Ол курдук, VK хампаанньа айан таһаарбыт Арассыыйатааҕы нассынаалынай МАКС мессенджерэ бүтэһик икки сыл иһигэр иннин диэки улахан хардыыны оҥордо. Бастаан платформа коммуникация үнүстүрүмүөнүн быһыытынан биллэриллибит буоллаҕына, бүгүн кини дьиҥнээх, судаарыстыбаннай далааһыннаах сыыппара экосистиэмэтигэр кубулуйан эрэр. Салгыы бу туһунан ырытыахпыт.
Чааттан сыыппара систиэмэтигэр
Платформа архитектурата сүрүнэ суруйсуу эрээри, атын сүүһүнэн сиэрбистэргэ киирии аартыгын тэлээччинэн буолар. Биир интерфейскэ классическай мессенджер, харчы ыытар систиэмэ, кыра сыһыарыылар, биисинэс чаат боттара уонна Оҥоһуу өй холбоммуттар.
Үп-харчы эпэрээссийэлэрэ сиэрбис биир сүрүн функциятыгар кубулуйда. Туһанааччылар харчыны хантаактарыгар диалог түннүгүн иһинэн быһа ыытыахтарын сөп, оччоҕуна кэпсэтии уонна баан сыһыарыыларын икки ардыларыгар боруок сотуллар. Оҥорооччуларга уонна биисинэскэ нассынаалынай мессенджер иһигэр «MAКС для бизнеса» салаа аһыллан, кинилэр ону туһанан бэйэлэрин сиэрбистэрин оҥорор кыахтаахтар.
Биисинэс уонна судаарыстыба үнүстүрүмүөннэрэ
Корпоративнай сиэктэргэ уонна судаарыстыбаннай тэрилтэлэргэ табыгастаах сыһыарыынан буолар. Маныаха ааспыт сыл алтынньы 23 күнүттэн толору партнер быһыытынан хампаанньалар маннык үнүстүрүмүөннэринэн туһанар кыахтаахтар:
Чат-боттар: 30-тан тахса CRM-систиэмэни уонна боттары оҥорор платформалары кытта бэлэм интеграция килийиэн сайаапкаларын суукканы эргиччи переработкалыырга көмөлөһөр. Холобур, Mango Office контакт-киинин кытта интеграция номнуо олоххо киирбит.
Кыра сыһыарыылар: биисинэс атыылаһааччыны тас ресурсаларга көһөрбөккө эрэ, мессенджер иһигэр онлайн-витриналары уонна саайтары арыйан, быһа атыыны тэрийэр кыахтаах.
Сыыппара ID: табаары атыылаһарга киһи сааһын бигэргэтэр эбэтэр чэпчэтиилээх ыстаатыстарын бэрэбиэркэлиир. Судаарыстыбаннай өҥө порталын уонна партнер-бааннары кытта ситимнээхтик үлэлиир.
Маныаха корпоративнай аккауннарга сүрүн ирдэбил -- верификация. Хампаанньа бэйэтин аккаунун оҥороругар бас билээччи буолара булгуччулаах. Ол Судаарыстыбаннай өҥө порталынан эбэтэр баан нөҥүө бигэргэтиллэр. Инньэ гынан, бренд албын бэрэстэбиитэлистибэлэрэ тахсалларын бопсор.
Куттал суох буолуута
Кибер куттал элбээн турар кэмигэр тус дааннайдары харыстааһын бастакы миэстэҕэ турар сыалынан-соругунан буолар. Платформа маныаха хас да таһымнаах көмүскэл систиэмэтин киллэрбит:
- Икки фактордаах аутентификация;
- «Безопасный режим» анал эрэсиим;
- «Семейная защита» хайысха.
Бу барыта туһанааччы профилигар «Безопасность» салааҕа баар. Ону таһынан, атын дойдулар туһанааччыларын кытта суруйсуу, спамтан уонна баҕарбат эрийиилэртэн көмүскэл, онуоха нүөмэрдэри утарыта эбэн баран кэпсэтии кыаллар.
