Кинигэ сүрэхтэниитигэр Сергей ийэлээх аҕата Лидия Никифоровна, Афанасий Васильевич Ильиннэр, Үөдүгэй нэһилиэгин баһылыга Альберт Юрьевич Иванов, оскуола коллектива, бииргэ үөрэммит доҕотторо, иитээччилэрэ Валентина Васильевна, Елена Филипповна, учууталлара о. д. а кытыннылар. Тэрээһини Үөдүгэй библиотекатын сэбиэдиссэйэ Валентина Филиппова иилээн-саҕалаан ыытта.
Хас биирдии киһи Сергей туһунан итиитик-истиҥник аҕыннылар, кини үтүө майгытын, дойдутугар тапталын, доҕотторугар сылаас сыһыанын бэлиэтээтилэр. Ийэ дойдутун чиэстээхтик көмүскээбитин, эчэйиилээх бойобуой табаарыстарын быыһыы сылдьан олоҕун толук уурбутун харааста иһиттибит…
Бэлиэтээн эттэххэ, Сергей Ильин туһунан бу саас «Улус. Медиа» интэриниэт ситимин нөҥүө «Буойун суолунан» бырайыакка суруналыыс Валентина Догоюсова суруйбутун Саха сирэ бүттүүн аахпыта. Ол суруйууттан саҕалаан эбии ахтыы хомуллан, хаартыска эбиллэн халыҥ кинигэҕэ кубулуйда.
Сергей үөрэммит оҕо искусствотын оскуолатыгар (художественнай кылааска) дириэктэр Анатолий Иванов кэпсээбитинэн, бу үөрэх дьылыгар Сергей Ильин сырдык аатын үйэтитэн уруһуй куонкуруһа тэриллиэҕэ. Маны таһынан «Үөдүгэй бөрүөтэ» литературнай түмсүү таһаарар кинигэтигэр Сергей туһунан кэпсээни поэт Наталья Дордо бэлэмнии сылдьар. Аҕата Афанасий Васильевич кэлэр саас уоллара Сергей аатынан стипендияны бастыҥ үөрэнээччигэ туттаралларын туһунан санаатын үллэһиннэ.
Бүгүн, кини кырачаан кыыһа 5 сааһын туолар күнүгэр, тапталлаах аҕата Сергей туһунан кинигэ сүрэхтэммитэ олус долгутуулаах, харах уулаах буолла… Кини үтүө аата, хорсун быһыыта үйэлэргэ умнуллубат!
Мария Васильева,
«Үөһээ Бүлүү» хаһыат
-
0
-
0
-
0
-
0
-
0
-
0
