«Саха Сирин бастакы 100 бааллара! Арассыыйа күнүгэр биһиги киэн туттар үөрүүлээх төрүөппүт – быйылгы сыл бастакы сүүс бааллаахтара биллибиттэрэ. Саха Сириттэн алта выпускник литератураҕа, химияҕа уонна историяҕа муҥутуур түмүктэри көрдөрдүлэр. Бу оҕолор, кинилэр төрөппүттэрин, педагогтар уонна оскуолалар улахан кыайыылара», - диэн бэлиэтээтэ Айсен Николаев.
Литератураҕа муҥутуур үрдүк баалы Чурапчытааҕы гимназия выпускнига Ньургуйаана Егорова ылла. Химияҕа 100 баалы Мииринэй оройуонун 26 №-дээх орто оскуолатыттан Ринчин Бальжиев, Өрөспүүбүлүкэтээҕи лицей-интернаттан Сергей Егоров уонна Ньургун Жирков, ону тэҥэ Аартыка оскуолатыттан Серафима Тен ыллылар. Историяҕа муҥутуур баалы Аартыка оскуолатын выпускнига Алтын Егоров ситистэ.
Өрөспүүбүлүкэ баһылыга хас биирдии үрдүк көрдөрүү кэннигэр выпускниктар дьаныардаах үлэлэрэ, дьиэ кэргэн өйөбүлэ уонна педагогтар идэлэрин таһымнара туралларын тоһоҕолоото.
«Хас биирдии маннык түмүк кэнниттэн улахан үлэ, майгы-сигили, диссипилиинэ, дьиэ кэргэн өйөбүлэ уонна күүстээх оскуола турар. Төрөппүттэргэ уонна учууталларга махталбын тиэрдиэхпин баҕарабын, кинилэр аттыларыгар бааллара, өйөөбүттэрэ, ирдээбиттэрэ, көмөлөспүттэрэ уонна үөрэнээччилэригэр эрэммиттэрэ», - диэтэ Айсен Николаев.
Кини Саха Сиригэр БКЭ-ҕэ 100 баалы ылбыт выпускниктары өйүүр миэрэ баарын санатта. Хас биирдии сүүс баалы ситиспиккэ 100 тыһыынча солкуобайдаах биир кэмнээх харчынан төлөбүр оҥоһуллар.
«Бүгүн Сахабыт Сирэ барыта выпускниктарбыт бастакы ситиһиилэриттэн киэн туттар. Бу үрдүк түмүк саҥа суолу арыйыа, саҥа кыайыылары уонна улахан кыахтары аҕалыа диэн эрэнэбин. Кинилэр билиилэрэ, майгылара уонна төрөөбүт дойдуларыгар тапталлара бу суолу дьоһуннаахтык туоруулларыгар көмөлөһүөҕэ», - диэн тоһоҕолоон эттэ эрэгийиэн салайааччыта.
2026 сылга Саха Сиригэр 8,4 тыһыынчаттан тахса кыттааччы БКЭ форматынан судаарыстыбаннай түмүктүүр аттестацияны ааһар. Экзаменационнай хампаанньа салҕанар, атын биридимиэттэргэ түмүктэр түһүмэхтэринэн киирэллэр.
Сонун төрдө уонна хаартыска:
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата
-
0
-
0
-
0
-
0
-
0
-
0
