-- Дойду Аҕа баһылыга бэлиэтээбитинэн, сүрүн көрдөрүүлэринэн Уһук Илин сайдыытын тэтимэ дойду орто көрдөрүүтүн аһара түспүт, бу — биһиги уопсай ситиһиибит. Бу үлэ ис хоһооно — киэҥ нэлэмэн сирдэри баһылааһын эрэ буолбатах, манна дьон-сэргэ бэйэлэрин инники кэскиллэрин кытта ситимниир усулуобуйаларын тэрийии буолар. Саха Өрөспүүбүлүкэтигэр бу ыйытыылар ураты суолталаахтар. Эрэллээхпин, экэниэмикэ үүнүүтэ бастатан туран дьон олоҕун хаачыстыбатыгар көстүөхтээх.
Саҥа түһүмэх тирэҕинэн 2036 сылга диэри Уһук Илин федеральнай уокуругу сайыннарыы Стратегията уонна Аартыка зонатын сайыннарыы Стратегията буолуохтара. Сүрүн быһаарыылартан биирдэстэрэ — 2027 сыл тохсунньу 1 күнүттэн Бириэмэ иннигэр сайдар сирдэри-уоттары (ТОР) биир кэлим территорияҕа көһөрүү буолар. Саҥа эрэсиим билигин баар бары өҥөлөрү оннунан хаалларарын таһынан, административнай процедуралары кыччатыахтаах уонна чэпчэтиилэри Уһук Илин бүттүүнүгэр, анал былаһааккаларынан эрэ муҥурдаммакка, киллэрэр кыаҕы биэриэхтээх. Бу ньыма көдьүүстээҕин практика көрдөрдө: уон сыл иһигэр чэпчэтиилээх эрэсиимнэр резиденнэрэ бүддьүөккэ 723 миллиард солкуобай нолуогу төлөөбүттэр, оттон бэриллибит чэпчэтии кээмэйэ 373 миллиард солкуобайга тэҥнэспит.
Мин санаабар, бу сайдыы саҥа модела Саха Сиригэр оҥорон таһаарар уонна технологическай бырайыактары олоххо киллэриигэ, урбааны өйөөһүҥҥэ уонна үлэ миэстэтин тэрийиигэ элбэх кыаҕы биэриэхтээх. Манна сыһыаран, Бэрэсидьиэн саҥа көҕүлээһиннэр урукку быһаарыылары тохтоппотторун, бары дьаһаллар хайаан да толоруллуохтаахтарын тоһоҕолоон эттэ. Саҥа кыахтары эппиэтинэһи кытта дьүөрэлээһин өрөспүүбүлүкэ олохтоохторун интэриэстэригэр туруктаах сайдыыны хааччыйыаҕа.
Санатан эттэххэ, балаҕан ыйын 1 күнүттэн 4 күнүгэр диэри Владивосток куоракка XI Илиҥҥи экэнэмиичэскэй пуорум буола турар.
Пуорумҥа аан дойду 70–80-тан тахса дойдутуттан 5 тыһыынча кэриҥэ дэлэгээт кэллэ. Үрдүк сололоох ыалдьыттар ортолоругар Индонезия бэрэсидьиэнэ Прабово Субианто, Монголия премьер-миниистирэ Ням-Осорын Учрал, Мьянма вице-бэрэсидьиэнэ Ньо Со уонна КНР судаарыстыбаннай сэбиэтин вице-премьерэ Дин Сюэсян бааллар.
-
0
-
0
-
0
-
0
-
0
-
0
