Саха Өрөспүүбүлүкэтин Инновация, сыыппара сайдыытын уонна инфокоммуникационнай технологияларын миниистирэ Петр Николаев Арассыыйа бөдөҥ оптоволокно кабелин оҥорооччулартан биирдэстэрэ — «Трансвок» хампаанньа бэрэстэбиитэллэрин кытары үлэлиир мунньаҕы ыытта. Көрсүһүүгэ өрөспүүбүлүкэтээҕи эпэрээтэр «АрктикТелеком» олоххо киллэрэр «Синергия Арктики» бырайыак чэрчитинэн сибээс волоконно-оптическай линияларын тутууга кабели тиэйии боппуруостара көрүлүннүлэр.
Мунньахха «Булун — Хара-Алдан», «Бирюк — Тинная» уонна «Баатамай — Сиэгэн Күөл» хайысхаларынан кабель тиэйиитэ толору кээмэйинэн түмүктэммитэ бэлиэтэннэ. Уопсайа 386 километр оптоволоконнай кабель тиэлиннэ.
Билигин «Хаандыга — Тополиное» учаастагынан матырыйаалларынан хааччыйыыга үлэ салгыы бара турар, бу хайысханан өссө 344 километр оптоволоконнай кабели тиэрдии былааннанар.
Сүбэ мунньах кэмигэр хампаанньа бэрэстэбиитэллэрэ тэрилтэ производственнай кыахтарын, улахан инфраструктуралаах бырайыактары олоххо киллэрии уопутун уонна бородууксуйа хаачыстыбатын хонтуруоллуур аныгы ньымаларын туһунан кэпсээтилэр.
«Өрөспүүбүлүкэ Аартыка уонна ыраах сытар улуустарыгар телекоммуникационнай инфраструктураны сайыннарыы эрэллээх быһаарыылары уонна хаачыстыбалаах матырыйааллары эрэйэр. Бүгүн биһиги контрактар толоруллууларын хаамыытын, тиэрдиллибит бородууксуйа бэрэбиэркэлэммит түмүктэрин уонна сибээс тутулла турар эбийиэктэрин хааччыйыыга салгыы былааннары көрдүбүт. Тириэрдиллибит кабель ирдэниллэр хаачыстыба нуормаларыгар сөп түбэһэрэ уонна "Синергия Арктики" бырайыагы олоххо киллэрии былаан быһыытынан барара суолталаах», – диэн тоһоҕолоон бэлиэтээтэ Саха Өрөспүүбүлүкэтин инновация, сыыппара сайдыытын уонна инфокоммуникационнай технологияларын миниистирэ Петр Николаев.
-
0
-
0
-
0
-
0
-
0
-
0
