Арассыыйа үрдүнэн ортотунан мэдиссиинэ көмөтүнэн нэһилиэнньэ 58,3% астыммыт.
2026 сыл балаҕан ыйыгар нэһилиэнньэ мэдиссиинэ көмөтүнэн астыммыт саамай үрдүк көрдөрүүлэрин Чеченскэй Өрөспүүбүлүкэ көрдөрбүт — 89,3%. Саха Сирин сэргэ лиидэрдэр биэс бастыҥнарыгар Алтай Өрөспүүбүлүкэтэ (73,4%), Челябинскай уобалас (72,3%) уонна Москуба (71,9%) киирдилэр.
Өрөспүүбүлүкэ баһылыга Айсен Николаев эрдэ бэлиэтээбитинэн, кэлиҥҥи сылларга инфарктан өлүү 36%, инсультан — 24% түспүт, оттон искэн ыарыыта 46% эрдэ булуллар.
Сүрүн түмүктэртэн биирдэстэрэ — материальнай-тиэхэньиичэскэй баазаны саҥардыы. Кэлиҥҥи сылларга Онкологическай, Кардиологическай уонна Перинатальнай кииннэри тутуу сэргэ, улуустар балыыһаларын, поликлиникалары, суһал көмө ыстаансыйаларын саҥардыы ыытыллар, ФАП-тары (быраас пууннара) уонна амбулаториялары тутуу барар.
Саха Сиригэр телемэдиссиинэ эмиэ сайдар. Нассынаалынай мэдиссиинэ киинин уонна федеральнай килииникэлэр исписэлиистэрин сүбэлэринэн, ыраах сытар нэһилиэнньэлээх пууннар быраастара уустук түбэлтэлэргэ биир идэлээхтэриттэн суһаллык көмөнү ылаллар.
«Биһиги мэдиссиинэ көмөтүн тиксимтиэ оҥорууну хааччыйабыт, инфраструктураны тупсарабыт, эмтээһини уонна диагностиканы ыытыы инники күөҥҥэ сылдьар технологияларын киллэрэбит уонна идэлээх каадырдары бэлэмниибит. Бу кэлимсэ үлэ түмүктэри биэрэр, ол нэһилиэнньэ мэдиссиинэ көмөтүн хаачыстыбатыттан астыммыт таһыма үрдүүрүгэр быһаччы көстөр», — диэн Саха Сирин доруобуйа харыстабылын миниистирэ Лена Афанасьева бэлиэтээтэ.
Нэһилиэнньэ мэдиссиинэ көмөтүн астыммытын ааҕыы ньыматын Арассыыйа Доруобуйа харыстабылын министиэристибэтэ 2022 сыллаахха бигэргэппитэ. Бу көрдөрүү мониторина «Уһун уонна көхтөөх олох» нассынаалынай бырайыак чэрчитинэн «Доруобуйа харыстабылын сүрүн звенотын модернизациялааһын» федеральнай бырайыак иһинэн ыытыллар.
Сонун төрдө уонна хаартыска: СӨ бырабыыталыстыбатын МАКС ханаала
-
0
-
0
-
0
-
0
-
0
-
0
