Буойун суруналыыс, бэйиэт Макар Иванович Кузьмин – Макаар Хара хоһуйбутунуу “Бөрүөнү ыстыыкка солбуйан ...” Аҕа Дойду улуу сэриитигэр Саха Сириттэн 139 сурунлыыс, бэчээт эйгэтин үлэһитэ Ийэ дойдуну көмүскүүр ытык иэһин толорбута. Кинилэр ортолоругар Сэбиэскэй Сойуус дьоруойа, кыайы саллаата, буойун-суруналыыс Николай Алексеевич Кондаков сырдык мөссүөнэ баар. Саха Араадьыйатын Көмүс Пуондатыттан Николай Кондаков 1969 сыллаахха суруллубут куолаһын иһитиннэрдилэр.
Кыайыыны сулус оҥостон, хорсуннук кыргыспыт буойун-суруналыыстар кэккэлэригэр Берлиҥҥэ тиийэ сэриилэспит, инники кирбиигэ сибээһи хааччыйбыт, буойун-суруналыыс Феодосий Семенович Донской аатын дьоһуннук ааттаатылар. Улуу Кыайыы өрөгөйдүүр күнүгэр кини Рейхстаг эркинигэр аатын суруйан хаалларбыт түгэнин бэйэтэ кэпсээбитин Саха араадьыйатын Көмүс Пуондатыттан билиһиннэрдилэр.
18 буойун-суруналыыс кыргыһыы толоонугар охтубуттара, олохторун толук биэрбиттэрэ. Кинилэр кэриэстэригэр суруналыыстар 1 мүнүүтэ саҥата суох турдулар.
Салгыы инновация, сыыппара сайдыытын, инфокоммуникационнай технология миниистирэ Петр Николаев, СӨ Суруналыыстарын сойууһун бэрэссэдээтэлэ, «Саха» НКИХ генеральнай дириэктэрэ, Ил Түмэн дьокутаата Олег Марков, «Сахабэчээт» генеральнай дириэктэрэ Ньургуйаана Стручкова тыл эттилэр.
Бу күн суруналыыстарга Николай Петровка, Татьяна Марковаҕа, Александр Васильев - Көрдүгэҥҥэ наҕараадалары туттардылар. Маны сэргэ “Ийэ дойдуну көмүскээччи ийэтэ” мэтээлинэн Егорова Лена Семеновна уонна Никифорова Анна Николаевна наҕараадаланнылар.
«Сахабэчээт, «Кэскил» үлэһиттэрэ байыаннай таҥаһы таҥнан тахсан, сэрии саҕанааҕы ырыалары ыллаатылар. Хуору СӨ норуодунай артыыһа Алексей Калининскай - Луҥха салайда.
Кыайыыны аҕалсыбыт, дьоллоох олох иһин олохторун толук уурбут саха буойун-суруналыыстарыгар аныгы көлүөнэ сүгүрүрүйдэ, махтанна! Эҕэрдэ тылын эдэр суруналыыстар ааттарыттан "Ил Түмэн" издательскай дьиэ суруналыыһа Иннокентий Татаринов эттэ.
Ыспыраапка: Аҕа дойдуну көмүскүүр Улуу сэриигэ Саха Сириттэн 139 суруналыыс уонна бэчээт үлэһитэ ыҥырыллан барбыта. Кинилэртэн 18 хорсун буойун кыргыһыы толоонуттан эргиллибэтэҕэ. Бу сурналыыстар истэригэр 1 Сэбиэскэй Сойуус Дьоруойа, 1 Социалистическай Үлэ Дьоруойа, 3 норуодунай суруйааччы, 2 бэрэпиэссэр баар.
Сэрии сут кураан кэмигэр тыылга хаалбыт суруналыыстар хаһыаты тиһигин быспакка таһаараллара, Саха Сирин танковай колоннатын тутууга үбү-харчыны хомуйбуттара, халыҥ танаһы тигэн баһыылка ыыталлара, норуот санаатын Кыайыыга угуйан, күүһүрдэн биэрэллэрэ.
Кинилэри кэриэстээн, Улуу Кыайыы 60 сылынан, Суруналыыстар сойуустарын Саха Сиринээҕи салаатын көҕүлээһининэн, Бэчээт дьиэтигэр мемориальнай дуоска саайыллыбыта. Улуу Кыайыы 70 сылыгар онно искибиэр оҥоһуллубута. Итиэннэ сыл аайы, Улуу Кыайыы күнүн чэрчитинэн, уоттаах сэрии толоонугар охтубут, эргиллэн кэлэн эйэлээх олоҕу тутуспут буойун суруналыыстары уонна бэчээт үлэһиттэрин ахтан-санан ааһар ытык сиргэ кубулуйбута.
-
3
-
0
-
0
-
0
-
0
-
0
