Бэрэбиэркэҕэ “Биир Ньыгыл Арассыыйа” дьокутааттара, Гагаринскай уокурук олохтоохторо уонна балыыһаттан бэрэстэбиитэллэр сырыттылар. Саҥа балыыһа быйыл балаҕан ыйыгар арыллара былааннанар.
Саҥа поликлиникаҕа туспа аанынан киириллэр, сменаҕа 180 көрүүнү ыытар оҕо салаата баар буолуо. Учаастактааҕы педиатр быраастар, оҕолорго мэдисссиинэ-социальнай көмө оҥорор, оҕо көрөр дьоҕурун харыстыыр кабинеттар, испсэлэстиистэр салаалара баар буолуо. Оттон улахан дьону көрөргө эмиэ туспа ааннаах поликлиника арыллыа, күҥҥэ 300 киһини көрүөхтэрэ. Учаастактааҕы терапевтар уонна испэсэлиис быраастар үлэлиэхтэрэ. Дьахтар консультацията эмиэ туспа ааннаах, күҥҥэ 120 пациены ылар кыахтаах буолуо.
“Олохтоохтор хаачыстыбалаах мэдиссиинэ өҥөтүн ылалларыгар, табыгастаах усулуобуйалаах, аныгы көстүүлээх дьиэ үлэҕэ киириэ. Пациеннар, персонал даҕаны астыныа дии саныыбын. Билигин Дьокуускай куорат араас муннуктарыгар биэс дьиэнэн дьону эмтээһин ыытылларын билэбит. Онон испэсэлиистэри, терапевтары кэрийэргэ, анаалыс туттарыытыгар кэккэ ыарахаттар бааллар” – диэн норуот дьокутаата, “Биир Ньыгыл Арассыыйа” эрэгийиэннээҕи салаатын сэкэрэтээрин солбуйааччы Иван Луцкан этэр.
“Олохтоохтор МРТ саҥа кабинета арылларын күүтэлэр. Бу иннинэ диагностиканы ааһарга кинилэр куорат араас поликлиникаларынан уһун уочараты ааһан сылдьаллара. Онон олус табыгастаах, хаачыстыбалаах өҥөлөрү оҥорор балыыһа буолуо диэн эрэнэбит. Гагаринскай уокурук олохтоохторугар саҥа поликлиника чугас да буолуо. Маны сэргэ, оҕо уонна улахан дьон поликлиникалара биир сиргэ баар буолуо», -- диэн Гагаринскай уокурук олохтооҕо Марина Борисова санаатын үллэстэр.
Хаартыскалар: "Доктор Луцкан" тэлэгэрээм ханаалыттан
-
0
-
0
-
0
-
0
-
0
-
0
