Тэрээһин үс бэлиэ даатаҕа ананар: Арассыыйа Бэдэрээссийэтин Норуоттарын сомоҕолоһуутун сылыгар, Саха Өрөспүүбүлүкэтигэр Култуура сылыгар уонна Саха Өрөспүүбүлүкэтин Уопсастыбаннай палаататын 15 сылыгар. Пуорум былаас, кэмиэрчэскэйэ суох тэрилтэлэр, ыччат холбоһуктара, үтүө көмөһүттэр уонна актыыбынай дьон кэпсэтэр, кыһалҕалары ырытыһар сүрүн былаһааккаларынан буолуоҕа.
Форум бастакы күнэ практическай төрүккэ ананна. Кэмиэрчэскэйэ суох тэрилтэлэр бэрэстэбиитэллэригэр эрэгийиэннээҕи уонна федеральнай граннарга кыттыыга үөрэтэр сиэссийэ ыытылынна. Кыттааччылар бастыҥ быраактыкалары билистилэр, эспиэрдэри уонна былаас уорганнарын бэрэстэбиитэллэрин кытта кэпсэттилэр, ону тэҥэ социальнай көҕүлээһиннэри үбүлээһин саҥа кыахтарын туһунан иһитиннэриини ыллылар.
Ыччат дьыалаларыгар уонна социальнай коммуникацияларга миниистири солбуйааччы Александр Максимов уопсастыбанньыктарга эҕэрдэ тыл эттэ:
-- Үтүө күнүнэн, күндү доҕоттор! Саха Өрөспүүбүлүкэтин Ыччат дьыалаларыгар уонна социальнай коммуникацияларга министиэристибэтин аатыттан грант күрэстэригэр кыттааччылар сиэссийэлэригэр ис сүрэхтэн эҕэрдэлиибин. Бу сиэссийэни биһиги гражданскай пуорум чэрчитинэн сыллата ыытабыт. Сарсын пуорум иккис күнэ буолуоҕа: сарсыардаттан эбиэккэ диэри араас хайысханан биэс былаһаакка үлэлиэҕэ. Эһиги хас биирдиигит бэйэҕитигэр интэриэһинэй былаһаакканы булуоххут дии саныыбын. Эбиэт кэнниттэн пленарнай сүбэлэһии саҕаланыа.
Атырдьах ыйын 12 күнүгэр биһиги куораппытыгар Үлэ кыбаарталыгар Бэрэсидьиэн пуондатын култуурунай көҕүлээһинин бырайыактыыр офиһа арыллыбыта. Бу уопсастыбаннай тэрилтэлэр, култуура, ускуустуба, креативнай индустрия хайысхаларынан бырайыактардаах дьон сайдыыларыгар олус суолталаах хардыы.
Бүгүҥҥү сиэссийэ бырагырааматын эһиэхэ интэриэһинэй оҥоро сатаатыбыт. Бүгүн эһиэхэ анаан бырайыактыыр офис бэрэстэбиитэлэ сүбэлэри биэриэ. Ону тэҥэ, спикердар ордук элбэхтик тасар алҕастар тустарынан кэпсиэхтэрэ. Ил Дархан граннарын туһунан дакылааччыттар эмиэ сырдатыахтара. Олус интэриэһинэй тиэмэ — граннары оҥорорго көмө буолар оҥоһуу өй. Грант кыайыылаахтара уопут атастаһыахтара.
Бүгүҥҥү күҥҥэ биһиги өрөспүүбүлүкэбитигэр үөскүүр чаҕылхай идиэйэлэр кумааҕыга хаалан хаалбаттарыгар туох барыта баар. Эһиги энергияҕыт, эйгэни тупсарар баҕаҕыт эрэ наада».
Үөрэтэр сиэссийэ чэрчитинэн кыттааччылар иннилэригэр идэлээх эспиэрдэр уонна практиктар таҕыстылар.
Пуорум иккис күнэ биэс дискуссия былаһааккатын үлэтинэн салҕаныаҕа, ол кэннэ дэлэгээттэр түмүк пленарнай мунньахха мустуохтара. Тэрийээччилэр тоһоҕолоон бэлиэтииллэр: бүгүн өрөспүүбүлүкэҕэ олохтоохторо уйгуларын хааччыйарга уонна хоту дойду ураты култуурунай куодун харыстыырга туһуламмыт саамай хорсун идиэйэлэри олоххо киллэрэргэ бары усулуобуйалар тэрилиннилэр.
-
0
-
0
-
0
-
0
-
0
-
0
