармацевтарын ханнык тэрилтэҕэ үлэлиириттэн тутулуга суох, биир сомоҕо гына түмэр. Маннык истиҥ эйгэлээх мунньахтарга биир идэлээхтэр бэйэ-бэйэбитин кытары билсэн, кэпсэтэн, түмүгэр кыһалҕабыт төрүөтэ биирин, ону быһаарыы биһиги уопсай сорукпут буоларын өйдүүбүт. Биһиги сүрүн аналбыт -- үтүөнү оҥоруу, ыарыһах дьоҥҥо үтүөрэргэ эрэли саҕыы, эминэн хааччылыы хаачыстыбатын тупсарыы, доруобуйа харыстабылыгар бэйэбит сэмэй кылааппытын киллэрии.
Ааптар хаартыскаҕа түһэриилэрэ.
-
1
-
0
-
0
-
0
-
0
-
0