Платформа кибер куттал суох буолуутун чинчийээччилэригэр итэҕэһи буллахтарына бириэмийэ төлүүр.
Норуоттар икки ардыларынааҕы бэрээдэк
Бастакыттан Арассыыйа ырыынагар анаммыт платформа географията түргэнник кэҥиир. 2025 сыл сэтинньитигэр аудио уонна видеоэрийиилэринэн туһанар, ону тэҥэ суругунан атастаһар кыах Арассыыйаттан уонна Белоруссияттан ураты өссө СНГ сэттэ дойдутугар баар буолла.
Маны сэргэ, МАКС күннээҕи саҥа инфраструктураны тэрийэр: судаарыстыбаннай өҥөлөр, баан транзакциялара, атыылаһыылар уонна тус кэпсэтиилэр биир эрэллээх эйгэҕэ баар буолаллар. Туһанааччы ахсаанын улаатыыта уонна технологическай партнердары холбооһун түргэнин учуоттаатахха, бу платформа икки-үс сылынан мөлүйүөнүнэн Арассыыйа олохтоохторун тирэх сыыппара үнүстүрүмүөнүнэн буолар чинчилээх.
Сыыппаранан идентификация
Ордук суолталаах уларыйыынан сыыппара ID (пааспар) киириитэ буолла. 2025 сылтан сыһыарыы биометрияны ааспытын кэнниттэн Судаарыстыбаннай өҥө дааннайдарын хачайдыыр, онон 18 саастарын ааспыт дьон РФ пааспарын, суоппар дастабырыанньатын, ОМС полиһын, СНИЛС уонна ИНН электроннай барыйааннарын харайар кыахтаннылар.
Дьон-сэргэ уонна урбаан бииргэ үлэлээһинэ судургутуйда. Маныаха QR-куодтартан 30 мүнүүтэ туһалаах болдьохтоох юридическай докумуоннарга көһүүтэ бу улахан уларыйыынан буолар. Куод кылгас кэм эрэ туттуллара куттал суох буолуутугар быһаарыы буолар: скриншот эбэтэр хаартыска отут мүнүүтэнэн туһалыырын сүтэрэр, ол түөкүннээһинтэн көмүскэнэргэ элбэх уустук шифрдааһын систиэмэтинээҕэр ордук көдьүүстээх диэн эспиэрдэр этэллэр.
Бу идиэйэ быраактыкаҕа хайдах үлэлиирин билигин көрөбүт. 2026 сыл балаҕан ыйын 1 күнүттэн МАКС сыһыарыыттан ылыллыбыт сыыппара пааспарынан 50-тан элбэх нүөмэрдээх отельга киирии булгуччулаах буолла. Маныаха үлэ хаамыыта маннык: ыалдьыт «Цифровой ID» салааны арыйар, администратор куоду сканируйдуур, оччоҕуна дааннайдар отель систиэмэтигэр тута киирэллэр. Бу табыгастаах буолуу эрэ буолбатах, бу илиинэн дааннайдары киллэрии алҕаһын аҕыйатар уонна административнай ноҕуруусканы намтатар.
2026 сыл алтынньытыттан массыыналаах суоппардарга маннык кыах баар буолуоҕа: ГИБДД иниспиэктэригэр сыһыарыы нөҥүө электроннай дастабырыанньалары уонна массыынаны регистрациялааһын туһунан сибидиэтэлистибэни көрдөрүөххэ сөп. Маны туһаныы булгуччута суох, сыыппара докумуоннар кумааҕы оригиналлары солбуйбаттар, онно эбии буолаллар.
Туһанааччы уопута
2026 сыл атырдьах ыйыгар платформа мультиаккаунт диэн функцияны холбоото, Android төлөпүөн эбэтэр атын тиэхиньикэни туттар дьон биир сыһыарыыга икки профильга түргэнник көһө-көһө, хос авторизацията суох үлэлиир кыахтаннылар.
