Тэрээһини кэмитиэт бэрэссэдээтэлэ Светлана Давыдова салайан ыытта. Кэпсэтиигэ норуот дьокутааттара, Доруобуйа харыстабылын министиэристибэтин, Булгуччулаах мэдиссиинэ страховкатын территориальнай пуондатын бэрэстэбиитэллэрэ, ону тэҥэ Дьокуускай куорат IT-хампаанньаларын салайааччылара кытыннылар. Улуустартан балыыһалар бэрэстэбиитэллэрэ онлайн-трансляция нөҥүө холбоннулар.
Мунньах сүрүн ис хоһооно
Доруобуйа харыстабылын миниистирин солбуйааччы Надежда Федорова эйгэни сыыппараҕа көһөрүү хайдах баран иһэрин туһунан дакылаат оҥордо. Сүрүн болҕомто мэдиссиинэ информационнай систиэмэлэрин бииргэ үлэлэтиигэ уонна докумуоннары электроннай көрүҥҥэ көһөрүүгэ уурулунна. Бу быһаарыы быраастар сурук үлэтин чэпчэтиэхтээх.
Булгуччулаах мэдиссиинэ страховкатын территориальнай пуондатын бэрэстэбиитэлэ Прокопий Дьячковскай Федеральнай пуондаттан саҥа ирдэбиллэр тустарынан кэпсээтэ. Эмтээһин чопчу киһиэхэ оҥоһуллубутун учуоттааһын (персонифицированнай учет) үбү-харчыны тыырыыны ордук көдьүүстээх уонна дьэҥкэ оҥоруохтаах.
Мунньах өссө биир тиэмэтинэн «Скайберия» хампаанньа генеральнай дириэктэрэ Афанасий Аргунов дакылаата буолла. Кини Арассыыйаҕа оҥоһуу өйү (ИИ) сүрүннээһин туһунан эттэ.
«Интегрум плюс» ХЭУо бэрэстэбиитэлэ Радислав Гатилов IT-эйгэ үлэһиттэрин көрүүтүн билиһиннэрдэ. Кини «Балыыһаны сыыппаранан салайыы» дакылаатыгар информационнай технологиялар быраас бириэмэтин кэмчилииллэрин, дааннайдар хаачыстыбаларын үрдэтэллэрин уонна тэрилтэ үбэ-харчыта туруктаах буоларын хааччыйалларын туһунан кэпсээтэ.
Мунньах түмүгүнэн Светлана Давыдова бэлиэтээбитинэн, сыыппараҕа көһүү — бу кэм ирдэбилэ. Бу бырааһы кумааҕы үлэтиттэн босхолоон, дьону эмтииригэр бириэмэни биэриэхтээх диэн эттэ.
Мунньах туһунан сиһилии “Ил Түмэн” хаһыат аныгыскы нүөмэригэр ааҕыҥ.
-
0
-
0
-
0
-
0
-
0
-
0
