Оскуоланы бүтэрбити туоһулуур аттестат ыларга нуучча тылыгар 24 баал уонна математикаҕа баазабай таһымҥа (3 сыана) эксээмэн туттарыыта ирдэнэр. Ол эрэн, үрдүк үөрэх кыһатыгар туттарсааччыларга ирдэбил быдан үрдүк.
Парламентарий иһитиннэрбитинэн, естественнай-научнай цикл биридимиэттэригэр бырагырааманы баһылаабыты туоһулуурга физикаҕа, химияҕа, биологияҕа 36 баалтан үрдүк көрдөрүү буолуохтаах. Профильнай математикаҕа – 27, информатикаҕа – 40, историяҕа уонна литератураҕа – 32, географияҕа – 37, обществознаниеҕа – 42, омук тылларыгар – 22 баал.
Бу бааллары ылыы үөрэх кыһатын төлөбүрдэх салаатыгар киириини мэктиэлээбэт. Хас биирдии үрдүк үөрэх тэрилтэтигэр эбии куонкурустар, ирдэбиллэр баар буолуохтарын сөп. Онон эбии бонустаах бааллары ааҕыы систиэмэтин үөрэтэр тоҕоостоох. Ол курдук, үнүбэрсиэттэр абитуриеннарга тус ситиһиилэрин иһин эбии 15 баал ааҕыахтарын сөп. Онно киирсэллэр уһулуччулаах аттестат, ГТО кыһыл көмүс знага, түөрт сылтан ордук волонтердааһын, олимпиадаларга кыайыылар.
Хас биирдии ситиһиигэ хас баал ааҕылларын үөрэх тэрилтэтэ бэйэтэ быһаарар. Үксүн биир көрдөрүү 5 баалтан ордугу биэрбэт. Ол эрэн, бүддьүөккэ миэстэҕэ быһаарыылаах көрдөрүү буолуон сөп.
-
0
-
0
-
0
-
0
-
0
-
0
