Общество

Бу туһунан Дьокуускай куорат 1 №-дээх поликлиникатын педиатр бырааһа Светлана Анисимова  кэпсээтэ.

Дьөлүһүөн тугунан туһалааҕый?

Дьөлүһүөнү үксүн чэй курдук оргутан иһэллэр. Бу утах элбэх битэмииннээх — бастатан туран, С битэмиини (аскорбиновай кислота), ону таһынан Р битэмиини, каротиноидтары, флавоноидтары, органическай кислоталары уонна пектиныннарынан баай. Ону сэргэ бу утах атын биологическай актыыбынай эттиктэрдээх: организм инфекцияларга утарсар кыаҕын күүһүрдэр, углеводнай уонна минеральнай атастаһыыга кыттар, сүһүрүүнү утарсар, быар үлэтин тупсарар дьайыылаах. Итини таһынан эт-сиин чөлүгэр түһүүтүн түргэтэтэр, тымырдары кытаанах уонна халыҥ гынар.

Норуот мэдиссиинэтигэр артритка, быар, үөс ыарыыларыгар, атеросклерозка, уойууга, бүөр ыарыытыгар, мөлтөх турукка уонна ыалдьан баран үтүөрүү кэмигэр туһаналлар.

Кимнээх ордук туһаналларый?

Дьөлүһүөн уута тумуу саҕаламмытыгар, ас буһарар систиэмэ кэһиллиитигэр, эттиктэр атастаһыылара мөлтөөһүнүгэр, ону тэҥэ дьахталлар ыйдааҕы ыарыыларыгар көмөлөһүөн сөп. Маны таһынан норуокка эр киһи күүһүн чөлүгэр түһэрэргэ диэн итэҕэл тарҕаммыт эрээри, билигин даҕаны билим  өттүнэн бигэргэнэ илик.

Хайдах сөпкө бэлэмниибит?

Настойканы оҥорорго 10 г (1 ост. нь.) отон наада. Отону сууйан баран көстүрүүлэҕэ кутабыт, 200 мл (1 ыстакаан) оргуйбут сылаас ууну кутан сабабыт уонна уулаах бааҥкаҕа (водяная баня) 15 мүнүүтэ устата сылытабыт. Салгыы сойута уурабыт (45 мүн.), сиидэлиибит, хаалбыт отоммутун ыгабыт. Барыта холбоон 200 мл буолуохтаах. Оҥоһуллубут утаҕы тымныы сиргэ икки күнтэн уһуннук туппаккыт.

Төһөнү уонна хайдах иһэбит?

Сылаас настойканы аһаан баран иһиллэр. Улахан дьон 50–100 мл күҥҥэ 2–3 төгүл, 5–7 саастаах оҕолор 10–15 мл күҥҥэ 2 төгүл, 8–14 саастаах оҕолор 20 мл күҥҥэ 2 төгүл иһэллэр.

Эмтэнии болдьоҕун быраас доруобуйа туругуттан, туох содуллааҕыттан көрөн анаатаҕына табыллар. Дьөлүһүөҥҥэ  С битэмиин элбэх буолан, бу битэмииннээх атын эмтэри кытта бииргэ иһэр бобуллар.

Кимиэхэ бобулларый?

Дьөлүһүөн настойкатын 5 сааһыгар диэри оҕолорго, этэ-сиинэ ылыммат дьоннорго иһэр көҥүллэммэт. Хат уонна эмтэрэр дьахталлар быраастыын сүбэлэһэн баран истэхтэринэ сатанар. Ону таһынан үөс тааһырыытыгар, хаан хойдоругар, тромбофлебиэккэ, тромбозка, хаан эргийиитэ мөлтөөһүнүгэр, сахар диабеттаах дьоҥҥо, бүөр ыарахан ыарыытыгар, эндокардикка анаммат.