Судаарыстыбаннай Дуума пленарнай мунньаҕар миграция эйгэтигэр судаарыстыбаннай пошлиналары төлөөһүнү сүрүннүүр икки сокуону иккис уонна үһүс ааҕыыларга ылыннылар.
Вячеслав Володин бэйэтин МАХ ханаалыгар суруйбутунан: «Бүгүн миграннарга түһээн пошлиналара биллэ үрдээтилэр:
- 12 төгүл — 4200 солкуобайтан 50 000 солкуобайга диэри — Арассыыйа гражданствотын ыларга;
- 8 төгүл — 1920 солкуобайтан 15 000 солкуобайга диэри — быстах кэмҥэ олорорго көҥүлү ыларга;
- 5 төгүл — 6000 солкуобайтан 30 000 солкуобайга диэри — олохтоох буолууга (ВНЖ) докумуонун оҥотторорго».
«Маны таһынан, миграннары үлэҕэ ыларга көҥүл биэрэр иһин пошлина үрдүүр — хас биирдии омук исписэлииһигэр 15 000 солкуобайга диэри», — диэн эбэн эттэ.
Вячеслав Володин санатта: «Бэҕэһээ бастакы ааҕыыга үлэ миграциятын боппуруостарыгар Үлэ уонна социальнай көмүскэл министиэристибэтин боломуочуйатын сороҕун ИДьМ-ҥа (Ис дьыала министиэристибэтигэр) биэрэр туһунан сокуон барылын ылынныбыт. Манна идэлээх омук исписэлиистэрин испииһэктэрин бигэргэтии киирэр:
- судургутутуллубут бэрээдэгинэн олохтоох буолууга бырааптаахтары;
- эрэгийиэннэр сайаапкаларынан Үлэ министиэристибэтин кубуотатын таһынан үлэҕэ киирээччилэр.
«Бу быһаарыылар миграционнай бэлиитикэни салгыы тупсарарга ананаллар. 2024 сылтан Судаарыстыбаннай Дуума бу эйгэҕэ 27 федеральнай сокуону ылынна, онтон 21-рин дьокутааттар көҕүлээтилэр», — диэтэ Вячеслав Володин.
Сокуон барылларын дьүүллэһии кэмигэр Дуума Бэрэссэдээтэлэ ылыллыбыт сокуоннар «стандарты оҥороллор» диэн тоһоҕолоото: «Биһиги хомуллар пошлина кээмэйин 5-тэн 12-гэ диэри улаатыннаран, үлэҕэ киирэр көҥүлү, олохтоох буолууга бырааптаахтары (ВНЖ), гражданствотын эбэтэр биһиги дойдубутугар үөрэнэр баҕалаах кэлэр дьон таһымнарыгар сабыдыаллыыбыт», — диэтэ кини, «ол эрээри бу киhи бэйэтин суолун булбут, элбэҕи ситиспит буолуохтаах», — диэн эбэн эттэ.
«Биһиги пошлиналары үрдэтиигэ хаттаан төннүөхпүт, тоҕо диэтэр, биһиги манна саамай талааннаах, саамай көдьүүстээх дьон кэлэннэр, судаарыстыбабыт сайдыытыгар кылааттарын киллэрдиннэр диэн санаалаахпыт», — диэн Вячеслав Володин түмүктээтэ.
Хаартыска: Судаарыстыбаннай Дуума саайта.
-
0
-
0
-
0
-
0
-
0
-
0
