Устуоруйаны кыратык сэгэттэххэ, Кириэмил кыһыл сулуһунан ыраахтан күлүмүрдүүр килбиэннээх Москуба куоракка ымсыырааччы, дураһыйааччы былыр да элбэх этэ. XVII үйэ саҕаланыытыгар ыраахтаҕы Иван Грознай күн сириттэн күрэммитин кэнниттэн кини уола Федор I Иоаннович дойдуну салайбыта. Ол эрэн ыраахтааҕы бэйэтин кэнниттэн оҕону-урууну кыайан хаалларбакка Рюриковичтар аҕа ууһа быстар кутталламмыта.
Онуоха Иван Грознай кыра уолун царевич Дмитрийи санаан кэлбиттэрэ, дьиҥэр, кини өйдөммөт быһыыга-майгыга түбэһэн, олохтон туораабыт сурахтааҕа эрээри, баҕар, тыыннаах буолуо диэн эрэл кыыма кылайбыта. Быыһык кэмҥэ итинник балаһыанньаны туһанан, араас дьон албыннаан былааска тахса сатаабыттара. Ити курдук Борис Годунов, Лжедмитрий I, Василий Шуйскай, Семибоярщина, польскай королевич Владислав, Лжедмитрий II, Лжедмитрий III Арассыыйа престолугар олорбуттара. Онтон олох даҕаны польскай халабырдьыттар кэлбиттэрэ, ыраахтааҕы былааһа сууллар кутталга киирбитэ.
Нижегородскай земскэй староста Кузьма Минин уонна кинээс Дмитрий Пожарскай Арассыыйа норуотун холбоон, биир сомоҕо күүс буолан, Москубаттан поляктары босхолообуттара. Ол кэнниттэн Земскэй собор Михаил Федорович Романовы ыраахтааҕынан талбыта. Ити кэмтэн ыла Романовтар удьуор уустара модун Арассыыйаны 300 сыл тухары салайбыта.
Дойдуну польскай халабырдьыттартан босхолообут Кузьма Минин уонна Дмитрий Пожарскай албан ааттарын үйэтитэн, Москуба куорат килбэйэр киинигэр, Кыһыл болуоссакка пааматынньык туруорбуттарыгар манна сылдьыбыт эрэ дьон сөбүлээн хаартыскаҕа түһэллэр.
Ааптар хаартыскаҕа түһэриитэ.
-
0
-
0
-
0
-
0
-
0
-
0
