Барыл бигэргэммитин туһунан Саха Сирин инновация, сыыппара сайдыытын уонна инфокоммуникационнай технологияларын миниистирэ Петр Николаев иһитиннэрдэ.
Концепция судаарыстыба былаас уорганнарын, муниципальнай тэриллиилэри, технологическай хампаанньалары, билим уонна үөрэх тэрилтэлэрин, пилота суох авиация тиһиктэрин оҥорооччулары уонна туһанааччылары, ону тэҥэ сакаас биэрэр кыахтаах дьону бииргэ түмэр соруктаах.
Докумуон уратытынан — пилота суох авиация тиһиктэрин туһаныы сценарийдарын ахсаана диэн туспа сыал көрдөрүүтэ буолла. Бу көрдөрүү экэниэмикэ уонна уопсастыбаннай олох араас салааларыгар БАС туһаныы хайысхаларын сыллата кэҥэтиини торумнуур.
«Саха Сиригэр пилота суох авиация тиһиктэрин сайыннарыы ураты суолталаах. Улахан сирдээх-уоттаах, нэһилиэнньэлээх пууннар ыраах сыталлар уонна тырааныспар ситимэ уустуктардаах буолан, саҥа технологическай быһаарыылары ирдиир. Биһиги барылбыт уратыта диэн, көдьүүстээх буолуу сүрүн көрдөрүүтүнэн БАС туһаныы сценарийдарын ахсаанын быһаарбыппытыгар сытар. Ол аата биһиэхэ технологиялары уонна инфраструктураны сайыннарыы эрэ буолбакка, сыллата кинилэри дьиҥ олоххо туһаныы эйгэтин кэҥэтии суолталаах.
Билигин номнуо бу көтөр аппарааттар тырааныспар логистикатыгар, ойуур сирин кэтээн көрүүгэ уонна баһаартан сэрэтиигэ, тыа хаһаайыстыбатыгар, доруобуйа харыстабылыгар уонна ыраах нэһилиэнньэлээх пууннарга наадалаах таһаҕаһы тиэйиигэ саҥа кыахтары арыйаллар. Биһиги бу технологиялар өрөспүүбүлүкэҕэ улахан кэскиллээхтэрин көрөбүт. Биһиги сорукпут — судаарыстыба, биисинэс уонна билим кыаҕын холбоон, Арассыыйа оҥоһууларын өйөөн, пилота суох систиэмэлэр чопчу соруктары быһаарарга уонна Саха Сирин олохтоохторун олохторун хаачыстыбатын үрдэтэргэ наадалаах тэрил буолалларын туһугар усулуобуйаны тэрийии», — диэн Петр Николаев бэлиэтээтэ.
Пилота суох авиация тиһиктэрин сайыннарыы Арассыыйа Бэрэсидьиэнэ Владимир Путин көҕүлээбит «Пилота суох авиация тиһиктэрэ» национальнай бырайыак чэрчитинэн ыытыллар.
Сонун төрдө уонна хаартыска: "Мининноваций Якутии" МАКС ханаалтан
-
0
-
0
-
0
-
0
-
0
-
0
