“Билигин тоҕоостоох кэм үүннэ, үлэн үктэлин биһигини кытары оҥор!” диэн үлэ биэрээччилэр ыҥыраллар. Сунтаар улууһугар күн бүгүн 50 тахса вакансия баар.
Саҥа ирдэбилинэн тэрилтэлэр вакансияларын туһунан иһитиннэриилэри “Работа России” диэн цифровой платформаҕа таһаарар буоллулар. Ол иһин, Арассыыйа хайа баҕар муннугар табыгастаах үлэни көрдүөххэ сөп. Күн бүгүн Сунтаар улууһугар ордук доруобуйа харыстабылыгар, үөрэҕириигэ уонна тыа хаһаайыстыбатыгар ордук элбэх вакансия баар.
Лена Егорова Сунтаардааҕы үөрэҕирии салалтатын каадырга исписэлииһэ: “Сыллата улууска үөрэх эйгэтигэр 50-тан тахса вакансияны таһаарабыт. Дьокуускай куоракка ыытыллыбыт үөрэх эйгэтигэр үлэнэн хааччыйыы дьаарбаҥкатыгар хаһааҥҥытааҕар да элбэх быйыл үөрэхтэрин бүтэрэр устудьуоннары үлэҕэ ыҥырдыбыт, дуогабардастыбыт. Онон кэлэр үөрэх дьылыгар каадырынан этэҥҥэ хааччыллыахпыт диэн эрэл санаалаахпыт”.
Кэлиҥҥи сылларга үөрэҕириигэ саҥа үөрэхтэрин бүтэрбит дьон үлэлии кэлиитэ элбэҕин бэлиэтииллэр. Маныаха эдэр дьону өйүүр тус сыаллаах бырагыраамалар олоххо киирэн үлэлииллэрэ, саҥа олоҕун оҥостор киһиэхэ улахан көмө-тирэх буолаллар.
Бүгүҥҥү дьаарбаҥкаҕа элбэх киһи үлэ миэстэтин туоһуласта. Чуолаан эр дьон промышленнай тэрилтэлэргэ үлэ миэстэтин көрдүүллэр эбит. Ол эрэн, күн бүгүн баар вакансиялары эмиэ интэриэһиргииллэрин эттилэр. Кэрэ аҥардар үөрэх эйгэтигэр, “Татыйыына” фирма вакансияларын көрдүлэр-иһиттилэр.
Сонун төрдө уонна хаартыска: "Сунтаар сонуннара", Мира АФАНАСЬЕВА
-
0
-
0
-
0
-
0
-
0
-
0
