Общество

Билигин Егоровтарга үс көлүөнэнэн 16 киһи педагогика салаатыгар үлэлиир. Төрүттээччилэрэ Дьоруой ийэ, тыыл, үлэ бэтэрээнэ, Тиит Арыы нэһилиэгин Бочуоттаах олохтооҕо, СӨ Бочуоттаах кырдьаҕаһа, математика уонна алын кылаастар учууталлара, 99 саастаах  Фекла Степановна Егорова буолар. Күн бүгүҥҥү туругунан кини алта оҕото үөрэҕирии эйгэтигэр үлэлииллэр, маны сэргэ кийииттэр, күтүөттэр, сиэннэр угуйуллаллар.

Быйыл Фекла Степановна 100 сааһын көрсө 3 нэһилиэк уһуйааннарын иитиллээччилэригэр "Хомуур" успуорт күрэхтэһиилэрин, оскуола үөрэнээччилэригэр "Бил-көр" интеллектуальнай оонньуулары көҕүлээн тэрийдилэр.

Династияны кытары билиһиннэрдэххэ, Любовь Николаевна Григорьева нуучча тылын уонна литературатын учуутала, СӨ үөрэҕириитин туйгуна, РФ орто уопсай үөрэҕириитин Бочуоттаах үлэһитэ, үлэ бэтэрээнэ, “Үөрэнээччилэр билиниилэрин учуутала”. Оҕото Алексей Иннокентьевич эбии үөрэхтээһин педагога, билигин анал байыаннай дьайыы кыттыылааҕа. Кийииттэрэ Кыдана Дмитриевна нуучча тылын уонна литературатын учуутала. Любовь Николаевна биир кэлим эксээмэни 70 баалтан үрдүккэ туттарбыттарга анал испиэндьийэ анаан Хаҥалас улууһун Тиит Арыы уонна Кэбээйи Тыайа орто оскуолаларын  үөрэнээччилэригэр туттарар.

Галина Николаевна Константиновна математика учуутала, СӨ үөрэҕириитин туйгуна, үлэ бэтэрээнэ. Ийэ буолуу иккис истиэпэннээх мэтээлинэн уонна “Жертвенное служение” мэтээллэр хаһаайката. Тиит Арыы орто оскуолатыгар үөрэх чааһыгар дириэктэри солбуйааччынан 11 сыл устата, маны сэргэ 40-тан тахса сыл устата математика учууталынан уонна биир идэлээхтэр түмсүүлэрин бэрэссэдээтэлинэн үлэлээбит.

Кыыһа Анна Николаевна дириэктэр сүбэлээччитэ, Тиит Арыы орто оскуолатыгар оҕо хамсааһынын тэрийээччи. Күтүөтэ Дмитрий Дмитриевич Лукин физкультура учуутала, элбэх оҕолоох аҕа, улуустааҕы “Аҕа күрэҕэ” күрэхтэһии кыайыылааҕа.  

Надежда Николаевна Егорова баспытаатал, үлэ бэтэрээнэ. “Кэнчээри” уһуйааҥҥа 30-тан тахса сыл баспытааталлаабыт, кэлин сэбиэдиссэйдээбит.

Леонид Николаевич Егоров математика учуутала, СӨ үөрэҕириитин туйгуна, Бүлүү улууһун Халбаакы нэһилиэгин Бочуоттаах олохтооҕо, үлэ бэтэрээнэ. Кэргэнэ Нина Федоровна математика учуутала, кыыстара Сайыына психолог. Сылын ахсын Бүлүү улууһун Халбаакы орто оскуолатын бастыҥ математикаҕа үөрэнээччитигэр бэйэлэрин ааттарыттан истипиэндьийэ туттараллар.

Наталья Николаевна Христофорова биология уонна химия учуутала, Булуҥ улууһун Бороҕон орто оскуолатыгар билимҥэ дириэктэри солбуйааччы, биология уонна химия учуутала. Кини сатабыллаах салайыытынан сылын ахсын үөрэнээччилэрэ элбэх кэмпэриэнсийэлэргэ, куонкурустарга, ааҕыыларга, олимпиадаларга кыайыылаах аатын сүгэллэр, Аартыканы суон сураҕырдаллар. Кийиитэ Елизавета Гаврильевна Христофорова Дьокуускай куорат “Академия детства” уһуйааҥҥа баспытааталлыыр.

Марина Николаевна Егорова үрдүк үөрэх кыһатыгар преподователь.

Кыра уол кэргэнэ Пелагея Васильевна Егорова Ф.Г.Охлопков аатынан Майа орто оскуолатыгар нуучча тылын уонна литературатын учуутала,

Конон Васильевич Егоров Николай Дмитриевич хаан уруу абаҕата, Егоровтар династияларын төрүттээччи Фекла Степановна кэргэнэ. 1934-1941 сылларга 3-с Малдьаҕар оскуолатыгар дириэктэрдээбит. Конон Васильевич өҥөтүнэн 1937 сыллаахха оскуола 7 кылаастаах буолбутун ахталлар.

Егоровтар педагогическай династиялара 1996 сылтан Г.В.Ксенофонтов аатынан Тиит Арыы орто оскуолатын үөрэнээччилэригэр истипиэндьийэ туттараллар. Маҥнайгы истипиэндьийэни билигин элбэх оҕолоох ийэ Анна Сивцева туппут. Кэлин 2024-2025 үөрэх дьылын түмүктэринэн 11-с кылаас үөрэнээччилэрэ Денис Третьяков уонна Виталий Касьянов буолбуттар.

2009 сыллаахха династия “СӨ педагогическай династиялара” түөскэ кэтиллэр знагынан бэлиэтэммиттэрэ. Бары династия кыттыылаахтара сылын ахсын педагогическай ааҕыыларга, кэмпэриэнсийэлэргэ, олимпиадаларга көхтөөх кыттыыны ылаллар. Араас дипломнарынан, махтал суруктарынан бэлиэтэнэллэр.

Хаартыскалар: Егоровтар дьиэ кэргэн архыыбыттан.