Төгүрүк остуолга Саха Өрөспүүбүлүкэтин инновацияҕа, сыыппара сайдыытыгар уонна инфокоммуникационнай технологияларга миниистир Василий Ефимов, “Татмедиа” бэчээккэ уонна маассабай коммуникацияҕа Өрөспүүбүлүкэтээҕи ааҕыныстыба салайааччытын маҥнайгы солбуйааччыта Ильдар Миргалимов, “Саха бэчээт” тэрилтэ генеральнай дириэктэрэ Ньургуйаана Стручкова, Татарстан уонна Саха Сирин медиа ситимнэрин салайааччылара үлэлэрин-хамнастарын билиһиннэрдилэр.
Ил Түмэн култуураҕа уонна сонуну киэҥник тарҕатар ситимнэргэ сис кэмитиэтин бэрэссэдээтэлэ Виктор Губарев төгүрүк остуол кыттыылаахтарын эҕэрдэлээтэ:
-- Бүгүҥҥү күҥҥэ мустубут доҕотторбутун эҕэрдэлиибин. “Ыалдьыттар” диирим табыллыбат курдук. Ол курдук, Татарстаны кытары экэниэмикэ араас салаатыгар, оҥорон таһаарыыга, култуура, успуорт эйгэтигэр ыкса сибээстээхтик үлэлиибит. Биһиги аҕа баһылыктарбыт бииргэ үлэлээһиҥҥэ дуогабар баттаспыттара номнуо үтүө түмүктэрдээх.
Билигин нэһилиэнньэҕэ сонуну түргэнник уонна дьиҥнээхтик тиэрдии -- сүрүн сорукпут. Маныаха информацияны киэҥник тарҕатар сириэстибэлэр оруоллара сүҥкэн. Саха Сирэ олус улахан иэннээҕинэн кэккэ уустуктардаах. Ол курдук, төһө даҕаны сыыппара сайдыыта кэҥээбитин, интэриниэт хаһыаттар элбээбиттэрин иһин, сибээс мөлтөх сирдэригэр: табаһыттарга, балыксыттарга сонун кумааҕыга бэчээттэнэн, хаһыатынан тиэрдиллэр.
Сэбиэскэй сойуус урусхалламмыт кэмигэр, дьалхааннаах 90-с сылларга биһиги эрэгийиэммитигэр биир даҕаны хаһыат, бибилэтиэкэ, успуорт, култуура тэрилтэтэ сабыллыбатаҕа. Билигин даҕаны, сонуну киэҥник тарҕатар сириэстибэлэргэ көрүллэр бүддьүөттэн үбүлээһини, субсидияны сарбыйар табыллыбат. Маныаха Ил Түмэн дьокутааттара үлэлэһэбит, -- диэн эттэ, уонна мустубут дьоҥҥо таһаарыылаах үлэни, ситиһиини баҕарда.
Ааптар хаартыскаҕа түһэриилэрэ.
-
0
-
0
-
0
-
0
-
0
-
0
