Балаҕан ыйын 1 күнүттэн сокуоҥҥа уларытыылар күүһүгэр киирэллэр, ол пассажирдар сыыппаранан идентификацияларын кыаҕын кэҥэтэр. Билигин «Макс» мессенджер нөҥүө чэпчэтиинэн туһанааччы ыстаатыһын бигэргэтиэххэ сөп, ити уопсастыбаннай тырааныспар пассажирдарыгар да, хонтуруоллуур үлэһиттэргэ да олохторун биллэ судургутутуоҕа. Күһүн кэлиитинэн транспорт эйгэтигэр өссө ханнык уларыйыылар тахсыахтарай? Бу туһунан «Парламентская газета» суруйар.
Чэпчэтиини судургутутуу уонна саҥа сервистэр
Тырааныспарка министиэристибэ санатарынан, балаҕан ыйын 1 күнүттэн саҥа быраабылалар күүһүгэр киирэллэр.
Ол курдук, күһүн кэлбитинэн, куорат таһынааҕы пуойас билиэтин онлайн көрүҥүнэн төнүннэриэххэ сөп буолуоҕа, каассаҕа тиийэр наадата суох буолар.
Ыраах айаннааччылары эрдэттэн төлөпүөнүнэн эбэтэр электроннай почтанан рейс көтүллэрэ, маршрут уларыйара эбэтэр расписание хамсааһына буоларын туһунан сэрэтиэхтэрэ.
Хамсанар кыахтара хааччахтаах пассажирдарга ураты болҕомто ууруллуоҕа: инбэлиит кэлээскэтинэн сылдьар дьоҥҥо миэстэни түҥэтиигэ бастакынан бэриллиэҕэ. Ону тэҥэ аэропортарга да, салгын аалларыгар да инбэлииттээх пассажирдары хааччыйыы чуолкай стандартара киллэриллиэхтэрэ. Бу стандартар инфраструктура аспектарыгар эрэ буолбакка, арыаллааһын бэрээдэгэр, көмөнү тэрийиигэ уонна көтүү бары этааптарыгар өҥөнү оҥорууга эмиэ сыһыаннаахтар.
Тимир суол билиэтин төнүннэрии иһин хомууру ылыы бэрээдэгин уларытарга этии киллэрдилэр
Ону тэҥэ кэммиэрчэскэйэ суох сыалларга туһаныллар гражданскай беспилотник пилоттарыгар мэдиссиинэ ирдэбиллэрэ сымнаатылар. Бу үлэлиэн баҕалаахтарга сайдалларыгар саҥа кыаҕы арыйар, ол иһигэр анал байыаннай дьайыы бэтэрээннэригэр, БПЛА-ны салайыыга уопуттаах дьоҥҥо.
Уопсастыбаннай тырааныспарга чэпчэтиилээх айанынан туһанар быраабы бигэргэтии процедурата «Макс» мессенджери туһанар кыах баарынан судургутуллар. Бу чэпчэтиилээх пассажиырдар бэрэбиэркэни ордук табыгастаахтык ааһалларыгар кыаҕы биэриэҕэ.
Социальнай хайысха
Госдуума дьокутаата Алексей Говырин «Парламентская газетаҕа» кэлэр уларыйыылар сүрүн балаһыанньаларын быһаарда.
Ол курдук, куорат таһынааҕы пуойастар интэриниэт-порталынан эбэтэр тиэйээччи мобильнай сыһыарыытынан атыылаһыллыбыт билиэттэри интэриниэтинэн төнүннэриэххэ сөп. Төнүннэрии усулуобуйата оннунан хаалар: толору харчыны (хомуурун көҕүрэтэн) пуойас барарын икки чаас иннинэ туттардахха төннөрүллэр, оттон икки чаастан кэлин туттардахха — сыанатын 50% ылыллар.
Ыраах айаннааччыларга тиэйээччи рейс көтүллэрин, маршрут уларыйарын эбэтэр састаап солбулларын туһунан эрдэттэн төлөпүөнүнэн эбэтэр электроннай почтанан биллэриэхтээх. Дьокутаат тоһоҕолоон эппитинэн, бу вокзалга кэлиэхтэрин иннинэ суолталаах көннөрүүлэр тустарынан билэллэригэр кыаҕы биэриэҕэ.
Электричкалар табыгастаах уонна тупсаҕай буолуохтара
Хамсанар кыахтара хааччахтаах пассажирдарга мэктиэлэр кэҥэтиллиэхтэрэ. Пуойастарга анал оборудованиелаах миэстэлэр бастакы уочарат инбэлиит кэлээскэтинэн туһанааччыларга бэриллиэхтэрэ. Аэропортарга босхо арыаллааһын, кэлээскэлэри биэрии, регистрацияҕа, көрүүгэ-истиигэ уонна таһаҕаска көмөлөһүү былааннанар. Салгын аалыгар эрдэттэн сөптөөх миэстэни босхо талыахха сөп буолуоҕа, оттон арыаллатыы наада буоллаҕына — аттынааҕы миэстэни эбии төлөбүрэ суох ылыахха сөп.
Чэпчэтиинэн туһанар категориялаах гражданнар тиэйээччи маннык техническэй кыахтаах буоллаҕына, «Макс» мессенджер нөҥүө электроннай көрүҥүнэн чэпчэтиилээх айанынан туһанар бырааптарын бигэргэтиэхтэрэ.
Кэммиэрчэскэйэ суох үлэҕэ туһаныллар гражданскай беспилотник пилоттарыгар булгуччулаах медицинскэй көрүүлэр испииһэктэрэ кыччыыр, оттон үһүс кылаастаах медицинскэй түмүк болдьоҕо биэс сылга диэри уһатыллар.
«Бу идэҕэ киириигэ кыаҕы кэҥэтэр, ол иһигэр сөптөөх уопуттаах бэтэрээннэргэ», — диэн быһаарда.
-
0
-
0
-
0
-
0
-
0
-
0