Бу хардыы оҥорооччулар аудитория дьиҥнээх быһыытын-майгытын өйдүүллэрин көрдөрөр. Үлэ уонна тус олох быыстала суох силбэһэр кэмигэр, биир сыһыарыы иһигэр профиллары араарыы куруутун киирэртэн-тахсартан уонна суруйсуулар бутуллууларыттан босхолуур. Үлэлиир хайысха кэҥиирэ барытыгар систиэмэлээх сыһыан баарын туоһулуур.
Кыра сыһыарыылар
МАКС super-app мадьыалынан сайдар, манна тирэх мессенджер элбэх сиэрбиһин акылаата буолар. Этэн аһарбыппыт курдук, отеллэргэ олохсуйуу, ИДьМ-гэр биллэриилэри оҥоруу, судаарыстыба уорганнарын үлэһиттэригэр массыына ааҕар дэбиэриннэстэри кытта үлэни өйөөһүн о.д.а. өҥөлөр.
Ситиһиилэр баалларын үрдүнэн, уустуктар сүтэ иликтэр;
– кыра биисинэс тиэхиньиичэскэй бэлэмэ. 50-тан аҕыйах нүөмэрдээх отеллэр МАКС-ы кытта булгуччулаах интеграцияттан 2028 сылга диэри босхолоноллор, ол эрэн эспиэрдэр ырыынак баттабылын сабаҕалыыллар: ыалдьыттар цифровай ID-нан киирэри ирдиэхтэрэ, онон кыра биисинэс болдьоҕун иннинэ адаптацияланарыгар тиийиэҕэ;
– верификация инфраструктурата. Систиэма толору үлэлииригэр үлэһиттэр QR-куодтары сканердыыр «Госкан» курдук сыһыарыылаах уонна массыына ааҕар дэбиэриннэстэринэн үлэлииргэ үөрэниэхтээхтэр. Бу куорат тас өттүгэр баар тэрилтэлэргэ киритиэрийи үрдэтэр;
– быраапка асимметрия. Интэриэһинэйэ диэн, тас дойду кыраасданнарын миграционнай учуота билигин да үгэс буолбут ньыманан ыытыллар. Арассыыйа кыраасданнарыгар анаммыт 713 №-дээх уураах саҥардыллыбыта, ол эрэн 109-ФЗ сокуоҥҥа (тас дойду кыраасданнарын туһунан) итинник көннөрүүлэр киирэ иликтэр.
Стратегическай суолта
МАКС омук мессенджердэрин солбуйарга эрэ анаммат. Куттал суох буолуутун хааччыйан туран киһини кырасданыын быһыытынан сыыппара эйгэтигэр бигэргэтэр, докумуоннары көрдөрөр, судаарыстыбаннай өҥөнү ылар уонна дьыалабыай коммуникацияны ыытар кыаҕы олохтуур.
Функциялары түһүмэхтээн киллэрии хааччахтаах аудиторияҕа тиэс быһыытынан саҕаланар, кэлин табыллыбыт быһаарыылар кэҥэтиллэн иһэллэр. Сыһыарыыга киириигэ биометрияны туһаныы дааннайдарга итэҕэл таһымын үрдэтэр. Оттон баар судаарыстыбаннай сиэрбистэри кытта интеграцияны туһанааччылар утарсыыларын намтатар, кинилэр букатын атын үнүстүрүмүөннэргэ үөрэнэллэрэ наадата суох.
Түмүккэ
МАКС нассынаалынай сыыппара дойду үрдүнэн сүрүн сыһыарыы буоларга эрэллээхтик хардыылыыр. Бу ситиһии үс фактортан тутулуктаах: тиэхиньиичэскэй инфраструктура тохтоло суох үлэлиэхтээх, биисинэс түргэнник киириэхтээх уонна туһанааччыга табыгастаах буолууну кытта куттал суох буолуутун ирдэбилин икки ардыларыгар биир тэҥи тутуһартан. Билиҥҥи көрдөрүүлэр бу салаа табыгастааҕын итэҕэтэллэр, сыыппара Арассыыйа хас биирдии олохтооҕун сиэбигэр киирэн эрэр.
Галина МАТВЕЕВА.
Хаартыскалар: ВКонтакте сыһыарыыга МАКС ханаал
-
0
-
0
-
0
-
0
-
0
-
0
