Улахан күрэхтэһииттэн Дьокуускай куорат 35 №-дээх оскуолатын “1 “А” кылааһын үөрэнээччитэ Саша Михайлов кыайыы ситиһиилээх кэллэ. Бу туһунан ийэтэ Анна Ильинична маннык кэпсиир:
-- Бу сыл олунньу ыйыгар “Сулустаах эстафета-2026” эрэгийиэннээҕи этаап балаһыанньатын ыыппыттарын көрөн кыттыахха сөп диэн быһаарыммыппыт. Ордук үбүлүөйдээх сылга кыттар ураты долгутуулаах буоллаҕа -- быйыл киһи-аймах куйаарга көппүтүн 65 сылын бэлитиибит.
Оҕобут Дьокуускай куорат IT-Куб иһинэн үлэлиир тиэхиньиичэскэй айар үлэ Киинигэр “Робототехникаҕа” эбии үөрэнэр, педагогпут Татьяна Ивановна Попова буолар. Кини куйаарга мунньуллар бөҕү хомуйууга сыһыаннаах үлэни оҥорорго сүбэлээбитэ. Саша куйаары үөрэтиини олус интэриэһиргээбитэ, умсугуйбута.
Бөҕү хомуйуу аныгы кэмҥэ тыҥаан турар суолталаах кыһалҕа. Сыллата сир шаарбыт орбитатыгар оҥоһуу спутниктар, ракета таһааччылар тоорохойдоро, араас аппарааттар ыытыллаллар, ол сылы сыллаан хайдах даҕаны ыраастаммат, хомуллубат, сирбит тула көтө сылдьар.
Бэлэмнэнии кэмигэр Сашалыын куйаарга туох бөх мустарын үөрэппиппит, хаһан бастаан үөскээбититтэн саҕалаан ырыппыппыт. Маныаха билим учуонайдара кыһалҕаны хайдах туруоран саҕалаабыттарын, ыраастааһыҥҥа билигин туох-хайдах хардыылар оҥоһуллалларын, былааннары билсибиппит. Куйаары үөрэтэр сурунааллартан араас ыстатыйалары ааҕан, ССРС, Арассыыйа, АХШ, Европа, Дьоппуоньуйа, Кытай учуонайдарын билимҥэ үлэлэрин ырыппыппыт уонна чинчийии инникилээҕин быһаарбыппыт. Ол курдук, куйаарга мунньуллар бөҕү ыраастааһыны бастакынан баһылаабыт дойду куйаарга инники күөҥҥэ сылдьыа диэн толкуйга кэлбиппит.
Оҕобут Саша үлэтэ үрдүктүк сыаналанан бириистээх миэстэҕэ тахсыбытыттан олус үөрдүбүт, киэн туттабыт, инникитин даҕаны ситиһиилэригэр эрэнэбит.
Манна даҕатан эттэххэ, “Сулустаах эстафета” (“Звездная эстафета”) космотавтикаҕа оҕолор истэригэр ыытыллар билим бырайыактарын Бүтүн Арассыыйатааҕы куонкуруһа дойдубутугар биир саамай улахан суолталаах күрэх буолар.
Дойдубут араас муннугуттан уопсайа 380 кыттааччы күөн көрүстэ. Ол иһигэр, Краснодартан, Нальчиктан, Санкт-Петербургтан, Москубаттан, Ивановоттан, Владикавказтан, Геленджиктан, Ростов-на-Донуттан, Кемеровоттан, Уфаттан, Тюменьтан, Тамбовтан, Калининградскай кыраайтан, Тулаттан, Амурскай уобаластан, Самараттан, Камчаткаттан онтон да атыттартан.
Сахабыт Сириттэн кыттааччылары тиэхиньиичэскэй айар үлэ Киинэ бэлэмнээбит, сүүмэрдээһин түһүмэхтэрин тэрийбит. Ол түмүгэр призердарынан Баишев Дамир уонна Михайлов Саша буоллулар. Оттон кыайыылаахтарынан Рожина Ирина, Иванова Яна, Охлопков Оркон, Петухов Саша.
Күрэхтэһиини таһынан оҕолор Королев куоракка уонна Москубаҕа күүлэйдээтилэр. Араас түмэллэргэ сылдьан куйаары үөрэтиини билистилэр, бэйэлэрин саастыылаахтарын кытары доҕордостулар, санаа атастастылар. Биир саамай умнуллубат түгэнинэн С.П.Королев аатынан “Энергия” ракета, куйаар корпорациятыгар сырыылара буолла. Манна космонавтика төрүттэниититтэн билиҥҥитигэр диэри араас эспэнээттэри көрдүлэр, космонавтары кытары көрүстүлэр.
Хаартыскалар: Саша Михайлов дьиэ кэргэнин архыыбыттан
-
2
-
2
-
0
-
0
-
0
-
0
