Айар бөлөх Мөҥүрүөн, Дьабыыл, Мэлдьэхси, Тараҕай, Мэҥэ, Доллу, Дьаҥхаады, Нөөрүктээйи нэһилиэктэр сайылыктарыгар, отчуттарыгар Эдьиий Настаа ырыаларын үйэтитэр сыаллаах ыалдьыттаата. Тыа сирин үлэһит дьонугар анаммыт бырайыакка СӨ норуодунай артыыһа, опера солиһа Григорий Петров, Ю.А. Гагарин аатынан култуура киинин хормейстера, элбэх өрөспүүбүлүкэтээҕи күрэстэр кыайыылаахтара Рустам Слепцов, талааннаах тамада, ылбаҕай ырыаһыт Терентий Егоров, айан сүгүрүйээччитэ Сергей Винокуров, Мэлдьэхсилэр киэн туттар кыыстара, Аан дойду ускуустуба маастара, виртуоз-хомусчут Варвара Степанова-Арчыына, СӨ култууратын үтүөлээх үлэһитэ, Эдьиий Настаа биир дойдулааҕа Анна Охлопкова уонна улууспут култууратын үлэһиттэрэ кыттыылаах киэҥ бырагыраамалаах кэнсиэр көрөөччү истиҥ биһирэбилин ылла. Бырайыак түмүктүүр күнүгэр СӨ телевидениетын уонна бэчээтин туйгуна, бастыҥ ыытааччы Георгий Белоусов уонна СӨ култууратын туйгуна, эстрада биир бастыҥ аата Эрчим кыттыыны ыланнар көрөөччүлэргэ умнуллубат көрсүһүүнү бэлэхтээтилэр.
Тыабыт сирин олохтоохторо, үрүҥ илгэни үрүлүтэр ыанньыксыттар, күөх быйаҥы сомсор механизатордар сайыҥҥы сыралҕаны аахсыбакка, аһаҕас халлаан анныгар түмсүүлээхтик кэнсиэри сэргээн көрдүлэр. Үтүө үгэскэ кубулуйбут бырайыак эһиил норуот ураты тапталын ылбыт Галина Шахурдина сырдык аатыгар анаан айаны салгыыр баҕа санаалаах түмүктээтэ.
Мэҥэ Хаҥалас улууһун дьаһалтатын пресс-сулууспата
-
1
-
0
-
0
-
0
-
0
-
0
