Киирии тылы нэһилиэк баһылыга Владимир Сивцев эттэ. Тус этиитигэр:
«Быйылгы дьылга былаан киэҥ. Ол курдук, ааспыт сылга Куохара үрэхпит кытылын тупсарыыга анаммыт бырайыкпыт федеральнай куонкуруһу кыайан, 50 мөлүйүөннээх үбү ылары ситиспиппит. Онон сүрүн үлэбит бу тула буолуоҕа. Мантан сиэттэрэн Тупсаҕай эйгэ сылын биллэрдибит.
Быйыл уопсастыбаннай анал сирдэри, суоллары, тротуардары оҥоруу, уулуссалары сырдатыы үлэлэрэ ыытыллыаҕа. Бу эрэ буолбакка, биир соругунан биһиги эйгэбит тупсаҕай буолуута, нэһилиэкпит сайдыыта хас биирдии олохтоохтон, эдэриттэн эмэнигэр диэри барыбытыттан тутулуктааҕын өйдөтүү буолар. Кэнчээри ыччаппыт дойдуга бэриниилээх, түмсүүлээх буолара, оҕолору үлэҕэ сыһыаран иитии төрөөбүт түөлбэбит сайдар олуга буоллаҕа дии», — диэн бэлиэтээтэ.
Сыл кэнсиэпсийэтин нэһилиэк баһылыгын бастакы солбуйааччыта Уйгулаан Туласынов билиһиннэрдэ. Түөрт хайысханан элбэх үлэ былааннаммыт. «Көҕөрдүү уонна экология» хайысхаҕа маассабай мас, сибэкки олордуута, «Тупсаҕай инфраструктураҕа» Куохара үрэҕи тупсарыы, Олохтоох көҕүлээһини өйүүр быраыгаарама бырайыактарын олоххо киллэрии, нэһилиэк иһинээҕи суоллары оҥоруу, «Ырааһырдыы уонна бэрээдэктээһин» хайысхатыгар субуотунньуктары, сыбаалкаҕа үлэни тэрийии, «Норуодунай хонтуруол» уопсастыбаннай систиэмэни киллэрии, «Биир уопсай дьүһүн» хайысхаҕа нэһилиэк дизайн-кодун тарҕатыы, арт-эбийиэктэри тутуу уонна да ити курдук дьаһаллар киирбиттэр.
Бу үлэлэри тэрийиигэ анал ыстаап тэриллибит. Састаабы нэһилиэк баһылыгын социальнай боппуруостарга солбуйааччы Варвара Макарова билиһиннэрдэ. Ыстаап иһинэн түөрт хайысханан куоратордар анаммыттар. Тэрийэр бөлөххө ТОС салайааччылара дьону түмүүгэ, уопсастыбаннай үлэҕэ сыһыарыыга төһүү күүс буолуохтара.
Мунньахха кэлбит дьон-сэргэ ырытыһыыга көхтөөхтүк кыттан, сыллааҕы былаан тула тус санааларын үллэһиннилэр, үлэлэһэргэ бэлэмнэрин эттилэр.
Сонун төрдө уонна хаартыска: "Саҥа олох", Марфа Петрова.
-
0
-
0
-
0
-
0
-
0
-
0
